PISMO DŽI KO KOLOŠANJA

1 Me o Pavle so sium apostoli e Hristos Isuseskoro sprema e Devleskiri volja, hem akate mancar tano amaro phral o Timotej, 2 pišinava akava pismo dži ko sveta manuša* hem o verna phralja ko Kolosi soj tane ko jekhipe e Hristosea:

Neka ovel tumen o šukaripe so na zaslužinaja le hem o mir taro Devel kova soj amaro Dad.

3 Amen sekogaš blagodarinaja e Devleske, kova soj Dad amare Gospodareske e Isus Hristoseske, keda molinaja amen tumenge. 4 Soske, šungjem baši tumari vera ko Hristos Isus hem bašo mangipe so isi tumen sprema sa o sveta manuša. 5 Tumen isi tumen akaja vera hem akava mangipe adaleske so isi tumen nadež kaj ka dobinen i nagrada so adžikerela tumen ko nebo. Tumen angleder šungjen baši akaja nadež keda sine tumenge propovedimo o čačipe - o šukar haberi, 6 kova so reslja dži ki tumende. Akava šukar haberi anela šukar rezultatija hem širinela pe ko celo sveto. A adava ovela maškar tumende da taro adava dive keda šungjen hem šukar pendžargjen o čačipe bašo e Devleskoro šukaripe so na zaslužinaja le. 7 Tumen siklilen bašo e Devleskoro šukaripe so na zaslužinaja le taro Epafras, amaro manglo hem verno phral, kova so zaedno amencar služinela sar robo e Hristoseske hem kova so amenge ko than pomožinela tumen. 8 Ov isto agjaar vakergja amenge kaj e Devleskiri sila* pomožingja tumenge te sikaven mangipe.

9 Adaleske amen da, na čhinavgjem te molina amen tumenge taro dive keda šungjem akala bukja baši tumende hem rodaja taro Devel šukar te pendžaren leskiri volja, te oven pherde mudrost, te ovel tumen i sposobnost šukar te haljoven o bukja preku e Devleskiri sila,* 10 te živinen agjaar sar so valjani te živinen okola so obožavinena e Jehova* hem celosno te ugodinen leske agjaar so ka keren sekoja buti soj šukar hem agjaar so sa pošukar ka pendžaren e Devle. 11 Isto agjaar, molinaja amen o Devel te koristinel pli bari mokj te šaj te zojrakerel tumen hem te del tumen i sila so valjani tumenge te šaj strplivo hem radosno te istrajnen ko sa. 12 Ponadari da blagodarinen e Dadeske, kova so pomožingja tumenge te oven dostojna te šaj tumen da te nasledinen adava so ov vetingja e sveta manušenge, kola soj tane vodime taro Devel.

13 Ov oslobodingja amen tari vlast e temnicakiri hem angja amen ko carstvo ple mangle Čhaveskoro. 14 Preku leskere Čhaveskiri otkupnina,* amare grevija tane prostime. 15 O Čhavo sikavela amenge savo tano o Devel kole so našti dikhaja le, o prvobijamo taro sa soj stvorimo. 16 Preku leste sine stvorime sa o javera bukja ko nebo hem ki phuv, o bukja so dikhaja len hem o bukja so na dikhaja len, bilo te oven prestolija ili gospodarija, bilo vlade ili vlastija. Sa o javera bukja sine stvorime preku leste hem leske. 17 Isto agjaar, ov postojnela sine angleder sa o javera bukja hem preku leste sa o javera bukja sine stvorime. 18 Ov tano o šero e sobranieskoro, kova soj leskoro telo. Ov tano o početok, o prvo so voskresningja taro mule* te šaj te ovel o prvo ko sa o bukja, 19 soske o Devel manglja ko Hristos te oven sa leskere osobine, 20 hem preku leste o Devel kerela te smirinel pea sa, bilo ko nebo bilo ki phuv. O Devel kerela te ovel adava preku e Isuseskoro rat so sine čhordo ko stubo mučibaske.*

21 Tumen da jekh vreme sien sine odvojme taro Devel, sien sine leskere dušmanja adaleske so mislinena sine samo bašo lošna bukja, 22 ama akana ov kergja te smirinen tumen lea preku e Isuseskoro meribe, kova so dengja sar žrtva plo manušikano telo. Ov kergja adava te šaj tumen angli leste te oven manuša soj tane sveta, bizi maana hem so nane kriva bašo ništo. 23 Ama, džangjola pe kaj ponadari da valjani te ačhoven ki vera, cvrsto te ikeren tumen ko temeli e verakoro hem te oven zorale. Nikogaš ma mukhen ništo te lel i nadež so dobingjen la keda šungjen o šukar haberi so sine propovedimo sa e manušenge telo nebo. Me o Pavle, sium sluga akale šukar habereske.

24 Radujnava man so cidava muke bašo tumaro šukaripe. Džanava kaj mora ponadari da te cidav muke e Hristoseskoro sebepi, bašo šukaripe e sobranieskoro, kova soj leskoro telo. 25 Me služinava akale sobranieske soske, o Devel dengja man adaja zadača, hem tumen isi tumen korist taro adava. Adaleske celo vilea propovedinava e Devleskoro lafi, 26 ustvari e Devleskiri tajna* koja so sine garavdi taro manuša kola so živinena sine ko purano vreme* hem taro purane generacie, ama akana adaja tajna otkringja pe e Devleskere sveta manušenge. 27 O Devel manglja e sveta manušenge taro javera narodija te otkrinel akava baro barvalipe, pli tajna.* Akaja tajna tani kaj o Hristos tano ko jekhipe tumencar hem kaj isi tumen nadež tumen da te dobinen leskiri slava. 28 Amen propovedinaja baši leste, sekas predupredinaja hem sikavaja. Amen delinaja e javerencar i bari mudrost so dobingjem la, te šaj te pomožina sarinenge soj ko jekhipe e Hristosea te oven zrela. 29 Adaleske me ponadari da but trudinava man hem borinava man, soske pomožinela man i sila so dela man ov.

2 Soske, mangava te džanen kobor but borinava man baši tumenge, bašo okola soj ki Laodikija hem bašo sa okola so nikogaš na dikhle man lično. 2 Kerava akava te šaj sekaskoro vilo te ovel utešimo, te šaj o mangipe te spojnel tumen jekh jekhea, te šaj te dobinen sa o blagoslovija so avena keda sien cvrsto uverime kaj šukar haljovena o čačipe, hem te šaj šukar te pendžaren e Devleskiri tajna,* a adava tano o Hristos. 3 Celo skapoceno mudrost hem haljojbe tane garavde ki leste. 4 Vakerava akava te šaj nikoj te na prevarinel tumen uverliva lafencar. 5 Iako na sium adathe tumencar, ko mle misle sium tumencar hem radujnava man so džanava kaj maškar tumende isi redo hem so isi tumen cvrsto vera ko Hristos.

6 Tumen prifatingjen amare Gospodare e Hristos Isuse, adaleske ponadari da džan pali leste. 7 Sar so siklilen, tumari vera ko Hristos mora te ovel zorali hem cvrsto sar jekh kaš so isi le hor korenija, hem nikogaš ma čhinaven te blagodarinen e Devleske bašo sa.

8 Pazinen nikoj te na prevarinel* tumen filozofijaja hem hovavne hem čuče lafencar kola so avena taro manušikane tradicie. Asavke manuša razmislinena ko način sar so razmislinela akava sveto, a na sar o Hristos, 9 kova so celosno sikavela e Devleskere osobine. 10 Hem agjaar preku leste, kova soj upreder sekoja vlada hem vlast, na falinela tumenge ništo. 11 Adaleske so sien ko jekhipe lea tumen sien sine kerde suneti, ama na taro manušikane vasta, nego agjaar so otfrlingjen o grešna bukja so kerela tumaro telo. Soske, okola soj tane e Hristoseskere sluge valjani te oven kerde suneti ko asavko način. 12 Sien sine parume e Hristosea, soske sine tumen o isto krstibe sar leskoro, hem adaleske so sien ko jekhipe lea tumen sien voskresnime zaedno lea preku tumari vera ko adava so kergja ple silaja o Devel, kova so voskresningja le taro mule.

13 Iako sien sine mule sebepi tumare grevija hem adaleske so na sien sine kerde suneti, o Devel dengja tumen životo zaedno e Isusea hem celo vilea prostingja sa tumare grevija. 14 Ov brišingja o pišimo Zakoni kova so sikavela sine kaj siem grešnikija hem kergja više te na važinel, agjaar so kovingja le ko stubo mučibaske.* 15 Preku o stubo mučibaske, ov peravgja o vlade hem o vlastija hem angli sarinende sikavgja len sar zarobenikija, te šaj te džanel pe kaj ov pobedingja len.

16 Adaleske, ma mukhen nikoj te sudinel tumenge bašo adava so hana hem so piena ili bašo adava dali slavinena praznikija, dali slavinena i terni mesečina* ili dali ikerena o sabat. 17 Adala bukja tane samo senka taro adava so ka avel, ama sa akala bukja ispolninena pe ko Hristos. 18 Ma mukhen nisavo manuš te lel tumendar i nagrada, čak ako kerela pe kaj tano ponizno hem kaj obožavinela ko nesavo način e angelen. Asavko manuš uporno ačhola ko adava so dikhlja ko vizie. Ov vazdela pe e bukjencar so na vredinena ništo, soske tano vodimo taro manušikano razmislibe, 19 hem na ikerela pe cvrsto ko Hristos, kova soj o šero. O Hristos tano adava kova so dela sa soj potrebno e celo teloske, a adava tano o sobranie, te šaj šukar te funkcionirinel. Ov koristinela o zglobija hem o muskulija* te šaj te spojnel o telo zaedno, hem preku leste o Devel kerela celo telo te bajrol.

20 Tumen mulen zaedno e Hristosea hem sien oslobodime taro način sar razmislinela akava sveto. Tegani, soske živinena agjaar sar te phene panda sien delo taro sveto? Soske džana panda palo leskere pravilija, sar soj: 21 „Ma astar, ma probin, ma pipin?“ 22 Akala tane samo zapovedija hem pravilija taro manuša bašo bukja so hana pe hem so piena pe hem palo adava više na postojnena. 23 Adala so ikerena pe ko akala zapovedija izgledinena sar mudra hem kaj ponizno služinena e Devleske, ama ola korkori odlučinena sar te obožavinen e Devle. Iako ola mučinena pumaro telo, sepak adava na pomožinela len te borinen pe protiv o želbe pumare teloskere.

3 Ama, ako o Devel voskresningja tumen e Hristosea, tegani roden adava soj ko nebo, kote so o Hristos bešela tari e Devleskiri desno strana. 2 Oven koncentririme ko adava soj ko nebo, a na ko adava soj ki phuv. 3 Soske, tumen mulen hem tumaro životo tano garavdo ko Hristos, kova soj ko jekhipe e Devlea. 4 Keda o Hristos, kova soj amaro životo, ka pojavinel pe, tegani tumen da ka pojavinen tumen lea ki slava.

5 Adaleske, mudaren o želbe so avena taro telo: o nemoral,* o melalipe, i nekontrolirano seksualno želba, o štetna želbe hem i alčnost koja soj tani idolopoklonstvo. 6 E Devleskiri bari holi ka avel upro manuša kola so kerena akala bukja. 7 Tumen da angleder kerena sine akala bukja. 8 Ama akana mora te ciden tumendar sa akala bukja: o gnev, i holi, o lošnipa, o lafija so vredžinena, hem bezobrazna lafija te na ikljoven taro tumaro muj. 9 Ma hovaven tumen jekh jekhea. Huljaven i purani ličnost hem lakere postapke, 10 a uraven i nevi ličnost koja so stalno obnovinela pe džikote sa pošukar pendžarena e Devle. Akaja nevi ličnost, koja so stvoringja la o Devel, kerela te oven sa poslična sar leste. 11 Akate nane više ni Grko, ni Evrei, ni nekoj soj kerdo suneti, ni nekoj so nane kerdo suneti, ni stranco, ni Skiti,* ni robo, ni nekoj soj slobodno, nego o Hristos tano sa hem ko sarine.

12 Adaleske, sar manuša soj birime taro Devel, sveta hem mangle, uraven tumen ko baro sočuvstvo, ki ljubeznost, ki poniznost, ki krotkost hem ki strplivost. 13 Ponadari da trpinen tumen jekh jekhea hem celo vilea prostinen tumenge, čak ako isi tumen pričina te žalinen tumen e javerendar. Sar o Jehova* so spremno prostingja tumenge, agjaar keren tumen da. 14 Osven adava, uraven tumen ko mangipe, soske o mangipe kerela e manušen te oven sovršeno ko jekhipe.

15 Hem isto agjaar, e Hristoseskoro mir neka vladinel upro tumare vile, soske sien vikime ko adava mir adaleske so sien delija taro jekh telo. Oven blagodarna. 16 Mukhen o sikajba e Hristoseskere celosno te pheren tumare vile hem te keren tumen mudra. Ponadari da sikaven hem ohrabrinen jekh jekhe psalmencar, gilencar so falinena e Devle, gilencar so obožavinena e Devle kolencar so sikavena kaj sien blagodarna. Giljaven taro vilo e Jehovaske.* 17 Bilo so te keren ili te vakeren, keren adava ko anav e Gospodareskoro e Isuseskoro. Preku leste blagodarinen e Devleske, o Dad.

18 Tumen o romnja, oven podložna tumare romenge, soske adava očekujnela pe taro sledbenikija e Gospodareskere. 19 Tumen o roma, ponadari da mangen tumare romnjen hem ma ponašinen tumen lencar grubo. 20 Tumen o čhave, šunen tumare roditelen ko sa, soske agjaar ka ugodinen e Gospodareske. 21 Tumen o dada, ma holjankeren* tumare čhaven, te šaj te na obeshrabrinen pe. 22 Tumen o robija, ko sa oven poslušna tumare Gospodarenge, na samo keda ola dikhena tumen, te šaj samo te ugodinen e manušenge, nego keren adava iskreno vilea soske poštujnena e Jehova.* 23 Bilo so te keren, keren adava celo vilea, sar e Jehovaske,* a na sar e manušenge. 24 Keren akava, soske džanena kaj taro Jehova* ka dobinen o nasledstvo sar nagrada. Oven robija e Gospodareske, e Hristoseske. 25 Ma bistren kaj okova so kerela lošna bukja ka ovel kaznimo bašo adava so kergja hem kaj o Devel na delinela e manušen.*

4 Tumen o gospodarija, ponašinen tumen tumare roboncar ko jekh pravedno hem česno način, soske džanena kaj tumen da isi tumen Gospodari ko nebo.

2 Nikogaš ma čhinaven te molinen tumen, hem džikote kerena adava ačhoven džangavde hem blagodarinen e Devleske. 3 Isto agjaar, molinen tumen amenge da o Devel te del amen prilika te propovedina te šaj te vakera leskiri tajna* bašo Hristos, a baši adaja tajna me sium phanlo ko zatvor. 4 Molinen tumen te šaj jasno te propovedinav o haberi, agjaar sar so valjani te kerav.

5 Ponadari da ponašinen tumen mudro okolencar soj avrijal taro sobranie. Šukar koristinen tumaro vreme.* 6 Sar o lon so kerela o hajbe te ovel vkusno, agjaar tumare lafija sekogaš neka oven prijatna e javerenge te šaj te džanen te odgovorinen sekaske sar so valjani.

7 O Tihik, mlo manglo phral hem verno sluga kova so zaedno mancar služinela sar robo e Gospodareske, ka vakerel tumenge sa bašo adava so ovela mancar. 8 Bičhalava le ki tumende te šaj te džanen sar siem hem te šaj te utešinel tumare vile. 9 Ov ka avel zaedno e Onisimea, mlo verno hem manglo phral, kova so sine tumencar. Ola ka vakeren tumenge bašo sa adava so slučinela pe akate.

10 Pozdravinena tumen o Aristarh, kova so zaedno mancar tano phanlo ko zatvor hem o Marko, o bratučeti e Varnavaskoro, koleske so panda angleder sine tumenge vakerdo te dodžakeren le šukar keda ka avel ki tumende, 11 hem o Isus kole so vikinena Just. Ola tane taro okola soj kerde suneti. Samo ola tane mle sorabotnikija ki služba bašo e Devleskoro Carstvo, ola pomožingje man hem utešingje man. 12 Pozdravinela tumen o Epafras, kova so isto agjaar sine tumencar hem kova so služinela sar robo e Hristos Isuseske. Ov sekogaš taro vilo molinela pe tumenge te šaj ponadari da te ačhoven zrela hem te oven cvrsto uverime ko sa adava soj e Devleskiri volja. 13 Me čače vakerava tumenge kaj ov but trudinela pe baši tumende hem bašo okola so živinena ki Laodikija hem ko Hierapolis.

14 Isto agjaar pozdravinena tumen o Luka, o manglo doktori, hem o Dimas. 15 Pozdravinen mandar e phralen ki Laodikija, isto agjaar e phenja e Nimfa hem o sobranie kova so khedela pe ko lakoro kher. 16 Otkeda akava pismo ka čitinel pe ki tumende, neka čitinel pe hem ko sobranie ki Laodikija, a tumen da isto čitinen adava pismo so bičhalgjum ki Laodikija. 17 Hem isto agjaar, vakeren e Arhipeske akava: „De tutar sa te šaj šukar te završine tli služba so dobingjan la taro Gospodari“.

18 Me o Pavle, pišinava tumenge akava pozdrav mle vastea. Ponadari da mislinen ki mande, soske sium phanlo ko sindžirija. O Devel neka sikavel tumenge plo šukaripe so na zaslužinaja le.