PRVO PISMO DŽI KO SOLUNJANJA

1 Me o Pavle, a akate mancar tane o Silvan* hem o Timotej, pišinava akava pismo dži ko sobranie ko Solun, kova soj ko jekhipe e Devlea, kova soj amaro Dad, hem e Gospodarea e Hristos Isusea:

Neka ovel tumen o šukaripe so na zaslužinaja le hem o mir taro Devel.

2 Sekogaš blagodarinaja e Devleske baši tumende keda spomninaja tumen ko amare molitve. 3 Soske, anglo amaro Devel, kova soj amaro Dad, amen nikogaš na bistraja adava so tumen kerena adaleske so isi tumen vera, kobor trudinena tumen adaleske so isi tumen mangipe hem kobor istrajnena ko pharipa adaleske so isi tumen nadež ko amaro Gospodari o Isus Hristos. 4 Soske, amen džanaja phraljalen, kaj o Devel kova so mangela tumen, ov biringja tumen. 5 Soske, o šukar haberi so propovedingjem tumenge, na kergjem le adava samo lafencar, nego adava kergjem soske pomožingja amenge e Devleskiri sila,* siem sine cvrsto uverime kaj adava so vakeraja tumenge tano o čačipe hem adava haberi silno vlijajngja upri tumende. A tumen korkori džanena save siem sine maškar tumende, hem adava sine bašo tumaro šukaripe. 6 Hem tumen gelen palo amaro primer hem palo primer e Gospodareskoro, soske iako sine tumen but nevolje, tumen radosno prifatingjen e Devleskoro lafi. A adaja radost avela tari e Devleskiri sila.* 7 Agjaar, tumen ulen primer sa e vernikonge ki Makedonija hem ki Ahaja.

8 Ustvari, na samo so tumen širingjen e Jehovaskoro* lafi ki Makedonija hem ki Ahaja, nego hem šundilo segde baši tumari vera ko Devel, adaleske amen na valjani te vakera ništo. 9 Soske, korkori o manuša vakerena bašo adava sar amen prvo puti alem ki tumende hem sar tumen otfrlingjen tumare idolen hem počmingjen te služinen sar robija e dživde hem e čačutne Devleske, 10 hem kaj adžikerena leskoro Čhavo o Isus te avel taro nebo, kole so ov vazdingja le taro mule hem kova so spasinela amen tari e Devleskiri bari holi so avela.

2 Phraljalen, tumen korkori džanena kaj amari poseta ki tumende na sine džabe. 2 Sar so šungjen, angleder adava ko Filipi cidingjem muke hem siem sine maltretirime. Ama adaleske so pomožingja amen amaro Devel, khedingjem hrabrost te propovedina tumenge o šukar haberi, iako sine amen baro protivibe.* 3 Soske, adava so pottikninaja tumen te keren, na avela taro pogrešna idee ili taro nečista motivija hem ni na keraja le te šaj nekas te prevarina. 4 Namesto adava, sar asavke kas so o Devel čhivgja te propovedinen o šukar haberi, amen na keraja lafi te šaj te ugodina e manušenge, nego e Devleske kova so ispitinela amare vile.

5 Ustvari tumen džanena kaj amen nikogaš na falingjem tumen samo te šaj te prevarina tumen hem na sikavgjem amen sar šukar manuša samo te šaj te dobina tumendar nešto. O Devel tano amenge svedoko bašo akava! 6 Ni na rodingjem slava taro manuša, ni tumendar, ni e javerendar, iako sar e Hristoseskere apostolija amen šaj sine te ova tumenge ko teret. 7 Namesto adava, grižingjem amen tumenge, sar jekh daj koja so parvarela ple čhaven hem mangipaja grižinela pe lenge. 8 Agjaar, pherde mangipaja sprema tumende, siem sine spremna na samo te vakera tumenge e Devleskoro šukar haberi, nego hem te da amaro životo tumenge, soske but zamanglem tumen.

9 Sigurno setinena tumen, phraljalen, kobor trudingjem amen hem kobor mučingjem amen. Džikote propovedinaja sine tumenge e Devleskoro šukar haberi, keraja sine buti dive hem rat te šaj nikaske tumendar te na ova ko teret. 10 Tumen, kola so sien vernikija, sien svedokija, a isto agjaar o Devel da kaj keda siem sine tumencar amen siem sine verna, kergjem adava soj tano pravedno hem na siem sine kriva bašo ništo. 11 Tumen šukar džanena kaj amen ponadari da pottikningjem, utešingjem hem sovetingjem sekole jekhe tumendar sar so kerela jekh dad ple čhavencar, 12 te šaj ponadari da te živinen ko način sar so mangela o Devel kova so vikinela tumen te aven ko leskoro Carstvo hem te dobinen slava.

13 Adaleske amen na čhinavaja te blagodarina e Devleske, soske keda šungjen e Devleskoro lafi amendar, tumen na prifatingjen le sar lafi taro manuš, nego prifatingjen le agjaar sar soj čače, sar lafi taro Devel, hem adava lafi vlijajnela upri tumende. 14 Soske, tumen phraljalen gelen palo primer e Devleskere sobraniengoro tari Judeja kola soj ko jekhipe e Hristos Isusea. Soske, tumen da cidingjen muke taro tumaro narodo, isto sar ola so cidena muke taro Evreija, 15 kola so čak mudargje e Gospodare e Isuse hem e prorokon, a amen progoningje amen. Osven adava, ola na ugodinena e Devleske, nego tane protiv adava soj korisno sa e manušenge, 16 soske trudinena pe te čhinaven amen te propovedina e manušenge taro javera narodija te šaj ola te spasinen pe. Agjaar ola pherena pe sa poviše grevija. Ama e Devleskiri bari holi reslja len.

17 Phraljalen, iako kratko vreme siem sine odvojme tumendar hem na dikhlem tumen, tumen sien sine amenge ko vilo. Adaleske so but falingjen amenge, kergjem sa so šaj lično te dikha tumen. 18 Adaleske manglem te ava ki tumende, a me o Pavle, na jekh puti nego duj puti trudingjum man te avav, ama o Satana čhinavgja amen. 19 Soske, soj tani amari nadež, amari radost ili amari kruna kolaja so ka dičina amen anglo amaro Gospodari o Isus ko vreme tari leskiri prisutnost?* Zarem na sien adava tumen? 20 Oja, tumen sien amari gordost hem amari radost.

3 Adaleske, keda našti sine više te izdržina, mislingjem kaj tano najšukar te ačhova korkori ki Atina, 2 a bičhalgjem e Timotee, amare phrale hem e Devleskere sluga,* kova so propovedinela o šukar haberi bašo Hristos, te zajakninel tumen hem te utešinel tumen te šaj tumari vera te ovel cvrsto, 3 hem agjaar nikaskiri vera te na slabonel taro akala nevolje. Soske, tumen džanena kaj asavke bukja sigurno ka slučinen pe amenge. 4 Keda siem sine ki tumende, angleder vakergjem tumenge kaj ka oven amen akala nevolje, hem sar so džanena agjaar da ulo. 5 Adaleske so našti sine više te izdržinav, bičhalgjum le ki tumende, te šaj te doznajnav baši tumari vernost, soske darandiljum kaj ko nesavo način o Beng* šaj čhivgja tumen te grešinen hem kaj šaj sine džabe adava so trudingjem amen.

6 Ama o Timotej akana samo so irangja pe tumendar hem angja amenge šukar haberija baši tumari vera hem mangipe, hem kaj sien radosna keda setinena tumen ki amende hem edvaj adžikerena te dikhen amen, isto sar amen da so edvaj adžikeraja te dikha tumen. 7 Adaleske phraljalen, iako nane amen adava so valjani amenge hem isi amen nevolje, amen utešingjem amen keda šungjem baši tumari vernost. 8 Adaleske so šungjem kaj tumen cvrsto ikerena tumen ko jekhipe e Gospodarea, amen dživdilem. 9 Čače blagodarinaja e Devleske baši tumenge, soske kergjen amen but radosna. 10 Dive hem rat, taro vilo molinaja amen e Devleske te šaj te dikha tumen hem te da tumen adava so falinela tumenge te šaj tumari vera te ovel zorali.

11 Molinaja amen o Devel, amaro Dad hem amaro Gospodari, o Isus, te phraven amenge o drumo te ava ki tumende. 12 Isto agjaar, mangaja o Gospodari te kerel tumaro mangipe sprema jekh jekheste hem sprema sarinende te bajrol hem te pherel tumare vile, isto sar soj amaro vilo pherdo mangipaja sprema tumende. 13 Agjaar tumare vile ka oven cvrsta, nane te oven kriva bašo ništo hem ka oven sveta anglo amaro Devel, o Dad, keda amaro Gospodari o Isus ka ovel prisutno sa ple sveta slugencar.

4 Phraljalen, tumen živinena ko način soj ugodno e Devleske, sar so sikavgjem tumen amen. Ama akana, ko anav e Gospodareskoro e Isuseskoro, amen pottikninaja tumen hem molinaja tumen ponadari da te keren adava panda poviše. 2 Soske, tumen džanena save upatstvija* dengjem tumen ko anav e Gospodareskoro e Isuseskoro.

3 Soske, e Devleskiri volja tani akaja: tumen valjani te oven sveta hem te ciden tumen podur taro nemoral.* 4 Sekova jekh tumendar valjani te džanel sar te kontrolirinel plo telo* te šaj te oven sveta hem te dobinen čest. 5 Ma oven sar o manuša taro javera narodija so na pendžarena e Devle, soske len isi len alčna seksualna želbe so našti kontrolirinena len. 6 Nijekh na valjani te kerel adava so nane ispravno hem te kerel šteta ple phraleske, soske o Jehova* kazninela bašo sa akala bukja, sar so više vakergjem tumenge hem strogo predupredingjem tumen. 7 Soske, o Devel na vikingja amen te živina životo kova so nane čisto, nego vikingja amen te ova sveta. 8 Adaleske, okova so otfrlinela akala predupreduvanja, ov na otfrlinela manuše, nego e Devle, kova so dela tumen pli sila.*

9 A bašo phralikano mangipe na valjani te pišina tumenge, soske tumen korkori sien sine sikavde taro Devel te mangen tumen jekh jekhea. 10 Ustvari, tumen čače sikavena mangipe sa e phralenge ki celo Makedonija. Ama, pottikninaja tumen, phraljalen, te keren adava panda poviše. 11 Trudinen tumen te živinen mirno, te dikhen tumari buti hem te keren buti tumare vastencar, sar so sikavgjem tumen, 12 te šaj o manuša soj avrijal taro sobranie te dikhen kaj tumen živinena primerno hem te na valjanel tumenge nikastar ništo.

13 Hem mangaja, phraljalen, tumen te džanen so ka ovel okolencar soj mule,* te šaj te na tugujnen sar o javera manuša so nane len nadež. 14 Soske, ako verujnaja kaj o Isus mulo hem voskresningja, tegani verujnaja kaj o Devel okolen da kola so mule,* a sine ko jekhipe e Hristosea, ka voskresninel len te šaj te oven e Isusea. 15 Soske, akava vakeraja tumenge sprema e Jehovaskoro* lafi: amen so ka ova dživde ko vreme tari e Gospodareskiri prisutnost nane te voskresnina angleder okola so mule.* 16 Soske, korkori o Gospodari ka hulel taro nebo hem ka zapovedinel arhangeleskere glasoja hem e Devleskere trubaja, hem najangle ka ušten okola soj mule, a sine ko jekhipe e Hristosea. 17 Palo adava, amen so siem dživde, zaedno lencar ka ova ingarde ko oblakija te šaj te arakha amen e Gospodarea ko nebo hem agjaar amen sekogaš ka ova e Gospodarea. 18 Adaleske, utešinen tumen jekh jekhea akale lafencar.

5 A bašo vremija hem bašo dive soj odredime, na valjani te pišinel pe tumenge, phraljalen. 2 Soske, tumen šukar džanena kaj e Jehovaskoro* dive ka avel sar čor so avela ki rat. 3 Keda o manuša ka vakeren: „Mir hem sigurnost!“, tegani ka oven uništime iznenadeno, sar o dukha so astarena jekhe khamne džuvlja, hem ola ka našti te našen. 4 Ama tumen phraljalen, na sien ki temnica, pa adava dive te iznenadinel tumen sar e diveskiri svetlina so iznenadinela e čoren, 5 soske tumen sarine sien čhave e svetlinakere hem čhave e diveskere. Amen na siem čhave ni e rakjakere, ni e temnicakere.

6 Adaleske, te na sova sar o javera, nego te ačhova džangavde hem te razmislina trezveno. 7 Soske, okola so sovena, rakjate sovena hem okola so makjona, rakjate makjona. 8 A amen kola so siem čhave e diveskere, ponadari da te razmislina trezveno hem te čhiva ko kolin o oklop e verakoro hem e mangipaskoro, a ko šero te čhiva o šlemi - i nadež kaj ka ova spasime. 9 Soske, o Devel na biringja amen te osetina leskiri bari holi, nego te ova spasime preku amaro Gospodari o Isus Hristos. 10 Ov mulo amenge te šaj amen, bizi razlika dali siem džangavde ili sovaja,* zaedno lea te živina. 11 Adaleske, ponadari da ohrabrinen tumen maškar tumende hem izgradinen jekh jekhe, sar so više kerena.

12 Molinaja tumen, phraljalen, sikaven poštovanje okolenge so trudinena pe maškar tumende, so predvodinena ki služba e Gospodareske hem so sovetinena tumen. 13 Sikaven lenge kaj but ceninena len hem mangena len baši buti so kerena. Oven ko mir jekh jekhea. 14 A pottikninaja tumen, phraljalen, opomeninen okolen so živinena neuredno, utešinen okolen soj razočarime, pomožinen okolenge soj slaba, oven strpliva sarinencar. 15 Pazinen nikoj nikaske te na iranel bašo lošnipe lošnipaja, nego sekogaš trudinen tumen te keren šukaripe jekh jekheske hem sa e javerenge.

16 Sekogaš radujnen tumen. 17 Ma čhinaven te molinen tumen. 18 Oven blagodarna bašo sa. O Devel mangela te keren adava, soske sien sledbenikija e Hristos Isuseskere. 19 Ma čhinaven e Devleskere sila te vlijajnel upri tumende.* 20 Ma dikhen ko proroštvija sar nešto so na vredinela. 21 Ispitinen sa te šaj te uverinen tumen kaj adava tano čače, cvrsto ikeren tumen ko adava soj tano šukar. 22 Ikeren tumen podur taro sekova lošnipe.

23 O Devel kova so dela mir, neka kerel tumen te oven sveta baši leskiri služba. Hem sa tumare šukar osobine so sikavena, tumaro životo hem tumaro telo, phraljalen, neka ačhoven sveta sa dži ki prisutnost amare Gospodareskiri e Isus Hristoseskiri. 24 Okova so vikinela tumen tano verno, hem ov sigurno ka kerel sa akava.

25 Phraljalen, ponadari da molinen tumen amenge.

26 Mangipaja resen tumen sa e phralencar.*

27 Molinava tumen ko anav e Gospodareskoro, akava pismo te ovel čitimo sa e phralenge.

28 O šukaripe so na zaslužinaja le amare Gospodareskoro e Isus Hristoseskoro neka ovel tumencar.