DUJTO PISMO DŽI KO SOLUNJANJA

1 Me o Pavle, a akate mancar tane o Silvan* hem o Timotej, pišinava akava pismo dži ko sobranie ko Solun, kova soj ko jekhipe e Devlea, amare Dadea, hem e Gospodarea e Isus Hristosea:

2 Neka ovel tumen o šukaripe so na zaslužinaja le hem o mir taro Devel, o Dad, hem o Gospodari o Isus Hristos.

3 Dužna siem sekogaš te blagodarina e Devleske baši tumende phraljalen, a isi amen hem pričina bašo adava, soske tumari vera ovela sa pozorali hem o mangipe so isi tumen jekh jekheske sa poviše bajrola. 4 Adaleske amen falinaja tumen maškar e Devleskere sobranija, soske istrajnena hem isi tumen vera, iako isi tumen progonstvo hem pharipa. 5 Sa adava tano dokaz kaj o Devel pravedno sudinela hem kaj ka oven dostojna bašo e Devleskoro Carstvo, koleske so cidena muke.

6 Adaleske so o Devel tano pravedno, ov ka iranel okolenge so kerena tumenge nevolje. 7 A tumen so trpinena nevolje ka čhinaven te ciden muke, a isto agjaar amen da, keda taro nebo ka pojavinel pe* o Gospodari o Isus zaedno ple mokjna angelencar 8 ki bari jag, hem ka odmazdinel pe okolenge so na pendžarena e Devle hem okolenge so na prifatinena o šukar haberi bašo amaro Gospodari o Isus. 9 Amaro Gospodari ka kazninel len agjaar so ka oven večno uništime hem agjaar ola ka oven cidime dur taro leskere jakhja hem nane te dikhen leskiri bari mokj. 10 Adava ka ovel ko dive keda o Gospodari ka avel. Tegani ov ka ovel slavimo ple sveta slugencar hem ka vooduševinen pe leske sarine so verujngje ki leste, a maškar lende ka oven tumen da, kola so verujngjen ko adava so svedočingjem tumenge.

11 Adaleske amen stalno molinaja amen tumenge, hem rodaja taro amaro Devel te dikhel tumen sar dostojna bašo adava so vikingja tumen hem ple silaja celosno te ispolninel sa o šukaripe so mangela te kerel tumenge, hem te ispolninel sa adava so tumen kerena adaleske so sien pottiknime tari vera. 12 Akava tano agjaar te šaj o anav amare Gospodareskoro e Isuseskoro te slavinel pe tumare postapkencar hem tumen te šaj te oven slavime adaleske so sien ko jekhipe lea. Akaja slava avela adaleske so amaro Devel hem o Gospodari o Isus sikavena amenge plo šukaripe so na zaslužinaja le.

2 Ama, phraljalen, keda kerela pe lafi baši prisutnost* amare Gospodareskiri, e Isus Hristoseskiri, hem bašo adava so ka ova khedime te šaj te ova zaedno lea, molinaja tumen 2 ma dozvolinen nikaske lokheste te meninel tumaro ispravno razmislibe, ni ma dozvolinen te oven voznemirime tari nesavi poraka, koja so dikhjola sar te phene avela taro Devel, ni taro nesavo lafi ili taro nesavo pismo, kova so dikhjola sar te phene tano amendar, a kova so vakerela kaj e Jehovaskoro* dive tano akate.

3 Ma dozvolinen nekoj, ko bilo savo način te hovavel tumen, soske adava dive nane te avel sa džikote prvo na avela o otpadništvo* hem na otkrinela pe o manuš kova so protivinela pe e zakoneske. Ov tano adava so ka ovel uništimo. 4 Ov tano protivniko hem vazdela pe upreder sekova jekh kas so vikinena devel ili upreder sa adava so o manuša obožavinena. Ov bešela e Devleske ko hrami hem angli sarinende sikavela pe sar devel. 5 Na setinena tumen li kaj, džikote panda sium sine tumencar, vakerava sine tumenge bašo akala bukja?

6 Hem tumen akana džanena, phraljalen, soj adava so čhinavela le te otkrinel pe angleder o vreme soj odredimo bašo adava. 7 Čače, o lošnipe akale manušeskoro više počmingja, iako tano garavdo hem ka ačhol garavdo sa džikote više nane te ovel okova so čhinavela le. 8 Tegani ka ovel otkrimo o manuš kova so protivinela pe e zakoneske. O Gospodari, o Isus, ka mudarel le e silaja* so ikljola taro leskoro muj hem ka uništinel le keda ka sikavel pe leskiri prisutnost. 9 Ama i prisutnost e manušeskiri kova so protivinela pe e zakoneske tani sebepi o Satana. Ov dela le pli sila te šaj te kerel razna mokjna delija, hovavne znakija, čudija, 10 sekoja nepravda hem prevara. Akala bukja hovavena e manušen kola so ka oven kaznime adalea so ka oven uništime, soske ola na prifatingje hem na zamangle o čačipe kova so šaj sine te spasinel len. 11 Adaleske o Devel dozvolinela ola te oven prevarime taro hovavno sikajbe, te šaj te verujnen e hovavne lafenge, 12 agjaar sarine ola te oven osudime, soske na verujngje ko čačipe, nego mangle i nepravednost.

13 Ama amen siem dužna sekogaš te blagodarina e Devleske baši tumende phraljalen, kola so sien mangle taro Jehova,* soske o Devel sebepi tumari vera ko čačipe, panda taro početok biringja tumen te šaj te oven spasime adalea so kergja tumen sveta ple silaja. 14 Preku o šukar haberi so propovedingjem tumenge, ov vikingja tumen te oven spasime te šaj te dobinen i slava so isi amare Gospodare e Isus Hristose. 15 Adaleske phraljalen ačhoven cvrsta hem ponadari da ikeren tumen ko bukja kolenge so sien sine sikavde, bizi razlika dali lafencar ili preku nesavo amaro pismo. 16 Hem amaro Gospodari o Isus Hristos hem o Devel, amaro Dad, kova so manglja amen hem kova so preku plo šukaripe so na zaslužinaja le dengja amen večno uteha hem šuži nadež, 17 neka utešinen tumare vile hem neka keren tumen zorale te šaj sekogaš te keren hem te vakeren adava soj šukar.

3 Ko krajo phraljalen, ponadari da molinen tumen amenge te šaj ponadari da sigate te širinel pe e Jehovaskoro* lafi hem te slavinen le o javera da manuša sar so slavinena le tumen, 2 hem molinen tumen o Devel te zaštitinel amen taro rumime hem lošna manuša, soske sa e manušen nane len vera. 3 Ama o Gospodari tano verno hem ov ka zajakninel tumen hem ka zaštitinel tumen taro Beng.* 4 Hem sar sledbenikija e Gospodareskere amen isi amen doverba ki tumende kaj tumen kerena hem kaj ponadari da ka keren adava so sikavgjem tumen. 5 Molinaja amen o Gospodari ponadari da te vodinel tumare vile te šaj te mangen e Devle hem te istrajnen džikote ponadari da džana palo Hristos.

6 Phraljalen, ko anav e Gospodareskoro, e Isus Hristoseskoro, vakeraja tumenge te ciden tumen sekole phralestar kova so živinela neuredno hem so na ikerela pe ko adava so sikavgjem tumen.* 7 Tumen džanena sar valjani te džan palo amaro primer, soske džikote siem sine tumencar, 8 amen na živingjem neuredno, a ni na halem nekaskoro maro džabe. Nego dive hem rat, kergjem naporno buti te šaj te na ova ko teret nikaske tumendar. 9 Hem adava na kergjem le adaleske so nane amen pravo te roda tumendar pomoš, nego manglem te mukha tumenge primer pali koleste so valjani te džan. 10 Ustvari, džikote siem sine tumencar, amen dengjem tumen akaja zapoved: „Ako nekoj na mangela te kerel buti, na valjani ni te hal!“ 11 Soske, šunaja kaj nesave tumendar živinena neuredno hem ič na kerena buti, nego mešinena pe ko adava so nane lengiri buti. 12 Ko anav e Gospodareskoro, e Isus Hristoseskoro, asavkenge zapovedinaja hem sovetinaja len te keren pli buti ko mir hem te han o maro kova so korkori ka zarabotinen le.

13 A tumen phraljalen, ma otkažinen tumen taro adava te keren šukaripe. 14 Ako nekoj na šunela adava so vakergjem ko akava pismo, obeležinen le hem čhinaven te družinen tumen lea, te šaj te ladžal. 15 Ama ma dikhen ki leste sar tumaro dušmani, nego ponadari da sovetinen le sar tumaro phral.

16 O Gospodari kova so dela mir, neka del tumen mir sekogaš hem ko sa. O Gospodari neka ovel sarinencar tumencar.

17 Me, o Pavle, pišinava tumenge akava pozdrav mle vastea. Adava tano mlo znako ko sekova pismo, agjaar pišinava me.

18 O šukaripe kova so na zaslužinaja le amare Gospodareskoro e Isus Hristoseskoro, neka ovel sarinencar tumencar.