PRVO PISMO DŽI KO TIMOTEJ

1 Me o Pavle, apostoli e Hristos Isuseskoro sprema i zapoved e Devleskiri, amaro Spasiteli, hem e Hristos Isuseskiri, amari nadež, 2 pišinava dži ko Timotej* kova soj mange sar čačutno čhavo ki služba bašo Gospodari:

Neka ovel tut o šukaripe so na zaslužinaja le, i milost hem o mir taro Devel, o Dad, hem taro Hristos Isus amaro Gospodari.

3 Keda cidingjum te džav ki Makedonija, pottikningjum tut te ačhove ko Efes, a akana da pottikninava tut te ačhove adathe te šaj te zapovedine nesavenge te na širinen javera sikljojba, 4 hem te na bavinen pe izmislime paramisencar hem istražibaja o poteklo. Asavke bukja nane korisna hem anena dži ko diskusie kolendar so nane nisavi korist, a nane len nisavi vrska adalea so o Devel dela amen te šaj te zojrakera amari vera. 5 I cel soske dava akaja zapoved tani te šaj te sikava mangipe so avela taro čisto vilo, tari čisto sovest hem tari vera so nane licemerno. 6 Nesave cidingje pe taro akala bukja hem astargje pe čuče muabetencar. 7 Mangena te oven učitelija e zakoneskere, a na haljovena ni adava so vakerena, ni o bukja so uporno sikavena.

8 A amen džanaja kaj o Zakoni tano šukar ako ispravno primeninela pe. 9 Svesna siem kaj o zakonija na anena pe bašo pravedna manuša, nego bašo okola so phagena o zakoni hem bašo buntovna manuša, bašo manuša so na darana taro Devel hem bašo grešnikija, bašo okola so nane verna* hem bašo okola so na poštujnena adava soj sveto, bašo okola so mudarena pumare daden, pumare dajen, ili so mudarena javeren, 10 bašo nemoralna* manuša, bašo murša so isi len odnosija javere muršencar, bašo okola so čorena* manušen, bašo okola so hovavena, bašo okola so dena hovavni sovli hem sa okolenge so kerena adava soj protiv o ispravno* sikljojbe. 11 Akava sikljojbe tano taro srekjno Devel, sprema o slavno šukar haberi kova soj mange dendo.*

12 Blagodarno sium e Hristos Isuseske, amaro Gospodari kova so dengja man sila, soske dikhlja kaj šaj te ovel le doverba ki mande hem adaleske dengja man služba, 13 iako angleder kerava sine lafi protiv o Devel, progoninava sine leskere narodo hem sium sine drsko manuš. Ama sikavdi sine mange milost, adaleske so tegani na džanava sine so kerava hem na sine man vera. 14 Ama amaro Gospodari sikavgja amenge baro šukaripe so na zaslužinaja le hem isto agjaar dobingjum vera hem mangipe taro Hristos Isus. 15 Akava so vakerava tano čače hem zaslužinela celosno te prifatinen le: o Hristos Isus alo ko sveto te spasinel e grešnikon, a najbaro lendar sium me. 16 Sepak sikavdi tani mange milost te šaj preku mande, kova so sium o najbaro grešniko, o Hristos Isus te sikavel celi pli strplivost. Agjaar uljum primer sa okolenge so ka verujnen ki leste te šaj te dobinen večno životo.

17 A e večno Careske,* so na raspadinela pe, soj nevidlivo, o edinstveno Devel, neka oven sikavde čest hem slava zasekogaš! Amin.

18 Timotej, mo čhavo, dava tut akaja zapoved soj tani ko sklad e lafencar taro proroštvija so sine vakerde angleder baši tute. Akala lafija ka den tut i hrabrost ponadari da te borine tut ki šukar vojna. 19 Džikote kerea adava, arakh tli vera hem i čisto sovest. Adaleske so nesave na kergje akava, našavgje pumari vera sar jekh brodi so batinela ko pani. 20 Maškar lende tane o Imenej hem o Aleksandar kolen so ukoringjum agjaar so predajngjum len e Satanaske te šaj te sikljoven kaj na smejnena te keren lafi protiv o Devel.

2 Adaleske najangleder, pottikninava tumen te molinen tumen bašo različna manuša agjaar so celo vilea ka roden pomoš taro Devel hem blagodarinen tumen leske. 2 Molinen tumen bašo carija hem bašo sa okola so isi len avtoriteti, te šaj te živina mirno životo bizo te sekirina amen hem zrelo te razmislina* džikote celo vilea služinaja e Devleske. 3 Adava tano šukar hem prifatlivo anglo jakhja amare Spasiteleskere, o Devel, 4 kova so mangela različna manuša te spasinen pe hem šukar te džanen o čačipe. 5 Soske, o Devel tano jekh, hem jekh tano o posredniko maškar o Devel hem o manuša, a adava tano o manuš o Hristos Isus, 6 kova so dengja pe sa e manušenge* sar otkupnina* koja so odgovorinela. Bašo adava ka svedočinel pe ko vreme soj odredimo. 7 Te šaj te svedočinel pe bašo akava, o Devel čhivgja man te ovav propovedniko hem apostoli, te šaj te sikavav e manušen taro javera narodija baši vera hem bašo čačipe. Čače vakerava tumenge, na hovavava.

8 Adaleske mangava ko sekova than kote so ka kheden tumen, o verna phralja* te molinen pe bizi holi hem bizo raspravie. 9 Isto agjaar, mangava o džuvlja te uraven pe pristojno, te oven skromna hem ispravno te razmislinen, te na ukrasinen pe adalea so ka pletinen pumare bala, ni zlatoja ili biserencar, ili but skupa šeencar, 10 nego adalea so ka keren šukar bukja, sar so ličinela e džuvlenge so vakerena kaj poštujnena e Devle.

11 I džuvli džikote sikljola, neka čutinel hem neka ovel celosno podložno. 12 Na dozvolinava jekh džuvli te sikavel, a ni te ovel la avtoriteti upro murš, nego te čutinel. 13 Soske, prvo o Adam sine stvorimo, a palo adava i Eva. 14 Hem na sine o Adam prevarimo, nego i džuvli sine celosno prevarimi hem grešingja. 15 Ama o džuvlja ka oven zaštitime preku o bijanibe čhave, ako ponadari da sikavena vera hem mangipe, ako ačhona sveta hem ako ponadari da razmislinena ispravno.

3 Akava so vakerava tano čače: ako nekoj mangela te služinel sar nadgledniko, ov mangela but šukar buti te kerel. 2 Adaleske, o nadgledniko valjani te ovel manuš koleske so našti te vakerel pe kaj tano krivo bašo nešto, te ovel le samo jekh romni, te ovel uramnoteženo ko sa, te razmislinel ispravno, te živinel uredno, te ovel gostoprimlivo, sposobno te sikavel e javeren, 3 na smejnela te ovel pijanica, ni nasilno, nego valjani te ovel razumno,* na smejnela te ovel kavgadžija, ni te mangel o pare. 4 Valjani šukar te vodinel ple familija, a o čhave leskere valjani te oven poslušna hem te sikaven poštovanje. 5 Soske, ako nekoj na džanela te vodinel ple familija, sar ka grižinel pe e Devleskere sobranieske? 6 Na smejnela te ovel manuš kova so sigende ulo verniko, te šaj te na ovel gordo hem agjaar te dobinel i isto osuda savi so dobingja o Beng. 7 Osven adava, ov valjani te ovel ko šukar glaso avrijal da taro sobranie, te šaj te na ladžakerel pe hem te na perel ki e Bengeskiri stapica.

8 Isto agjaar o sluga-pomošnikija valjani te zaslužinen e javerengoro poštovanje,* te na oven dujmujale, te na pien but mol, ni te oven alčna manuša kola so ko nečesno način dikhena te ovel len korist, 9 te ikeren pe ki vera koja soj tani e Devleskiri tajna* hem te ovel len čisto sovest.

10 Hem najangle valjani te oven ispitime, te šaj te dikhel pe dali odgovorinena baši adaja služba, hem ako nane nešto lošno te vakerel pe baši lende, neka služinen sar sluga-pomošnikija.

11 Isto agjaar, o džuvlja valjani te zaslužinen e javerengoro poštovanje, na smejnena te klevetinen,* nego te oven uramnotežena hem verna ko sa.

12 E sluga-pomošnikon valjani te ovel len samo jekh romni hem šukar te vodinen pumare čhaven hem pumare familija. 13 Soske, okola so šukar kerena pumari služba, kerena peske šukar anav hem isi len bari sloboda te keren lafi e javerencar baši pumari vera ko Hristos Isus.

14 Iako nadinava man kaj panda hari ka avav ki tute, 15 sepak pišinava tuke akava te šaj, ako zadržinava man, te džane sar valjani te ponašine tut ko e Devleskoro kher, kova soj tano o sobranie e dživde Devleskoro hem soj tano o stubo hem temeli e čačipaskoro. 16 Čače, bari tani e Devleskiri tajna* bašo služibe e Devleske celo vilea: ’Ov* ulo manuš, o Devel vakergja kaj tano pravedno keda palem kergja te ovel duhovno ličnost, ov pojavingja pe e angelenge, baši leste propovedinela pe sine maškar o narodija, o manuša ko sveto verujngje ki leste, sine lendo upre ko nebo hem sine leske dendi slava‘.

4 Ama, o lafija so sine vakerde preku e Devleskiri sila* jasno sikavena kaj ka avel vreme keda nesave ka peren tari vera adaleske so ka šunen hovavne lafija, kola so dikhjona sar te phene avena taro Devel, hem ka šunen sikljojba taro demonija. 2 Ola ka oven hovavde taro hovavne lafija so vakerena o licemerna manuša, kolengiri sovest tani sar te phene thari tate sastrnea hem na reagirinela. 3 Asavke zabraninena e manušenge te ženinen pe hem zapovedinena lenge te na han nesavi hrana so stvoringja o Devel. A o Devel stvoringja adaja hrana te šaj, okola so isi len vera hem so šukar pendžarena o čačipe, te han hem te blagodarinen e Devleske bašo adava. 4 Soske, sa so stvoringja o Devel tano šukar hem na valjani ništo te otfrlinel pe ako hala pe adava agjaar so blagodarinela pe e Devleske. 5 Soske, i hrana ovela sveto preku e Devleskoro lafi hem preku i molitva.

6 Adalea so ka de akava sovet e phralenge, tu ka ove šukar sluga e Hristos Isuseskoro, kova soj parvardo e verakere lafencar hem e sikljojbaja kova soj šukar, ki koleste so tu cvrsto ikerea tut. 7 Otfrlin o hovavne paramisa kola so na sikavena poštovanje sprema adava soj sveto, sar o paramisa so vakerena o phure džuvlja. Namesto adava, trudin tut but* te rese i cel te služine e Devleske celo vilea. 8 Soske, o telesno vežbibe tano hari korisno, ama te služinel pe e Devleske celo vilea tano korisno ko sa, soske anela blagoslovija akana hem ki idnina. 9 Akava so vakerava tano čače hem zaslužinela celosno te prifatinel pe. 10 Adaleske naporno keraja buti hem daja amendar sa, soske nadinaja amen ko dživdo Devel, kova soj Spasiteli e različna manušenge, a posebno okolenge soj leske verna.

11 Ponadari da zapovedin hem sikav e javeren bašo akala bukja. 12 Nikoj te na dikhel ki tute sar potele pestar adaleske so sian terno. Namesto adava, ov primer e verna manušenge ko keribe lafi, ko postapke, ko mangipe, ki vera hem ko čisto ponašibe. 13 Džikote na avava, ponadari da koncentririn tut ko javno čitibe, ko ohrabribe hem ko sikajbe e javeren. 14 Ma zanemarin o poklon so isi ki tute, kova so sine tuke dendo preku o proroštvo, keda o starešine čhivgje pumare vasta upri tute. 15 Razmislin bašo akala bukja, posvetin tut lenge, te šaj tlo napredok te dikhen sarine. 16 Šukar pazin sar živinea hem sar sikavea. Ponadari da iker tut ko adala bukja, soske kerindor adava ka spasine hem tut hem okolen so šunena tut.

5 Ma ukorin pophure manuše ko grubo način, nego ljubezno sovetin le sar tlo dad, a e poternen sar tle phralja, 2 e phure džuvlen sar tle daja, a e terne džuvlen sar tle phenja, hem ker le adava čisto nameraja.

3 Pomožin e udovicenge kolen so nane len koj te grižinel pe lenge.* 4 Ama ako nesave udovica isi la čhave ili unukija, ola najangle valjani te sikaven kaj služinena e Devleske celo vilea adalea so ka grižinen pe ple familienge. Ola valjani te iranen pumare roditelenge, pumare paponge hem babenge adava soj lenge dužna te den, adaleske so adava tano prifatlivo e Devleske. 5 A i udovica kolake so nane koj te grižinel pe hem nane la ništo, oj nadinela pe ko Devel hem istrajno, dive hem rat, taro vilo molinela pe e Devleske hem rodela te pomožinel lake. 6 Ama okoja udovica koja so živinela samo te zadovolinel ple želbe,* oj tani muli, iako panda živinela. 7 Ponadari da de len akala zapovedija, te šaj te na ovel bašo so te krivinen len. 8 Čače, ako nekoj na grižinela pe bašo ple, a posebno bašo ple kherutne, ov otkažingja pe tari vera hem pološno tano taro manuš soj bizi vera.

9 Ko spisako te pomožinel pe e udovicenge, čhiv okole udovica kola so isi la poviše taro 60 berš hem koja so sine verno ple romeske,* 10 koja soj ko šukar glaso bašo ple šukar postapke, koja so šukar bajrargja ple čhaven, sine gostoprimlivo, thovgja o pre e sveta manušengere,* pomožingja okolenge kola so sine ki nevolja hem posvetingja pe te kerel sekoja šukar buti.

11 A e terne udovicen ma čhiv ko spisako, soske keda lengere seksualna želbe ka oven lenge považna taro Hristos, ola ka mangen te ženinen pe. 12 Ola ka anen peske osuda, soske otkažingje pe tari vera koja so sine len ko početok.* 13 Hem sikljona te oven mrzale hem te phiren taro jekh kher ko javer kher. Hem na samo so sikljona te oven mrzale, nego ogovorinena da hem mešinena pe e javerenge ko bukja hem kerena lafi bašo adava so na valjani. 14 Adaleske mangava o terne udovice te ženinen pe, te ovel len čhave, te grižinen pe bašo pumaro kher te šaj te na den prilika okolenge so protivinena pe te vakeren nešto lošno amendar. 15 Čače, nesave više mukhle o šukar drumo hem gele palo Satana. 16 Ako jekhe džuvlja, koja soj verniko, isi la ki familija udovice, neka grižinel pe lenge oj, agjaar nane te oven ko teret e sobranieske. Tegani o sobranie ka šaj te pomožinel okole udovicenge so nane koj te pomožinel len.*

17 A e starešinenge, kola so predvodinena ko jekh šukar način, sikaven lenge pobaro poštovanje, posebno okolenge kola so but trudinena pe te vakeren hem te sikaven bašo e Devleskoro lafi. 18 Soske, ko Spisija pišinela: „Ma phan o muj e guruveskoro džikote lea odvinea o giv taro steblo“, a isto agjaar pišinela: „O rabotniko zaslužinela te dobinel pli plata“. 19 Na valjani te kere ništo ako šunea kaj nekoj krivinela jekhe starešina, osven ako adava tano potvrdimo taro duj ili trin svedokija. 20 Okolen so kerena grevo, ukorin len anglo sarine hem adava neka ovel sar predupreduvanje e javerenge da.* 21 Zapovedinava tuke anglo Devel, anglo Hristos Isus hem anglo birime angelija, te ikere tut ko akala upatstvija bizo predrasude hem bizo te deline e manušen.*

22 Nikogaš ma sigjar te čhive tle vasta upri nekaste,* ni ma ov učesniko ko javerengere grevija. Ponadari da ačhov čisto.

23 Ma pi više pani,* nego pi hari mol bašo tlo želudniko hem bašo adava so često sian nasvalo.

24 Nesave manušengere grevija džanena len sarine hem ola odma ovena osudime, a javerengere grevija ikljona ko megdani pokasno. 25 Agjaar o šukar da bukja so kerena pe džanena len sarine, a te na džanen len da, našti te garaven pe.

6 Okola soj tane robija, ponadari da celo vilea te poštujnen pumare gospodaren, te šaj nikogaš te na kerel pe lošno lafi bašo e Gospodareskoro anav hem bašo leskere sikljojba. 2 Isto agjaar, o robija kolengere so gospodarija tane vernikija, ma te sikaven pumare gospodarenge pohari poštovanje samo adaleske soj tane phralja. Namesto adava, panda pošukar neka služinen lenge, soske okola kolen so isi len korist tari lengiri šukar buti tane vernikija hem lengere mangle phralja.

Ponadari da sikav akala bukja hem pottiknin len te keren akava. 3 Ako nekoj širinela javera sikljojba hem na soglasinela pe e korisna* lafencar taro amaro Gospodari o Isus Hristos, ili adava so sikavela na ohrabrinela te služinel pe e Devleske celo vilea, 4 asavko manuš tano gordo hem na haljovela ništo. Leskiri godi tani samo ko adava te akošel pe hem te rasprajnel pe bašo lafija. Akala bukja ingarena dži ki zavist, ko akošibe, ko klevetibe* hem ko sumnje. 5 Isto agjaar kerena okolen so isi len rumimi godi hem so mukhle o čačipe, stalno te rasprajnen pe bašo sitnice. Ola mangena te služinen e Devleske samo te šaj te dobinen nešto. 6 Točno tano kaj ako nekoj služinela celo vilea e Devleske hem tano zadovolno adalea so isi le, ka dobinel but. 7 Soske, amen ništo na angjem ko sveto, ni našti ništo te ingara lestar. 8 Znači ako isi amen hajbaske hem urajbaske,* te ova zadovolna akale bukjencar.

9 Ama okola soj tane rešime te barvaljoven, perena ko iskušenie hem ki zamka, ko but nerazumna hem štetna želbe, kola so ingarena e manušen ko uništibe hem ki propast. 10 Soske, o mangipe sprema o pare anela dži ko razna štetna bukja. Adava sebepi nesave sine hovavde hem cidingje pe tari vera hem agjaar angje peske but dukha.

11 A tu, kova so sian sluga e Devleskoro, naš taro akala bukja. Namesto adava, de tutar sa te sikave pravednost, te služine e Devleske celo vilea, te sikave vera, mangipe, istrajnost, hem krotkost. 12 Borin tut ki šukar borba baši vera, cvrsto iker tut ko večno životo koleske so sian vikimo hem koleske so šukar svedočingjan anglo but svedokija.

13 Anglo Devel, kova so ikerela ko životo sa, hem anglo Hristos Isus, kova so otvoreno hem šukar svedočingja anglo Pontij Pilat, zapovedinava tuke 14 te ikere tut ko zapovedija, hem džikote kerea adava ačhov čisto hem bizo nikoj te krivinel tut bašo nešto, sa džikote na pojavinela pe amaro Gospodari o Isus Hristos. 15 Akava srekjno hem mokjno vladeteli ka sikavel pe keda ka avel vreme bašo adava. Ov tano o Cari e carengoro hem o Gospodari e gospodarengoro, 16 o edinstveno kova so našti te merel, kova so živinela ko than soj tano doborom svetlo hem slavno so nikoj našti te khuvel, kole so nijekh manuš na dikhlja ni našti te dikhel. Neka ovel leske dendi čest hem leskiri mokj neka ačhovel zasekogaš! Amin.

17 Okolenge soj barvale ko akava sveto* zapovedin te na oven čalmdžie hem te na nadinen pe ko barvalipe so nane sigurno, nego ko Devel kova so darežlivo dela amen sa o bukja kolende so uživinaja. 18 Vaker lenge te keren šukaripe, te oven barvale ko keribe šukar bukja, te oven darežliva hem te oven spremna te delinen e javerencar adava so isi len. 19 Agjaar ka kheden peske barvalipe soj tano šukar temeli baši idnina, te šaj cvrsto te ikeren pe ko čačutno životo.

20 Timotej, arakh adava soj tuke dendo* taro Devel, hem cide tut taro razgovorija so nane korisna,* so na sikavena poštovanje sprema adava soj sveto, hem cide tut taro idee kola so avena taro manuša so mislinena kaj džanena, ama adava so ola džanena tano sprotivno taro adava soj čače. 21 Adaleske so dičinena pe adalea so isi len asavke idee, nesave cidingje pe tari vera.

O Devel neka sikavel tumenge plo šukaripe so na zaslužinaja le.