DUJTO PISMO DŽI KO TIMOTEJ

1 Me o Pavle, kova so sium apostoli e Hristos Isuseskoro sprema e Devleskiri volja te šaj te objavinav o vetuvanje bašo životo kova so šaj te dobinel pe preku o Hristos Isus, 2 pišinava akava pismo dži ko Timotej, mlo manglo čhavo:

Neka ovel tut o šukaripe so na zaslužinaja le, i milost hem o mir taro Devel, o Dad, hem taro Hristos Isus amaro Gospodari.

3 Blagodarno sium e Devleske, koleske so služinava sar mle parapapija, hem džikote kerava adava isi man čisto sovest hem nikogaš na bistrava te spomninav tut džikote molinava man e Devleske taro vilo dive hem rat. 4 Keda setinava man ko tle asva, edvaj adžikerava te dikhav tut hem mlo vilo te phergjol radost. 5 Soske, setinava man ki tli iskreno vera, savi so sine najangle tle baba e Loida hem tle daja e Evnika, a uverimo sium kaj asavki vera isi tute da.

6 Adaleske, setinkerava tut revno te koristine* e Devleskoro poklon kova so primingjan le keda čhivgjum mle vasta upri tute. 7 Soske, i sila koja so dela amen o Devel na kerela amen darutne, nego kerela amen silna, kerela te sikava mangipe hem kerela ispravno te razmislina. 8 Adaleske ma ladža, ni taro adava te svedočine bašo amaro Gospodari, a ni mandar, kova so sium phanlo leskoro sebepi. Namesto adava, ov spremno tu da te trpine nevolje bašo šukar haberi hem neka ovel tut doverba kaj o Devel ka del tut sila te izdržine. 9 Ov spasingja amen hem vikingja amen te ova sveta, ama adava na kergja le sebepi o bukja so amen kergjem, nego sebepi pli namera hem plo šukaripe so na zaslužinaja le. O Devel panda but angleder odlučingja te sikavel amenge akava šukaripe preku o Hristos Isus. 10 E Devleskoro šukaripe so na zaslužinaja le akana jasno dikhaja le keda pojavingja pe amaro Spasiteli o Hristos Isus, kova so čhinavgja o meribe hem otkringja amenge preku o šukar haberi sar te ovel amen životo hem telo kova so na raspadinela pe. 11 Te šaj te objavinel pe adava šukar haberi, me sium čhivdo sar propovedniko, apostoli hem učiteli.

12 Adava sebepi cidava muke, ama na ladžava, soske džanava e Devle koleste so verujngjum hem uverimo sium kaj ov šaj te arakhel adava so dengjum le ko poverenje, sa džikote na avela adava dive. 13 Ko sa neka oven tuke sar primer o korisna* lafija kola so šungjan len mandar hem ponadari da sikav vera hem mangipe sar manuš soj ko jekhipe e Hristos Isusea. 14 Arakh akala skapocena bukja so dobingjan len agjaar so ka pomožinel tuke e Devleskiri sila* koja soj ki amende.

15 Džanea kaj sa o manuša tari azisko provincija* mukhle man, a maškar lende sine o Figel hem o Ermogen da. 16 O Gospodari neka sikavel milost e Onisiforeske hem leskere kherutnenge, soske but puti ohrabringja man hem na ladžandilo taro adava so sium phanlo ko sindžirija. 17 Namesto adava, keda sine ko Rim, trudingja pe but džikote rodela man sine hem arakhlja man. 18 O Gospodari o Jehova* neka sikavel leske milost ko adava dive. Tu but šukar džanea ov sa so kergja baši mande ko Efes.

2 A tu mo čhavo, ponadari da le sila taro šukaripe so na zaslužinaja le, kova so sikavela le o Hristos Isus. 2 Adava so šungjan mandar hem so potvrdingje le but svedokija, bašo adala bukja sikav* e verna manušen kola so palo adava ka oven sposobna te sikaven e javeren. 3 Sar šukar vojniko e Hristos Isuseskoro, ov spremno te cide muke. 4 Nijekh vojniko nane zafatimo te zarabotinel pare,* soske mangela te kerel i volja adaleskiri so lelja le te ovel vojniko. 5 Isto agjaar, keda nekoj natprevarinela pe ki trka,* nane te dobinel i nagrada* ako na ikerela pe ko pravilija. 6 O zemjodelco kova so naporno kerela buti, mora te ovel o prvo so ka uživinel ko plodija tari pli niva. 7 Sekogaš razmislin bašo adava so vakerava tuke. O Gospodari ka pomožinel tuke te haljove sa o bukja.

8 Ma bistre kaj o Isus Hristos sine voskresnimo taro mule hem kaj sine e Davideskoro potomco,* adava tano o šukar haberi kova so propovedinava. 9 Sebepi adava haberi trpinava muke hem čak sium phanlo ko sindžirija sar jekh kriminalco. Ama, e Devleskoro lafi nane phanlo ko sindžirija. 10 Adaleske sa trpinava sebepi okolengoro soj birime taro Devel, te šaj ola da te oven spasime adaleske soj tane ko jekhipe e Hristos Isusea hem te dobinen večno slava. 11 Akava so vakerava tano čače: ako mulem lea, lea ka živina da. 12 Ako ponadari da istrajnaja, amen da ka vladina lea sar carija. Ako vakeraja kaj na pendžaraja le, ov da ka vakerel kaj na pendžarela amen. 13 Ako amen na siem verna, ov ačhola verno, soske ov našti te džal protiv peste.

14 Setinker e javeren ko akava hem anglo Devel sikav len* te na akošen pe bašo lafija, soske taro adava nane nisavi korist, nego samo kerela šteta* okolenge so šunena adava. 15 De tutar sa te šaj te odobrinel tut o Devel, te ove rabotniko kova so nane sostar te ladžal, kova so ispravno koristinela o lafi e čačipaskoro. 16 Ama cide tut taro lafija so nane korisna,* so na sikavena poštovanje sprema adava soj sveto, soske adala lafija ka ciden e manuše sa podur hem podur taro Devel, 17 hem ka širinen pe sar gangrena. O Imenej hem o Filet tane maškar okola so širinena asavke lafija. 18 Ola cidingje pe taro čačipe soske vakerena kaj o manuša više voskresningje, hem agjaar uništingje nesavengiri vera. 19 Sepak, e Devleskoro temeli ačhola cvrsto hem na mrdinela taro than, ki leste sar pečati tane pišime akala lafija: „O Jehova* džanela adalen soj tane leskere“ hem „Okola so vikinena e Jehovaskoro* anav neka mukhen o bukja so nane pravedna“.

20 Ko jekh baro kher nane samo zlatna hem srebrena čare, nego isi kaštunale hem phuvjale čare da. Hem nesave tane čare so koristinena pe bašo bukja kolenge so dela pe čest,* a nesave bašo bukja kolenge so na dela pe čest.* 21 Adaleske, koj cidela pe taro manuša soj tane sar o čare so koristinena pe bašo bukja kolenge so na dela pe čest, ka ovel čaro so koristinela pe bašo bukja kolenge so dela pe čest, ka ovel sveto, ka ovel korisno ple sopstvenikoske hem ka ovel spremno te kerel sekoja šukar buti. 22 Adaleske, naš taro želbe e ternipaskere, a de tutar sa te sikave pravednost, vera, mangipe hem mir, zaedno okolencar kola so taro čisto vilo vikinena e Gospodare.

23 Hem cide tut taro glupava diskusie kolendar so nane nisavi korist, soske džanea kaj lendar ovela akošibe. 24 A o robo e Gospodareskoro na valjani te akošel pe, nego valjani te ovel ljubezno* sarinencar, sposobno te sikavel e javeren, strplivo keda trpinela lošnipe, 25 krotko džikote sikavela okolen soj tane buntovna, soske šaj o Devel ka pomožinel lenge te kainen pe* hem šukar te pendžaren o čačipe, 26 pa agjaar ka šaj te osvestinen pe hem te našen tari e Bengeskiri stapica, soske ka haljoven kaj astargja len dživde te šaj te keren adava so ov mangela.

3 A akava džan le: ko posledna dive ka ovel but pharo vreme. 2 Soske, o manuša ka mangen korkori pes, ka mangen o pare, ka oven čalmdžie, ka ikeren pe ko baripe, ka keren lafi protiv o Devel hem protiv o javera manuša, nane te šunen ple roditelen, nane te oven blagodarna, nane te oven verna, 3 nane te mangen ple familija, nane te oven spremna bašo bilo savo dogovor, klevetnikija,* nane te kontrolirinen pe, surova, nane te mangen o šukaripe, 4 predavnikija, inačie, gorda, ka mangen o zadovolstvija, a na e Devle, 5 ka dikhjon sar te phene služinena e Devleske, ama nane te živinen agjaar. Asavkendar naš! 6 Maškar lende tane hem okola murša so džandipaja khuvena ko khera hem zarobinena e džuvlen kolen so lokheste šaj te hovaven len hem kola soj pherde grevija, kola soj vodime taro razna želbe, 7 kola so sekogaš sikljona, ama nisar našti šukar te pendžaren o čačipe.

8 Sar o Janij hem o Jamvrij so protivingje pe e Mojseeske, agjaar akala manuša protivinena pe e čačipaske. Lengiri godi tani celosno rumimi hem o Devel len na odobrinela len adaleske so na živinena sprema i vera. 9 Ama ola nane te džan but dur, soske sarine jasno ka dikhen lengoro delinipe, sar so jasno dikhlja pe o delinipe okole duje muršengoro. 10 Tu cvrsto ikergjan tut ko mlo sikljojbe hem šukar džanea mlo način sar živinava, džanea mli cel, mli vera, mli strplivost, mlo mangipe, mli istrajnost. 11 Tu džanea savo progonstvo hem save muke cidingjum ki Antiohija, ki Ikonija hem ki Listra. Me istrajngjum ko akala progonstvija hem o Gospodari spasingja man taro sa akava. 12 Ustvari, sarine so mangena te živinen ko jekhipe e Hristos Isusea hem te obožavinen e Devle, ka oven progonime. 13 A o lošna hem o hovavne manuša ka oven taro lošna ko pološna. Ka hovaven e javeren hem korkori ola ka oven hovavde.

14 A tu ponadari da iker tut ko bukja so sikliljan len hem kolende so uveringjan tut, soske džanea koj sikavgja tut akala bukja 15 hem setin tut kaj panda taro tiknipe pendžarea o Sveta spisija kola so šaj te keren tut mudro te šaj te ove spasimo preku i vera ko Hristos Isus. 16 Sa soj tano pišimo ko Spisija avela taro Devel hem korisno tano te sikavel, te pomožinel te haljovel pe soj tano pogrešno, te isprajnel sa o bukja, te vospitinel te šaj te kerel pe sa adava soj pravedno, 17 te šaj e Devleskoro sluga te ovel sposobno hem spremno baši sekoja šukar buti.

4 Anglo Devel hem anglo Hristos Isus, kova so ka sudinel e dživdenge hem e mulenge keda ka pojavinel pe hem keda ka vladinel sar Cari ko plo Carstvo, zapovedinava tuke akava: 2 propovedin e Devleskoro lafi hem ker le adava itno, ko šukar vreme hem ko pharo vreme. Ukorin, strogo predupredin, pottiknin, hem džikote kerea adava ov strplivo hem ov sar jekh šukar učiteli. 3 Soske, ka avel vreme keda o manuša nane te trpinen o ispravno* sikljojbe, nego ka džan palo ple želbe hem ka kheden peske učitelija kola so ka vakeren lenge samo adava so ola ka mangen te šunen. 4 Ola ka čhinaven te šunen o čačipa, a ka šunen o hovavne paramisa. 5 A tu ponadari da razmislin trezveno ko sa, istrajn keda doživinea lošnipe, propovedin o šukar haberi hem celosno ker tli služba.

6 Soske, me više dava man sar žrtva so čhorela pe hem alo paše o vreme te ovav oslobodimo. 7 Boringjum man ki šukar borba, prastandiljum i trka dži ko krajo, ačhiljum verno e Devleske. 8 Akana o Gospodari so sudinela pravedno, cidingja mange ki strana kruna koja so dela pe okolenge soj tane pravedna. Ov ka del man adaja kruna sar nagrada ko adava dive hem nane te del la samo mange, nego sa okolenge so edvaj adžikerena ov te pojavinel pe.

9 Ker sa so šaj posigate te ave ki mande. 10 Soske, o Dimas mukhlja man, adaleske so zamanglja akava sveto* hem gelo ko Solun. O Kriskent gelo ki Galatija, a o Tit ki Dalmacija. 11 Samo o Luka tano mancar. Keda ka ave, le e Marko da tuja, soske ov pomožinela mange but ki služba. 12 A e Tihike bičhalgjum le ko Efes. 13 Keda ka ave, ana mange i nametka so mukhljum la ko Karp ki Troada, a ana mange hem o svitokija,* posebno o pergamentija.*

14 O kovači o Aleksandar, kergja mange but lošnipe. O Jehova* ka iranel leske sprema leskere postapke. 15 Tu da arakh tut lestar, soske ov but protivingja pe amare habereske.

16 Keda o prvo puti braningjum man anglo vlastija nikoj na alo te poddržinel man, nego sarine mukhle man. O Devel neka prostinel lenge bašo adava. 17 Ama, o Gospodari sine uzi mande hem pomožingja man, te šaj preku mande celosno te propovedinel pe o šukar haberi hem o manuša taro sa o narodija te šunen bašo akava haberi. Hem sium sine spasimo taro e lavengoro muj. 18 O Gospodari ka spasinel man taro sekova lošnipe hem ka arakhel man bašo plo nebesno Carstvo. Ov neka ovel slavimo zasekogaš! Amin.

19 Pozdravin e Priska hem lakere rome e Akila, hem e Onisifore hem leskere kherutnen.

20 O Erast ačhilo ko Korint, a e Trofime mukhljum le ko Milet soske nasvalilo. 21 Ker sa so šaj te rese angleder o even.

Pozdravinena tut o Euvul, o Puden, o Lin, i Klaudija hem sa o phralja.

22 O Gospodari neka ovel tuja adaleske so isi tut ispravno stavi. Leskoro šukaripe so na zaslužinaja le neka ovel tumencar.