PISMO DŽI KO TIT

1 Me o Pavle, sium robo e Devleskoro hem apostoli e Isus Hristoseskoro. Mli služba tani sprema i vera savi so isi okolen so o Devel biringja hem sprema adava so šukar pendžarava o čačipe kova so sikavela sar te ovel pe verno e Devleske ko sa. 2 Hem sa akava temelinela pe ki nadež bašo večno životo. O Devel, kova so našti te hovavel, vetingja akava panda but angleder. 3 A ko vreme so ov odredingja le, objavingja plo lafi preku o propovedibe o šukar haberi, kova so sine dendo* mange sprema i zapoved amare Spasiteleskiri, e Devleskiri. 4 Pišinava akava pismo dži ko Tit, kova soj mange sar čačutno čhavo kolea so isi amen jekh isto vera:

Neka ovel tut o šukaripe so na zaslužinaja le hem o mir taro Devel, o Dad, hem taro Hristos Isus, amaro Spasiteli.

5 Mukhljum tut ko Krit te šaj te sredine o bukja so valjani te isprajnen pe hem te čhive starešine ki sekoja diz sprema o upatstvija so dengjum tut. 6 Sekova jekh lendar mora te ovel manuš koleske so našti te vakerel pe kaj tano krivo bašo nešto, so isi le samo jekh romni, so isi le čhave soj vernikija hem kola so nane pendžarde sar raspuštena ili buntovna. 7 Soske, sar upraviteli taro Devel, jekh nadgledniko mora te ovel manuš koleske so našti te vakerel pe kaj tano krivo bašo nešto, kova so na mangela sa te ovel sprema leskoro, so na holjanela sigate, so nane pijanica, ni nasilno,* ni te ovel alčno manuš kova so ko nečesno način dikhela te ovel le korist, 8 nego valjani te ovel gostoprimlivo, te mangel o šukaripe, ispravno te razmislinel, te ovel pravedno, verno, te ovel le samokontrola, 9 cvrsto te ikerel pe ko čačutno lafi taro Devel ko plo način sar sikavela, te šaj te ohrabrinel e javeren agjaar so ka sikavel len korisna* bukja hem te ukorinel okolen so kerena lafi protiv adala korisna* sikljojba.

10 Soske, isi but manuša soj tane buntovna, so vakerena bukja so nane korisna hem so prevarinena, a posebno okola so vakerena kaj mora te ovel pe suneti. 11 Mora te phandel pe lengoro muj, soske asavke manuša uništinena celo familiengiri vera agjaar so sikavena bašo bukja soj tane pogrešna, samo te šaj ko nečesno način te dobinen nešto. 12 Jekh manuš taro Krit, proroko taro lengoro narodo, vakergja: „O manuša taro Krit sekogaš hovavena, ola tane opasna zverija hem mrzale manuša so but mangena te han“.

13 Akala lafija čače tane, adaleske strogo ukorin len te šaj lengiri vera te ovel zorali 14 hem te na prifatinen o evrejska paramisa hem o zapovedija taro manuša kola so cidena pe taro čačipe. 15 E čista manušenge, sa o bukja tane čista, ama okola soj tane melale hem so nane len vera, lenge ništo nane čisto, soske lengiri godi hem lengiri sovest tane melale. 16 Ola anglo sarinende vakerena kaj džanena e Devle, ama lengere postapke sikavena kaj otkažingje pe lestar, soske ola tane odvratna, neposlušna hem nane odobrime te keren bilo savo šukaripe.

2 A tu ponadari da ker lafi sprema o sikljojbe soj tano korisno.* 2 O pophure murša neka oven uramnotežena ko sa, te zaslužinen e javerengoro poštovanje,* ispravno neka razmislinen, neka oven zorale ki vera, pherde mangipaja hem istrajna. 3 Isto agjaar, o pophure džuvlja neka ponašinen pe agjaar so ka sikaven kaj poštujnena e Devle, te na klevetinen,* te na ovel len navika te pien but mol* hem neka sikaven e javeren bašo adava soj šukar, 4 te šaj te sikaven e poterne džuvlen te mangen pumare romen, te mangen pumare čhaven, 5 ispravno te razmislinen, te oven česna, domakjice, te oven šukar, te oven podložna pumare romenge, te šaj te na vakerel pe ništo lošno bašo e Devleskoro lafi.

6 Isto agjaar, pottiknin e poterne muršen ispravno te razmislinen, 7 a korkori tu ov primer ko sa, agjaar so ka kere šukar bukja. Sikav e javeren bašo adava soj čisto, zrelo razmislin,* 8 vaker lafija so ka oven korisna, lafija kolenge so nane te kritikujnen tut, te šaj okola so protivinena pe te oven ladžakerde, soske nane te ovel len ništo lošno te vakeren baši amenge. 9 Okola soj robija neka oven podložna ple gospodarenge ko sa hem neka ugodinen lenge, te na iranen lenge lafija, 10 te na čoren taro pumare gospodarija, nego ko sa neka sikaven kaj lengere gospodaren šaj te oven len doverba ki lende, te šaj ko sa te ukrasinen o sikljojba taro amaro Spasiteli, o Devel.

11 Soske, o Devel sikavgja plo šukaripe so na zaslužinaja le hem adava šukaripe anela spasenie različna manušenge. 12 Adava šukaripe sikavela amen te otfrlina sa adava so nane sprema e Devleskiri volja hem o želbe e svetoskere, hem te živina ko asavko način so ka sikava kaj ispravno razmislinaja, kaj siem pravedna hem kaj celo vilea služinaja e Devleske maškar ko avdisutno sveto,* 13 džikote adžikeraja te ispolninel pe amari but šuži nadež hem adžikeraja amaro mokjno Devel hem amaro Spasiteli, o Isus Hristos, te sikaven kobor tane bare.* 14 O Hristos dengja plo životo amenge te šaj te oslobodinel* amen tari sekoja postapka koja soj protiv o zakoni, hem čistingja amen te šaj te ova leskoro posebno narodo, hem agjaar te kera šukar bukja celo vilea.

15 A tu ponadari da sikav len bašo akala bukja, ohrabrin len hem ukorin len adaleske so dobingjan avtoriteti te kere adava. Nikoj te na dikhel ki tute sar potele pestar.

3 Ponadari da setinker e phralen te oven podložna hem poslušna e vladetelenge hem e vlastenge, te oven spremna baši sekoja šukar buti, 2 te na keren lošno lafi nikastar, te na oven kavgadžie, nego te oven razumna hem sekogaš neka oven krotka sa e manušencar. 3 Soske, amen da jekh vreme na siem sine razumna, na siem sine poslušna, siem sine hovavde taro javera, siem sine robija različna želbenge hem mangaja sine samo te uživina, siem sine lošna, zavidliva, odvratna hem mrzinaja amen sine jekh jekhea.

4 Ama keda o Devel, kova soj amaro Spasiteli, sikavgja plo šukaripe hem plo mangipe e manušenge, 5 ov spasingja amen, ama na baši amare pravedna postapke, nego adaleske so isi le milost. Ov spasingja amen keda čistingja* amen hem adalea kergja amen dživde, hem keda koristingja pli sila* te kerel amen neve. 6 O Devel but dengja amen tari pli sila* preku o Isus Hristos amaro Spasiteli, 7 te šaj, otkeda o Devel ka vakerel baši amenge kaj siem pravedna preku plo šukaripe so na zaslužinaja le, te ova naslednikija kola so nadinena pe ko večno životo.

8 Akala bukja soj vakerde tane čače, hem me mangava ponadari da tu te naglasine akala bukja, te šaj okola so verujngje ko Devel te koncentririnen pe ko adava te keren šukar bukja. Akala bukja tane šukar hem korisna e manušenge.

9 Izbegin glupava diskusie, istražibe o poteklo, raspravie hem akošibe bašo Zakoni, soske nane nisavi korist taro adava hem sa adava tano džabe. 10 A taro manuš so širinela hovavno sikajbe, otkeda ka predupredine le o prvo hem o dujto puti, cide tut lestar. 11 Soske, asavko manuš cidingja pe taro drumo hem grešinela, pa agjaar osudinela korkori pes.

12 Keda ka bičhalav ki tute e Artemase ili e Tihike, ker sa so šaj te ave ki mande ko Nikopol, soske odlučingjum adathe te nakhavav o even. 13 Grižin tut te šaj e Zina, kova so šukar pendžarela o Zakoni, hem e Apolo, te ovel len sa so valjanela lenge drumoske te šaj te na falinel lenge ništo. 14 A amare phralja neka sikljon te keren šukaripe, agjaar so ka pomožinen keda ka ovel potreba, te šaj te na oven bizo plodija ki pumari služba.

15 Pozdravinena tut sa okola soj mancar. Pozdravin okolen so mangena amen hem soj amare phralja ki vera.

E Devleskoro šukaripe so na zaslužinaja le neka ovel tumencar.