PISMO DŽI KO EVREIJA

1 Angleder but vreme o Devel kergja lafi amare parapaponcar preku o prorokija ko but prilike hem ko but načinija. 2 Ama akana, ko krajo taro akala dive, ov kergja amencar lafi preku plo Čhavo kole so čhivgja le sar nasledniko, koleske so ka pripadinel sa hem preku koleste so stvoringja o sveto.* 3 Ki leste dikhjola e Devleskiri slava hem ov točno sikavela amenge savo tano o Devel, hem preku o mokjno lafi ov kerela sa o bukja ponadari da te postojnen. Otkeda čistingja amen taro amare grevija, ov bešlja tari desno strana e Najbareskiri ko nebo. 4 Hem ov ulo doborom pobaro taro angelija so dobingja anav* soj tano pobaro taro lengere anava.

5 Na primer, kole angeleske o Devel nekogaš vakergja: „Tu sian mlo čhavo, avdive me uljum tlo dad“? Ili: „Me ka ovav leske dad, hem ov ka ovel mange čhavo“? 6 Ama bašo vreme keda ov palem ka bičhalel ple Prvobijame ki phuv, ov vakerela: „Neka pokloninen pe leske sa e Devleskere angelija“.

7 Osven adava, bašo angelija vakerela: „Ple angelen kerela len silna sar bavlal,* hem ple slugen kerela len sar jaga“. 8 A bašo Čhavo vakerela: „O Devel tano tlo prestol zasekogaš, hem i palka* taro tlo Carstvo tani i palka baši pravda.* 9 Tu mangljan i pravednost hem mrzingjan o lošnipe. Adaleske o Devel, tlo Devel, pomazingja* tut masloja hem dengja tut pobari radost taro tle amala“.* 10 Isto agjaar vakerela: „Gospodare, tu ko početok čhivgjan o temelija e phuvjakere, hem o nebo kergjan le tle vastencar. 11 Ola nane te postojnen više, a tu ka ačhove. Ka purangjoven sar šeja, 12 hem tu ka pakjare len sar nametka, hem ka oven zamenime. Ama tu nikogaš na meninea tut, hem tle beršenge nane krajo“.

13 Ama kaske taro angelija ov nekogaš vakergja: „Beš tari mli desno strana sa džikote na čhivava tle dušmanen telo tle pre“? 14 Nane li sa o angelija duhija so služinena e Devleske? Zarem o Devel na zapovedinela lenge te pomožinen okolenge so ka oven spasime?

2 Adaleske mora pošukar te razmislina bašo bukja so šungjem te šaj nikogaš te na cida amen tari vera. 2 Soske, ako o lafi* so sine vakerdo preku o angelija, dokažingja pe kaj tano sigurno hem agjaar sekoja greška hem neposlušno postapka sine pravedno kaznimi, 3 tegani sar šaj amen te naša tari kazna ako nane amenge važno asavko baro spasenie? Bašo adava spasenie prvo vakergja amaro Gospodari hem baši leste potvrdingje amenge okola so šungje le lestar. 4 Hem o Devel preku znakija, preku čudija, preku razna mokjna delija hem adalea so delingja o poklonija tari pli sila* sprema pli volja, sikavgja* kaj adava so vakergje sine čače.

5 Soske, o Devel na čhivgja e angelen te vladinen e svetoja kova so valjani te avel hem koleske so amen keraja lafi. 6 Jekh manuš, jekh puti pišingja: „Soj tano o manuš pa te misline ki leste, ili o manušikano čhavo pa te grižine tut leske? 7 Kergjan le hari potele taro angelija, dengjan le slava hem čest hem čhivgjan le upro bukja kola so kergjan len tle vastencar. 8 Sa čhivgjan telo leskere pre“. O Devel mukhlja ov te vladinel upro sa hem agjaar na ačhilo ništo upro kova so ov na vladinela. Ama akana panda na dikhaja kaj ov vladinela upro sa. 9 Ama dikhaja kaj e Isuseske, kova so sine kerdo hari potele taro angelija, dendi leske slava hem čest adaleske so cidingja muke dži ko meribe. Ov preku e Devleskoro šukaripe so na zaslužinaja le mulo sekole manušeske.

10 Sa o bukja postojnena te šaj te ovel slavimo o Devel hem ola postojnena preku leste. Adaleske, te šaj te del bute čhavenge slava, e Devleske sine ispravno o Vodači preku kaste so ka oven spasime, te cidel muke te šaj agjaar te kerel le sovršeno. 11 E Isuse hem okolen kas so ov kergja te oven sveta isi len jekh dad. Adaleske, ov na ladžala te vakerel kaj ola tane leskere phralja, 12 keda vakerela: „Ka vakerav tlo anav mle phralenge, gilencar ka falinav tut maškar o khedimo narodo“.* 13 Hem isto agjaar vakerela: „Ka ovel man doverba ki leste“. Hem vakerela akava da: „Ake, me hem o čhave so dengja man o Jehova“.*

14 Ama adaleske so adala „čhave“ tane manuša taro rat hem mas, ov da ulo manuš taro rat hem mas, te šaj ple meribaja te uništinel okole kole so isi le mokj te anel meribe, a adava tano o Beng. 15 Hem te šaj te oslobodinel sa okolen kola so, adaleske so darana sine taro meribe, celo životo sine ko ropstvo. 16 Soske, čače ov na alo te pomožinel e angelenge, nego alo te pomožinel e Avraameskere potomconge.* 17 Adaleske ov mora sine te ovel sar ple „phralja“ ko sa, te šaj te ovel milostivo hem verno prvosvešteniko ki služba e Devleske, te šaj bašo e manušengere grevija te del žrtva koja so ka smirinel len e Devlea. 18 Adaleske so ov cidingja muke keda sine iskušimo, ov šaj te pomožinel okolenge soj tane iskušime.

3 Adaleske phraljalen, kola so sien sveta hem kola so sien vikime te džan ko nebo, šukar razmislinen bašo Isus kole so priznajnaja le sar apostoli hem sar prvosvešteniko. 2 Ov sine verno e Devleske kova so čhivgja le ki adaja položba, isto sar so sine o Mojsej džikote služinela sine ko celo kher e Devleskoro. 3 Soske, o Isus zaslužinela pobari slava taro Mojsej, isto sar so zaslužinela pobari čest o graditeli taro kher kova so gradingja le. 4 Džangjola pe, sekova kher nekoj kergja le, a okova so kergja sa tano o Devel. 5 O Mojsej sine verno sar sluga ko celo e Devleskoro kher hem leskiri služba sikavela sine* adava so valjani sine te ovel objavimo pokasno. 6 Ama o Hristos sine verno sar Čhavo soj čhivdo upro e Devleskoro kher. Amen siem e Devleskoro kher ako dži ko krajo hrabro* keraja lafi hem cvrsto ikeraja amen ki nadež kolaja so dičinaja amen.

7 Soske, sar so sine vakerdo preku e Devleskiri sila:* „Ako šunena leskoro glaso avdive, 8 ma keren tumare vile zorale, sar so kergje tumare parapapija keda but holjankergje man ko dive keda iskušingje man ki pustina, 9 kote so iskušingje man hem ispitingje man, iako 40 berš dikhle sa adava so kergjum. 10 Adaleske počmingjum te gadonav man tari adaja generacija hem vakergjum: ’Ko plo vilo ola sekogaš cidena pe taro drumo hem na pendžargje mle drumija‘. 11 Adaleske haljum sovli ki mli holi: ’Ola nane te khuven ko mlo odmor‘“.

12 Pazinen tumen, phraljalen, nekoj tumendar te na cidel pe dur taro Devel hem agjaar te ovel le lošno vilo koleste so nane vera. 13 Namesto adava, ponadari da ohrabrinen tumen jekh jekhea sekova dive, sa džikote panda trajnela o dive koleske so vakeraja „avdive“, te šaj nijekheskoro vilo te na ovel zoralo taro grevo kole so isi le mokj te hovavel. 14 Soske, amen da ka dobina adava so dobingja o Hristos samo ako dži ko krajo arakhaja amari doverba koja so sine amen ko početok, 15 sar so sine vakerdo: „Ako šunena leskoro glaso avdive, ma keren tumare vile zorale, sar so kergje tumare parapapija keda but holjankergje man“.

16 Soske, koj sine adala so šungje e Devleskoro glaso, a sepak but holjankergje le? Na sine li sa adala so iklile taro Egipet keda vodingja len o Mojsej? 17 Isto agjaar, kastar o Devel gadongja pe 40 berš? Na sine li taro okola so grešingje hem mule ki pustina? 18 Hem kaske halja sovli kaj nane te khuven ko leskoro odmor? Nane li adalenge so na sine poslušna? 19 Znači, dikhaja kaj ola našti sine te khuven adaleske so na sine len vera.

4 Adaleske so o vetuvanje te khuvel pe ko leskoro odmor panda ačhola, sekoj amendar valjani te pazinel* te na ovel taro okola so na kergje sa so rodela pe te šaj te dobinen akava vetuvanje. 2 Soske, amenge da sine vakerdo o šukar haberi isto sar amare parapaponge. Ama lenge na koristingja adava, soske len na sine i isto vera sar so sine okolen so sine poslušna. 3 A amen kola so verujnaja, khuvaja ko leskoro odmor, a baši lende vakergja: „Hava sovli ki mli holi: ’Ola nane te khuven ko mlo odmor‘“, iako ov panda taro početok e svetoskoro počmingja te odmorinel otkeda završingja e stvoribaja. 4 Soske, ko jekh than bašo eftato dive vakergja akava: „Hem ko eftato dive o Devel odmoringja taro sa adava so stvoringja“, 5 hem ov palem vakerela: „Ola nane te khuven ko mlo odmor“.

6 Okola so sine o prva so šungje o šukar haberi, na khuvgje ko leskoro odmor adaleske so na sine poslušna. Ama isi panda prilika e manušenge te khuven ko e Devleskoro odmor, 7 adaleske palo but vreme ko psalm so sine pišimo taro David, o Devel vakergja akava: „Ako šunena leskoro glaso avdive, ma keren tumare vile zorale“. Ov palem odredingja dive baši koleske so vakerela „avdive“. 8 Soske, ako o Isus Navin ingargja e Izraelcon ko adava odmor, palo adava o Devel nane sine te kerel lafi bašo nesavo javer dive. 9 Znači, e Devleskere narodoske ačhola o odmor sar ko sabat. 10 Soske, okova so khuvgja ko e Devleskoro odmor, odmorinela pe taro bukja so kergja, isto sar o Devel so odmorinela taro bukja so stvoringja.

11 Adaleske, te da sa amendar te khuva ko adava odmor te šaj nikoj amendar te na džal palo primer okolengoro so na sine poslušna. 12 Soske, e Devleskoro lafi tano dživdo hem silno, pooštro tano taro mači so čhinela taro solduj strane hem khuvela doborom hor andre ko manuš so otkrinela savo tano ov andral* hem savo tano avrijaldan,* hem khuvela doborom hor so odvojnela o kokala tari lengiri srž, hem šaj te otkrinel save tane o misle hem o namere e vileskere. 13 Na postojnela ništo soj tano garavdo taro Devel, nego sa o bukja tane otkrime hem pučarde anglo jakhja okoleskere kova so ka sudinel amen bašo bukja so keraja.

14 Adaleske so isi amen baro prvosvešteniko kova so gelo ko nebo, o Isus, e Devleskoro Čhavo, ponadari da te vakera baši amari vera ki leste. 15 Soske, amaro prvosvešteniko nane nekoj so našti te haljovel amare slabostija, nego ov da sine iskušimo ko sa sar amende, ama na grešingja. 16 Adaleske, bizi dar te ava paše uzo prestol e Devleskoro kova so sikavela amenge plo šukaripe so na zaslužinaja le,* te šaj o Devel te sikavel amenge milost hem preku o šukaripe so na zaslužinaja le te pomožinel amen ko pravo vreme.

5 Soske, sekova manuš kova soj tano birimo te služinel sar prvosvešteniko, čhivdo tano te služinel e Devleske ki korist e javerenge te šaj te del e Devleske poklonija hem žrtve bašo grevija. 2 Ov šaj te sikavel sočuvstvo okolenge so grešinena bizo te oven svesna bašo adava, soske džanela kaj le da isi le slabostija, 3 hem adaleske ov mora te del žrtve bašo ple da grevija sar so dela žrtve bašo e manušengere grevija.

4 Nijekh manuš na dela peske asavki čest korkori, nego o Devel kova so čhivela le ki asavki služba, sar so čhivgja e Arone. 5 Agjaar o Hristos da, na dengja pe korkori slava adalea so ulo prvosvešteniko, nego dengja le slava o Devel kova so vakergja leske: „Tu sian mlo čhavo, avdive me uljum tlo dad“. 6 A ko javer than ko Spisija vakerela: „Tu sian svešteniko sar o Melhisedek hem tu ka ove svešteniko zasekogaš“.

7 Džikote sine ki phuv, o Hristos celo glasoja hem asvencar molinela pe sine taro vilo hem rodela sine pomoš taro Devel kova so šaj sine te spasinel le taro meribe, hem leskere molitve sine šunde, soske ov darala sine taro Devel. 8 Iako sine e Devleskoro Čhavo, ov siklilo te ovel poslušno taro adava so cidingja muke. 9 Otkeda sine kerdo te ovel sovršeno, sa okola soj leske poslušna, šaj te dobinen večno spasenie preku leste, 10 soske o Devel le čhivgja te ovel prvosvešteniko sar o Melhisedek.

11 Isi amen but te vakera baši leste, ama adava tano pharo te objasninel pe, soske tumen na trudinena tumen te haljon.* 12 Soske, iako dži akana tumen više valjani sine te oven učitelija, sepak panda valjani nekoj te sikavel tumen bašo osnovna bukja taro e Devleskoro sveto lafi. Ulen asavke kaske so palem valjani thud, a na zorali hrana. 13 Soske, sekoj so ponadari da piela thud, na pendžarela e Devleskoro lafi kova so sikavela amen soj ispravno, soske tano tikno čhavo. 14 Ama i zorali hrana tani e zrela manušenge kola so siklile te koristinen pumari sposobnost te razmislinen te šaj te razlikujnen soj ispravno, a soj pogrešno.

6 Adaleske akana, keda više verujnaja ko osnovna sikljojba bašo Hristos, te napredujna dži ki zrelost hem te na irana amen palem ko osnovna sikljojba,* sar soj: o kaibe bašo postapke kolendar so nane nisavi korist* hem i vera ko Devel, 2 o sikljojbe bašo krstibe hem o čhijbe vasta upri nekaste, o voskresenie taro mule hem o večna odluke so anela o Devel keda sudinela. 3 A ka napredujna dži ki zrelost ako pomožinela amen o Devel.

4 Soske, okolenge so dobingje i svetlina, so dobingje o poklon taro nebo hem isto agjaar e Devleskiri sila,* 5 so dobingje o šukar lafi e Devleskoro hem dikhle o blagoslovija* taro sveto* so ka avel, 6 a palo adava cidingje pe tari vera, našti te pomožinel pe lenge te iranen pe hem te kainen pe, soske ola korkori palem kovinena e Devleskere Čhave ko stubo hem ladžakerena le anglo sarinende. 7 Soske, o manuša tane sar i phuv. Keda i phuv priminela o pani taro bršim, kova so često perela ki late, adava tano blagoslov taro Devel. Tegani adava soj sadimo bajrola hem koristinela okolenge so kergje buti ki adaja phuv. 8 Ama, ako ki adaja phuv bajrona kare hem divo čar, tegani ka otfrlinel pe hem but sigate o Devel ka del la arman, hem ko krajo adaja phuv ka tharel pe.

9 Ama, iako amen keraja lafi ko asavko način, uverime siem, mangle phraljalen hem phenjalen, kaj tumen džana ko pošukar drumo taro okola so cidingje pe tari vera, soske adava drumo ingarela ko spasenie. 10 Soske, o Devel nane nepravedno, pa te bistrel adava so kergjen hem o mangipe so sikavgjen leskere anaveske, agjaar so služingjen adalenge soj sveta* hem ponadari da služinena lenge. 11 Ama mangaja sekova jekh tumendar ponadari da but te trudinel pe, sar so kerela sine adava taro početok, te šaj dži ko krajo te oven sigurna kaj tumari nadež so adžikerena la, ka ispolninel pe, 12 te šaj te na oven mrzale, nego te oven sar okola so baši pli vera hem strplivost dobinena adava so sine lenge vetimo.

13 Soske, keda o Devel dengja o vetuvanje e Avraameske ov halja sovli upri peste, soske nane nikoj pobaro lestar te šaj te hal sovli upri leste, 14 hem vakergja: „Me sigurno ka blagoslovinav tut hem sigurno ka kerav te ovel baro tlo potomstvo“. 15 Agjaar o Avraam, otkeda sikavgja strplivost, dobingja akava vetuvanje. 16 Soske, o manuša hana sovli upri nekaste soj pobaro lendar, hem lengiri sovli tani garancija koja so čhivela krajo sekole raspravijake. 17 Isto agjaar, keda o Devel da manglja pojasno te sikavel okolenge so ka nasledinen o vetuvanje kaj leskiri namera na meninela pe, ov dengja garancija adalea so halja sovli. 18 Akala duj bukja* nane nikogaš te meninen pe hem o Devel našti te hovavel baši lende. Amen so našlem ko Devel te šaj ov te zaštitinel amen, akala bukja ohrabrinena amen cvrsto te ikera amen ki nadež soj angli amende. 19 Akaja nadež tani amare životoske* sar jekh sigurno hem cvrsto kotva* hem oj ingarela amen te khuva pali zavesa.* 20 O Isus khuvgja adathe angleder amende, agjaar phravgja hem spremingja o drumo amenge. Ov ulo zasekogaš prvosvešteniko sar o Melhisedek.

7 Soske, adava Melhisedek, kova so sine cari ko Salim hem svešteniko e Najbare Devleskoro, iklilo anglo Avraam keda ov iranela pe sine otkeda pobedingja e caren, hem blagoslovingja le, 2 a o Avraam dengja le* desetok taro sa. Leskoro anav, Melhisedek, značinela „Pravedno Cari“, a isto agjaar ov tano cari taro Salim, so značinela „Cari so anela mir“. 3 Na džangjola pe koj tano leskoro dad hem koj tani leskiri daj. Nigde na pišinela kotar avela, keda bijandilo hem keda mulo. Ama, adaleske so ov ulo slično sar e Devleskoro Čhavo, ačhola svešteniko zasekogaš.

4 Dikhen samo kobor baro sine o manuš koleske so amaro parapapo,* o Avraam, dengja desetok* taro barvalipe so lelja ple dušmanendar ki borba. 5 Točno tano kaj, sprema o Zakoni, e Leviskere čhave, soj birime te služinen sar sveštenikija, isi len zapoved te kheden desetok* taro narodo, ustvari taro pumare phralja, iako ola da tane e Avraameskere potomcija. 6 Ama o Melhisedek, kova so na sine potomco e Leviskoro, lelja desetok taro Avraam hem blagoslovingja okole koleske so o Devel dengja vetuvanje. 7 Sarine džanaja kaj okova so dela o blagoslov tano pobaro taro okova so dobinela o blagoslov. 8 O levitija kola so dobinena desetok tane manuša so merena, a akava manuš so dobingja desetok o Spisija svedočinena kaj živinela. 9 Čak šaj te vakerel pe kaj preku o Avraam, isto agjaar o Levi da, kova so priminela desetok, platingja o desetok, 10 soske ov panda na bijandilo sar potomco ple parapaposke e Avraameske keda o Melhisedek iklilo anglo Avraam.

11 Znači, ako o manuša šaj sine te dobinen sovršenstvo preku i svešteničko služba e Leviskere čhavengiri (soske, adava sine jekh delo taro Zakoni so sine dendo e narodoske), tegani soske sine potrebno te pojavinel pe jekh javer svešteniko koleske so vakerela pe kaj tano sar o Melhisedek, a na sar o Aron? 12 Adaleske so meninela pe i svešteničko služba, mora te meninel pe o Zakoni da. 13 Soske, o manuš koleske so vakerena pe akala bukja avela sine taro javer pleme hem nikoj taro adava pleme na služingja ko žrtveniko. 14 Soske, jasno tano kaj amaro Gospodari avela taro e Judaskoro pleme, a o Mojsej nikogaš na vakergja kaj taro adava pleme ka aven o sveštenikija.

15 Hem akava ulo panda pojasno keda pojavingja pe javer svešteniko kova soj sar o Melhisedek. 16 Ov služinela sar svešteniko, na adaleske so avela taro pleme kova so rodela o Zakoni, nego adaleske so isi le i sila koja so dela le životo so našti te uništinel pe. 17 Soske, baši leste ko jekh than ko Spisija pišinela: „Tu sian svešteniko sar o Melhisedek hem tu ka ove svešteniko zasekogaš“.

18 Znači, i zapoved so sine angleder na važinela više, soske tani slabo hem nane korisno. 19 Soske, o Zakoni na kergja ništo te ovel sovršeno, nego adava kergja le i pošukar nadež koja so dela amen o Devel hem koja so kerela te ova popaše lea. 20 Osven adava, adaleske so o Devel halja sovli keda čhivgja e Isuse sar prvosvešteniko 21 (soske, isi manuša so ule sveštenikija bizo o Devel te hal sovli baši lende, ama ov ulo svešteniko keda baši leste o Devel halja sovli hem vakergja: „O Jehova* halja sovli hem nane te perel pišmani: ’Tu ka ove svešteniko zasekogaš‘“), 22 o Isus ulo garancija bašo jekh pošukar sojuz.* 23 Osven adava, o sveštenikija sebepi o meribe našti sine te prodolžinen pumare službaja, adaleske javera ale lenge ko than hem prodolžingje adale službaja. 24 A ov živinela zasekogaš hem adaleske nikoj nane te lel leskoro than ki svešteničko služba. 25 Adaleske ov šaj celosno te spasinel okolen so molinena e Devle ko leskoro anav. Ov šaj te spasinel len soske sekogaš tano dživdo te molinel e Devle te pomožinel lenge.

26 Soske, asavko prvosvešteniko valjani amenge: kova soj verno, so nane le lošnipe ki peste, soj čisto, soj odvojmo taro grešnikija hem soj vazdimo poupre taro nebo. 27 Različno taro javera prvosveštenikija, ov na valjani sekova dive te del žrtva, prvo bašo ple grevija hem palo adava bašo e narodongere grevija, soske ov adava kergja jekh puti hem zasekogaš keda dengja pe pes sar žrtva. 28 Soske, preku o Zakoni, manuša soj tane grešnikija tane čhivde sar prvosveštenikija, ama otkeda o Devel dengja amen adava Zakoni, ov halja sovli kaj sar prvosvešteniko ka čhivel ple Čhave, kova so sine kerdo te ovel sovršeno zasekogaš.

8 I glavno misla taro adava so vakeraja tani akaja: amen isi amen asavko prvosvešteniko kova so bešlja ki desno strana taro e Najbareskoro prestol ko nebo. 2 Ov tano sluga kova so služinela ko sveto than hem ko čačutno šatori kova so vazdingja le o Jehova,* a na manuš. 3 Soske, sekova prvosvešteniko sine čhivdo te del poklonija hem žrtve. Adaleske sine potrebno e Isuse da te ovel le nešto so te del. 4 Te ovel sine ov ki phuv na bi ovela sine svešteniko, soske više isi sveštenikija kola so dena poklonija sprema o Zakoni. 5 Akala manuša služinena e Devleske ko than kova soj slika hem senka taro bukja soj ko nebo, sar so sikavela i zapoved so dengja o Devel e Mojseeske keda valjani sine te kerel o šatori: „Dikh te kere sa sprema o plani kova so sine tuke sikavdo ki planina“. 6 Ama akana o Isus dobingja jekh pošukar služba, soske o sojuz* da baši koleske so ulo posredniko tano pošukar hem tano zakonski utvrdimo preku o pošukar vetuvanja.

7 Soske, te na falinel sine ništo e prvo sojuzeske, nane sine te valjanel o dujto. 8 Soske, o Devel ukorinela ple narodo keda vakerela: „’Ake, ka aven dive‘, vakerela o Jehova,* ’keda ka kerav nevo sojuz e manušencar taro Izrael hem e manušencar tari Juda. 9 Adava nane te ovel sar o sojuz so kergjum le lengere parapaponcar ko dive keda astargjum len taro vas te ikalav len tari egipetsko phuv, soske ola na ačhile ko mlo sojuz, hem adaleske me čhinavgjum te grižinav man lenge‘, vakerela o Jehova.*

10 ’Soske, o sojuz so ka kerav le e manušencar taro Izrael palo adala dive tano akava‘, vakerela o Jehova.* ’Ka čhivav mle zakonija ki lengiri godi hem ka pišinav len ko lengere vile. Hem me ka ovav lengoro Devel, a ola ka oven mlo narodo.

11 Hem nikoj više nane te sikavel e javere taro plo narodo, ni ple phrale, adalea so ka vakerel: „Pendžaren e Jehova!“* Soske, sarine ka pendžaren man, taro najtikno dži ko najbaro. 12 Soske, me ka prostinav lenge bašo lengere nepravedna postapke hem nane više te setinav man ko lengere grevija‘“.

13 Keda vakerela „nevo sojuz“, ov o prethodno sojuz kerela le purano. Adava soj purano hem so phujrola, panda hari ka našavgjovel.

9 O sojuz so sine angleder, sine le zakonija sar te kerel pe sveto služba e Devleske hem sine le plo sveto than ki phuv. 2 Sine kerdo šatori hem ki prvo prostorija taro adava šatori sine o svetilniko hem o astali upri koleste so sine o mare kola so sine dende sar žrtva anglo Devel. Adaja prostorija vikinela pe sine Sveto prostorija. 3 A pali dujto zavesa ko šatori, sine prostorija so vikinela pe sine Najsveto prostorija. 4 Ki adaja prostorija sine o zlatno kadilniko,* o sanduko e sojuzeskoro, kova so sine celosno obložimo zlatoja, ki leste sine o zlatno čaro manaja, e Aroneskoro kaš kova so cutongja hem o ploče taro bar e Devleskere zakonencar.* 5 A upro sanduko sine o but šuže heruvimija,* kola so ple senkaja učharena sine o kapako e smiribaskoro.* Ama akana nane o vreme te kerel pe podetalno lafi bašo adava.

6 Otkeda sa akava agjaar tano kerdo, o sveštenikija stalno khuvena ki prvo prostorija taro šatori te keren pumari sveto služba e Devleske. 7 Ama ki dujto prostorija khuvela samo o prvosvešteniko jekh puti ko berš, hem na khuvela bizo rat, kova so dela le sar žrtva bašo ple grevija hem bašo grevija e narodoskere kola so kergje len bizo te oven svesna bašo adava. 8 Agjaar e Devleskiri sila* jasno sikavela kaj o drumo dži ko sveto than panda na sine phravdo džikote postojnela sine o prvo šatori. 9 Akava šatori pretstavinela o bukja so slučinena pe ko avdisutno vreme hem sikavela kaj o poklonija hem o žrtve so panda dena pe, našti te keren sovršeno čisto i sovest okoleskiri so kerela sveto služba e Devleske. 10 Adala poklonija hem žrtve tane povrzime samo hajbaja, pijbaja hem različno čistibaja* sprema e Mojseeskoro zakoni. Sa akala bukja so rodela len sine o Zakoni sine samo bašo telesna bukja hem važinena sine sa dži ko vreme kova so sine odredimo te anel pe sa ko redo.

11 Ama, keda alo o Hristos sar prvosvešteniko hem kergja te oven amen o blagoslovija kola so isi amen akana, ov nakhlja taro pobaro hem posovršeno šatori kova so nane kerdo taro manušikane vasta hem kova so na arakhljola ki phuv. 12 Ov khuvgja ko sveto than, jekh puti hem zasekogaš, ama na e ratea taro juncija hem buznja, nego ple ratea hem agjaar kergja te ova večno oslobodime.* 13 Soske, ako o rat e buznjengoro, e juncongoro hem o pravo e terne gurumnjengoro kerela sveto okolen soj nečista, pa agjaar lengoro telo ovela čisto, 14 tegani kobor poviše o rat e Hristoseskoro, kova so preku e Devleskiri večno sila* koja so vlijajngja upri leste dengja pes sar sovršeno žrtva e Devleske, ka kerel čisto amari sovest taro postapke kola so nane korisna te šaj te kera sveto služba e dživde Devleske.

15 Adaleske o Hristos tano o posredniko* e neve sojuzeskoro te šaj te dobinen o vetuvanje bašo večno nasledstvo sa okola soj vikime. Ov mulo te šaj preku i otkupnina te oven oslobodime taro grevija so sine kerde telo purano sojuz. 16 Soske, keda kerela pe sojuz e Devlea, o manuš preku kaste so kergja pe adava sojuz, mora te merel. 17 Adaleske so o sojuz počminela te važinel čak palo meribe, o sojuz na važinela sa džikote tano dživdo o manuš preku kaste so kergja pe o sojuz. 18 Sprema akava, čak ni o sojuz so sine angleder na počmingja te važinel bizo rat. 19 Soske, keda o Mojsej anglo celo narodo vakergja o zapovedija taro Zakoni, lelja rat taro juncija hem taro buznja, mešingja len panjea, lelja loli volna hem phanlja la ki pračka taro isop,* topingja la ko rat hem lea prskingja o lil* e sojuzeskoro hem celo narodo, 20 hem vakergja: „Akava tano o rat kova so kerela o sojuz e Devlea te važinel hem o Devel mangela te ikeren tumen ko akava sojuz“. 21 Palo adava, e ratea prskingja o šatori hem sa o predmetija so koristinena len sine baši sveto služba. 22 Spored o Zakoni, e ratea skoro sa šaj te kerel pe čisto hem bizo te čhorel pe rat našti te prostinen pe o grevija.

23 Adaleske valjani sine o bukja kola so pretstavinena adava soj ko nebo te čistinen pe ko asavko način, a bašo bukja soj ko nebo valjanena but pošukar žrtve taro akala žrtve. 24 Soske, o Hristos na khuvgja ko sveto than kerdo taro manušikane vasta, kova so pretstavinela o čačutno sveto than, nego khuvgja ko nebo te šaj akana te pojavinel pe anglo Devel baši amende. 25 Hem ov na kergja adava te šaj poviše puti te del pe sar žrtva, sar o prvosvešteniko so khuvela sekova berš ko sveto than e ratea so nane leskoro. 26 Keda bi o Hristos kerela sine agjaar, tegani ov taro početok e svetoskoro ka cidel sine but puti muke. Ama akana, ko krajo taro akava sveto,* ov alo jekh puti zasekogaš te cidel o grevo. 27 Isto sar o manuša so jekh puti mora te meren, a palo adava te sudinel pe lenge, 28 agjaar o Hristos jekh puti zasekogaš dengja pes sar žrtva te šaj te lel* o grevija bute manušengere. A keda o dujto puti ka pojavinel pe, ov nane te pojavinel pe te šaj palem te cidel o grevo, nego ka pojavinel pe te spasinel okolen so edvaj adžikerena le.

10 Adaleske so ko Zakoni arakhaja samo i senka taro blagoslovija so valjani te aven, ama na hem o blagoslovija, o sveštenikija našti nikogaš adale ista žrtvencar, kola so dena len sekova berš, te keren sovršena e manušen kola so mangena te aven paše uzo Devel. 2 Inače, bi čhinavela pe sine te den pe žrtve, soske okola so služinena e Devleske bi ovena sine čista jekh puti zasekogaš hem lengiri sovest više na bi mučinela len sine bašo grevija. 3 Tari javer strana, akala žrtve setinkerena e manušen sekova berš kaj tane grešna, 4 soske o rat e juncongoro hem e buznjengoro našti te cidel o grevija.

5 Adaleske o Hristos keda alo ko sveto vakergja e Devleske: „’Životinska žrtve hem javera žrtve tu na mangljan, nego spremingjan mange telo. 6 Na sine tuke ki volja o žrtve so tharena pe hem o žrtve bašo grevo‘. 7 Tegani vakergjum: ’Ake, me aljum (ko svitok* baši mande pišinela) te kerav tli volja, o Devla‘“. 8 Prvo vakerela: „Na mangljan hem na sine tuke ki volja o životinska žrtve hem o javera žrtve, o žrtve so tharena pe hem o žrtve bašo grevo“, a adala tane žrtve kola so dena pe sprema o Zakoni. 9 A palo adava, vakerela: „Ake, aljum te kerav tli volja“. Ov čhinavgja o prvo te šaj te počminel te važinel o dujto. 10 Adale „voljaja“ siem sine kerde sveta preku e Isus Hristoseskoro telo kova so sine dendo sar žrtva jekh puti zasekogaš.

11 Isto agjaar, sekova svešteniko, dive palo dive, avela ko plo than te šaj te kerel pli sveto služba hem često dela o ista žrtve, kola so nikogaš našti celosno te ciden o grevija e manušengere. 12 Ama o Hristos dengja zasekogaš jekh žrtva bašo grevija hem bešlja tari desno strana e Devleskiri, 13 pa taro adava momenti adžikerela leskere dušmanja te oven čhivde telo leskere pre. 14 Soske, adalea so dengja jekh žrtva ov kergja te oven zasekogaš sovršena okola soj tane kerde sveta. 15 Osven adava, e Devleskiri sila* da uverinela amen ko akava, soske prvo vakerela: 16 „’Akava tano o sojuz so ka kerav lencar palo adala dive‘, vakerela o Jehova.* ’Mle zakonija ka čhivav len ko lengoro vilo hem ka pišinav len ki lengiri godi‘“. 17 A palo adava vakerela: „Više nane te setinav man ko lengere grevija hem ko lengere lošna postapke“. 18 A keda o Devel prostinela o grevija, više na valjani te den pe žrtve bašo grevija.

19 Znači phraljalen, adaleske so preku e Isuseskoro rat amen isi amen celosno doverba kaj šaj te khuva ko sveto than, 20 preku jekh nevo hem dživdo drumo, kova so phravgja le amenge ov adalea so nakhlja tari zavesa,* a adaja zavesa tani leskoro telo, 21 hem adaleske so isi amen baro svešteniko čhivdo te ovel odgovorno e Devleske ko kher, 22 te ava anglo Devel iskreno vilea hem zorale veraja, soske amare vile tane čistime* tari nečisto sovest hem amaro telo tano thovdo e čisto panjea. 23 Istrajno te vakera e javerenge baši amari nadež bizo te sumnina amen, soske okova so dengja o vetuvanje tano verno. 24 Hem te razmislina* jekh jekheske te šaj te pottiknina amen te sikava mangipe hem te kera šukaripe. 25 Te na mukha amare sostanokija sar nesave so kerena, nego te ohrabrina amen jekh jekhea, sa poviše kobor so dikhena kaj avela popaše o dive.

26 Soske, ako namerno grešinaja otkeda šukar pendžargjem o čačipe, tegani na postojnela javer žrtva bašo amare grevija, 27 nego adžikerela amen i strašno kazna hem i holi so thabljola sar jag koja so ka gltinel okolen so protivinena pe. 28 O manuš so phagela e Mojseeskoro zakoni, hem bašo adava potvrdinena duj ili trin svedokija, kazninela pe meribaja, bizo te sikavel pe leske milost. 29 Tegani zamislinen kobor pophari kazna zaslužinela okova so gazinela e Devleskere Čhave, hem so mislinela kaj o rat e sojuzeskoro, kova so kergja le te ovel sveto, nane le nisavi vrednost hem kova so vredžinela e Devleskere sila* koja so ov dela amen adaleske so sikavela amenge plo šukaripe so na zaslužinaja le. 30 Soske, amen džanaja kaj o Devel vakergja: „I odmazda tani mli, me ka iranav lenge“, hem isto agjaar vakergja: „O Jehova* ka sudinel ple narodoske“. 31 Strašno tano te dobina kazna taro dživdo Devel.

32 Setinen tumen ko purane dive kolende so, otkeda zapoznajngjen o čačipe, izdržingjen ki phari borba hem ko muke. 33 Ponekogaš tumen sien sine ikalde anglo javera* te šaj te asan tumenge hem te ciden muke, a ponekogaš pomožingjen okolenge* kola so doživingje asavko nešto. 34 Soske, tumen sikavgjen sočuvstvo okolenge so sine phanle ko zatvor hem na našavgjen tumari radost keda lele tumendar tumaro imot, soske džanena kaj isi tumen nasledstvo soj tano pošukar hem ka ačhol zasekogaš.

35 Adaleske, ma čhinaven hrabro* te keren lafi, soske adava anela bari nagrada. 36 Tumenge valjani istrajnost, te šaj otkeda kergjen adava soj sprema e Devleskiri volja, te dobinen adava soj tano vetimo. 37 Soske, „samo panda hari“ hem „ka resel okova so avela hem nane te kasninel“. 38 „O pravedniko ka živinel adaleske so isi le vera“, ama „ako cidela pe, nane te ovel sprema mli volja“. 39 Amen na siem adalendar so tari dar cidena pe taro Devel hem džana ko uništuvanje, nego adalendar so isi len vera hem spasinena plo životo.

11 I vera tani te ovel pe silno uverimo kaj ka slučinel pe adava ko so nadinaja amen, oj tani jasno dokaz kaj čače postojnela adava so na dikhela pe. 2 Adaleske so o manuša taro purano vreme sine len vera, o Devel sikavgja lenge kaj tane leske ki volja.

3 Veraja haljovaja kaj celo sveto* sine stvorimo* e Devleskere lafea. Agjaar o Devel koristingja adava so našti te dikha, te šaj te kerel adava so šaj te dikha.

4 Veraja o Abel dengja e Devleske žrtva koja so sine povredno tari e Kaineskiri. Baši adaja vera o Devel sikavgja leske kaj tano pravedno, soske o Devel prifatingja leskiri žrtva hem iako tano mulo, sebepi pli vera, ov panda kerela lafi.

5 Veraja o Enoh sine ingardo te šaj te na cidel muke keda ka merel hem nikoj našti sine te arakhel le, soske o Devel ingargja le. Ama angleder te ovel ingardo, o Devel sikavgja leske kaj tano leske ki volja. 6 A bizi vera našti te ugodina e Devleske, soske okova so mangela te avel paše dži leste mora te verujnel kaj ov postojnela hem kaj nagradinela okolen so revno rodena le.

7 Veraja o Noe, otkeda o Devel predupredingja le bašo adava so panda na dikhela pe sine, sikavgja kaj darala taro Devel hem kergja arka te šaj te spasinel ple familija. Adale veraja ov osudingja o sveto hem nasledingja i pravednost, koja so avela tari vera.

8 Veraja o Avraam, keda o Devel vikingja le, sine poslušno hem gelo ko than so valjangja te dobinel le sar nasledstvo. Ov gelo bizo te džanel kote džala. 9 Veraja o Avraam živingja sar stranco ki vetimi phuv, sar ko duripe. Hem živingja ko šatorija e Isakoja hem e Jakovea kolenge so o Devel isto agjaar vetingja kaj ka del len adaja phuv. 10 Soske, ov adžikergja i diz so isi la čačutne temelija, koja so kergja la hem gradingja la o Devel.

11 Veraja i Sara da ačhili khamni,* iako nakhlja lakoro vreme te bijanel, soske verujngja kaj okova so dengja la o vetuvanje tano verno. 12 Adaleske, taro jekh manuš, kole so više našti sine te oven le čhave,* bijandile but manuša, kobor so isi zvezde ko nebo hem našti sine te gejnen pe, sar i pošik ko morsko brego.

13 Sa akala manuša ačhile verna dži ko meribe, iako na dobingje adava so sine lenge vetimo, nego dikhle le adava duraldan hem radujngje pe leske hem angli sarinende vakerena sine kaj ola tane strancija hem privremena žitelija ki phuv kote so živinena sine. 14 Soske, okola so kerena lafi ko asavko način, jasno sikavena kaj ola revnosno rodena than kova so ka ovel lengoro. 15 A te mislinen sine baši i phuv kotar so iklile, bi arakhena sine prilika te iranen pe adari. 16 Ama akana ola but mangena jekh pošukar than, than kova so avela taro nebo. Adaleske, o Devel na ladžala ola te vikinen le plo Devel, soske čak spremingja lenge diz.

17 Veraja o Avraam, keda o Devel iskušingja le, sar te phene više dengja e Isako sar žrtva. O manuš kova so dobingja o vetuvanja kolenge so radujngja pe, sine spremno te del sar žrtva ple edinstveno bijame čhave, 18 iako sine leske vakerdo: „Okola so ka aven taro Isak, lenge ka vakerel pe kaj tane tlo potomstvo“.* 19 Ama ov džanlja kaj o Devel šaj čak te vazdel leskere čhave taro mule, hem adathar da leskoro čhavo irangja pe leske, a adava sikavgja so ka slučinel pe ki idnina.

20 Isto agjaar, o Isak da veraja blagoslovingja e Jakove hem e Isave adalea so vakergja lenge so ka ovel ki idnina.

21 Veraja o Jakov, angleder te merel, blagoslovingja e Josifeskere solduje čhaven hem pokloningja pe e Devleske džikote ikerela pe sine ko plo kaš.

22 Veraja o Josif, angleder te merel, vakergja bašo e Izraelcongoro ikljojbe taro Egipet hem zapovedingja so te keren leskere kokaloncar.

23 Veraja e Mojseeskere roditelija garavgje le trin masek otkeda bijandilo, soske dikhle kaj o čhavo tano šužo hem na darandile tari e careskiri zapoved. 24 Veraja o Mojsej, keda barilo, odbingja te vikinen le čhavo e faraoneskere čhajakoro, 25 hem biringja te ovel mučimo e Devleskere narodoja, a na te uživinel ko grešna zadovolstvija so nakhena. 26 Ov kergja adava, soske i ladž so trpingja sar birimo* taro Devel sine leske povredno taro celo egipetsko barvalipe, soske dikhlja ki nagrada so ka dobinel. 27 Veraja mukhlja o Egipet, ama na kergja adava adaleske so darala sine tari e careskiri holi, soske ov sine istrajno sar te phene dikhela e Devle kole so nikoj našti te dikhel le. 28 Veraja slavingja i Pasha* hem prskingja o udara ratea, te šaj e Devleskoro angeli te na mudarel* lengere prvobijame čhaven.

29 Veraja o Izraelcija nakhle taro Crveno More sar te phene phirena ki šuki phuv, ama keda o Egipkjanja probingje te nakhen, tasavdile.

30 Veraja pele o zidija taro Erihon otkeda efta dive o narodo phirgja okolu lende. 31 Veraja i nemoralno džuvli* i Raav na muli zaedno okolencar kola so na sine poslušna e Devleske, soske oj šukar primingja e špionen.

32 Hem so te vakerav panda? Nane te ovel man dovolno vreme ako počminava te kerav lafi bašo Gedeon, o Varak, o Samson, o Jeftaj, o David hem bašo Samoil hem o javera prorokija. 33 Ola veraja pobedingje carstvija, kergje adava soj pravedno, dobingje vetuvanja, phanle e lavengere muja, 34 ačhavgje i sila e jagakiri, našle taro oštro mači, dobingje sila keda sine slaba, ule hrabra ki vojna hem paldingje e vojska so napadingja len. 35 O džuvlja preku o voskresenie dobingje pumare manglen so mule, a javera sine mučime dži ko meribe, ama na otkažingje pe tari pumari vera samo te šaj te oven oslobodime, soske mangle te dobinen jekh pošukar voskresenie. 36 Javera palem, sine iskušime agjaar so asana sine lenge, sine kamšikujme, hem čak poviše taro adava, sine phanle ko sindžirija hem sine čhivde ko zatvor. 37 Sine mudarde barencar, iskušime, čhinde ko ekvaš pilaja, mudarde mačea, uravde ki bakhrani hem ki buznjani koža džikote sine ko čorolipe, ki nevolja hem džikote sine maltretirime. 38 Ola sine previše šukar bašo jekh asavko sveto. Živinena sine ko pustine hem ko planine, hem garavena pe sine ko peštere hem ko dupke teli phuv.

39 Iako o Devel, adaleske so sine len vera, sikavgja lenge kaj tane leske ki volja, sepak ola na dobingje adava so sine lenge vetimo, 40 soske e Devle sine le ki godi te del amen nešto but pošukar, te šaj ola te na oven kerde sovršena angleder amende.

12 Znači, adaleske so okolu amende isi doborom baro oblako taro svedokija, te frda amendar sekova tovar hem grevo kova so šaj lokheste te peravel amen, hem istrajno te prasta ki trka soj angli amende. 2 Džikote keraja adava, te na cida amare jakhja taro Isus kova soj Vodači amare verakoro hem okova soj birimo taro Devel te pomožinel amenge amari vera te ovel celosno. Baši radost so sine angli leste, trpingja muke ko stubo mučibaske* bizo te mislinel ki ladž, hem bešlja tari desno strana taro e Devleskoro prestol. 3 Znači, šukar razmislinen bašo primer okoleskoro so trpingja asavko protivibe taro muj e grešna manušengoro, kola so kerindor adava korkori pes osudingje, te šaj te na umorinen tumen hem te na otkažinen tumen.

4 Ki tumari borba protiv o grevo, tumen panda na boringjen tumen dži ko meribe. 5 A bistergjen o sovet so sine tumenge dendo sar jekh dad so dela sovet ple čhavenge: „Mo čhavo, ma dikh ko vospitibe* taro Jehova* sar nešto so nane važno hem ma otkažin tut keda ukorinela tut, 6 soske kas mangela o Jehova,* le vospitinela, kazninela* sekole jekhe so prifatinela le sar plo čhavo“.

7 Tumen trpinena adaleske so ko asavko način o Devel vospitinela tumen. O Devel postapinela tumencar sar jekh dad so postapinela ple čhavencar. A kova dad na vospitinela ple čhave? 8 Ama, ako o Devel na vospitinela tumen da sar so vospitinela e javeren, tegani tumen na sien leskere čhave, nego javereskere čhave. 9 Osven adava, amare telesna dada vospitinena amen sine hem amen poštujnaja len sine. Tegani, na valjani li poviše te ova poslušna amare nebesno Dadeske kova so vodinela amaro životo ple silaja.* Soske, ako keraja agjaar ka živina. 10 Soske, amare telesna dada vospitingje amen samo kratko vreme hem agjaar sar ola so mislingje kaj tano šukar, a o Devel vospitinela amen baši amari korist te šaj amen da te ova sveta sar soj tano ov. 11 Čače, keda nekoj dobinela ukor, ko momenti nane radosno, nego tažno, soske adava dukhala. Ama adava anela bari korist adalenge soj spremna te sikljon, hem palo adava, ola šaj te živinen pravedno hem te ovel len mir.

12 Adaleske, zojrakeren o umorna vasta hem o slaba kočaka, 13 hem ponadari da keren prava o drumija kolende so phirena tumare pre, te šaj o pro soj slabo te na šininel pe, nego te sasljol. 14 Trudinen tumen te oven ko mir sa e manušencar hem te oven sveta, soske bizo adava nijekh manuš ka našti te dikhel e Gospodare. 15 Šukar pazinen nijekh te na našavel e Devleskoro šukaripe so na zaslužinaja le hem te na pojavinel pe nesavo otrovno koreno kova so ka kerel šteta hem ka otrujnel bute dženen. 16 Hem pazinen maškar tumende te na ovel nekoj soj nemoralno* ili nekoj so na ceninela o sveta bukja, sar o Isav kova so jekhe hajbaske otkažingja pe taro ple pravija so sine le sar prvobijamo. 17 A džanena kaj palo adava, keda rodingja te dobinel o blagoslov, ov sine odbimo, iako asvencar molingja ple dade te meninel pli odluka, ov na uspejngja ko adava.

18 Soske, tumen na alen paše uzi planina koja so šaj te pipinel pe hem koja so thabljola ki jag, a ni uzo kalo oblako, i bari temnica hem i silno bavlal, 19 a ni ko than kote so šundilo o zvuko tari truba hem o glaso kova so kerela lafi taro nebo. Keda šungja adava glaso, o narodo molingja e Mojsee adava glaso više te na kerel lencar lafi. 20 Soske, ola darandile tari akaja zapoved: „Ako čak nesavo životno pipingja i planina, neka ovel mudardo barencar!“ 21 A adava so dikhle, sine doborom strašno so o Mojsej vakergja: „Darava hem tresinava“. 22 Ama tumen alen paše uzi planina Sion hem i diz e dživde Devleskiri, uzo nebesno Erusalim, hem uzo but* angelija 23 khedime ko jekh than, hem uzo sobranie e prvobijamengoro, kolengere so anava tane pišime upre ko nebo, uzo Devel kova soj Sudija sarinenge, uzo pravedna manuša kola so živinena sprema e Devleskiri sila* hem soj tane kerde sovršena, 24 uzo Isus, kova soj tano posredniko bašo nevo sojuz, hem uzo rat kova soj tano prskimo, so kerela lafi bašo pošukar bukja taro e Abeleskoro rat.

25 Pazinen te na oven neposlušna okoleske so kerela lafi. Soske, ako sine kaznime o manuša kola so na šungje okole so vakergja e Devleskere predupreduvanja ki phuv, tegani kobor poviše amen ka ova kaznime ako siem neposlušna okoleske so kerela lafi taro nebo. 26 Ko adava vreme leskoro glaso tresinkergja i phuv, a akana ov vetingja: „Panda jekh puti ka tresinkerav na samo i phuv nego hem o nebo“. 27 A o lafija „panda jekh puti“ značinena kaj ka ovel cidimo adava so šaj te tresinel pe, javere lafencar adava so na kergja le o Devel, te šaj te ačhol adava so našti te tresinel pe. 28 Adaleske so valjani te dobina o Carstvo kova so našti te tresinkerel pe, ponadari da te trudina amen te dobina e Devleskoro šukaripe kova so na zaslužinaja le, preku kova so šaj te služina e Devleske sprema leskiri volja, agjaar so ka sikava kaj daraja lestar hem kaj hor poštujnaja le. 29 Soske, amaro Devel tano jag so gltinela.

13 Ponadari da sikaven phralikano mangipe jekh jekheske. 2 Ma bistren te sikaven gostoprimlivost. Adaleske so sine gostoprimliva, nesave bizo te džanen primingje sar gostija angelen. 3 Mislinen ko okola soj ko zatvor,* sar te phene tumen da sien phanle lencar, hem mislinen ko okola soj maltretirime, soske tumen da sien manuša.* 4 Sarine valjani te poštujnen o brako, hem o rom hem i romni mora te oven verna jekh jekheske, soske o Devel ka sudinel okolenge so kerena nemoral* hem preljuba. 5 Ko tumaro životo te na ovel tumen mangipe sprema o pare, nego oven zadovolna adalea so isi tumen. Soske, ov vakergja: „Nikogaš nane te mukhav tut hem nikogaš nane te iranav tuke mlo dumo“. 6 Adaleske hrabro šaj te vakera: „O Jehova* tano mlo pomošniko, nane te darav. So šaj te kerel mange o manuš?“

7 Setinen tumen ko adala so predvodinena maškar tumende, kola so vakergje tumenge e Devleskoro lafi, džikote dikhena o šukar rezultatija taro lengoro način sar živinena, tumen da neka ovel tumen sar lengiri vera.

8 O Isus Hristos tano o isto erati hem avdive, hem zasekogaš.

9 Ma dozvolinen te hovaven tumen razna hem čudna sikljojba, soj tane pojaver taro adala so amen prifatingjem. Soske, pošukar tano e vileske te ovel zojrakerdo taro e Devleskoro šukaripe so na zaslužinaja le, nego taro pravilija bašo hajbe, kola so na koristinena ništo e manušenge kolenge so adala pravilija tane but važna.

10 Isi amen žrtveniko kolestar so nane len pravo te han okola kola so kerena sveto služba ko šatori. 11 Soske, o telo e životnengoro, kolengoro so rat o prvosvešteniko ingarela andre ko sveto than sar žrtva bašo grevija, tharela pe avrijal taro logori. 12 Adaleske o Isus da cidingja muke avrijal tari e dizjakiri porta, te šaj te kerel sveto e manušen ple ratea. 13 Adaleske amen da te dža ki leste avrijal taro logori, agjaar so ka trpina* i isto ladž sar so trpingja ov, 14 soske akate amen nane amen i diz so ka ačhol zasekogaš, nego edvaj adžikeraja i diz so valjani te avel. 15 Preku o Isus sekogaš te da e Devleske žrtva adalea so ka falina le, javere lafencar plodi taro amaro muj kova so objavinela leskoro anav. 16 Osven adava, ma bistren te keren šukaripe hem te delinen adava so isi tumen e javerencar, soske asavke žrtve mangela o Devel.

17 Oven poslušna adalenge so predvodinena maškar tumende hem oven lenge podložna, soske ola stalno grižinena pe baši tumende sar asavke so ka odgovorinen anglo Devel bašo adava, te šaj radosno te keren adava, a na pharipaja, soske adava bi ovela tumenge ki šteta.

18 Molinen tumen amenge, soske uverime siem kaj isi amen čisto* sovest, hem mangaja ko sa o bukja te ova česna. 19 Posebno pottikninava tumen te molinen tumen te šaj te iranav man ki tumende so šaj posigate.

20 O Devel kole so isi le mir hem kova so dela mir, kova so voskresningja taro mule e bare pastire e bakhrengoro, amare Gospodare e Isuse, kova so dengja rat bašo večno sojuz, 21 neka del tumen sa adava so valjani tumenge te šaj te keren leskiri volja hem preku o Isus Hristos ov neka pottikninel amen te kera adava soj leske ugodno. O Devel neka ovel slavimo zasekogaš! Amin.

22 Molinava tumen phraljalen, prifatinen akala ohrabruvačka lafija, soske sa akava pišingjum tumenge ko jekh kratko pismo. 23 Mangava te vakerav tumenge phraljalen, kaj amare phrale e Timotee oslobodingje le. Ako ov sigende avela, me ka avav lea ki tumende.

24 Pozdravinen sa okolen so predvodinena maškar tumende hem sa okolen soj sveta.* O phralja tari Italija pozdravinena tumen.

25 E Devleskoro šukaripe so na zaslužinaja le neka ovel sarinencar tumencar.