PISMO TARO JAKOV

1 Me o Jakov, robo e Devleskoro hem e Gospodareskoro e Isus Hristoseskoro, pozdravinava e dešuduje plemen soj tane rasturime ko sa o strane.

2 Mangle phraljalen, radujnen tumen but keda ka arakhljoven ko razna iskušenija, 3 soske džanena kaj adaleske so tumari vera tani ispitimi ko asavko način, adava kerela te oven istrajna. 4 Mukhen i istrajnost te ispolninel pli cel te šaj te oven celosna hem šukar ko sa o bukja, bizi nisavi maana.

5 Znači, ako nekaske tumendar falinela mudrost, ponadari da neka rodel taro Devel hem ov ka del le, soske ov dela darežlivo sarinenge hem bizo te rodel o greške. 6 Ama ponadari da veraja neka rodel sa o bukja hem ič te na sumninel pe, soske okova so sumninela pe tano sar morsko brani, kole so i bavlal ingarela le akari-okori. 7 Asavko manuš ma te mislinel kaj ka dobinel nešto taro Jehova.* 8 Soske, asavko manuš nane odlučno hem nane stabilno ko sa so kerela.

9 O čorolo phral neka radujnel pe* adaleske so o Devel akana čhivgja le ki pobari položba, 10 a o barvalo manuš valjani te radujnel pe so sikljola te ovel ponizno, soske o barvale nane više te postojnen, sar i luludi ko pole. 11 Soske, o kham keda ikljola, ple tatipaja kerela i luludi te šukjol, te perel hem oj našavela plo šužipe. Agjaar o barvalo manuš ka šukjol džikote prastala palo barvalipa.

12 Srekjno tano o manuš kova so istrajnela ko iskušenija. Soske, otkeda ka istrajnel, o Devel ka prifatinel le hem ka dobinel i nagrada, a adava tano o životo kova so o Jehova* vetingja le okolenge so mangena le. 13 Nijekh, keda ka ovel ko iskušenie, te na vakerel: „O Devel iskušinela man“. Soske, nijekh našti iskušinela e Devle lošnipaja, a ov da na iskušinela nikas lošnipaja. 14 Nego, sekova jekh tano iskušimo agjaar so cidela le hem hovavela le* leskiri želba. 15 Palo adava, keda i želba razvinela pe, bijanela grevo, a o grevo ko krajo anela meribe.

16 Mangle phraljalen, ma hovavgjoven. 17 Sekova šukar hem sovršeno poklon avela upraldan, taro Dad e nebesno svetlinakoro, kova so na meninela pe sar so meninela pe i senka. 18 Leskiri volja sine te bijanel amen preku o lafi e čačipaskoro te šaj te ova o prva plodija* taro adala kolen so stvoringja.

19 Džanen akava, mangle phraljalen: sekova manuš mora te ovel spremno te šunel, a te na sigjarel te kerel lafi hem te na holjanel sigate. 20 Soske, keda jekh manuš tano holjamo, ov na postapinela sprema e Devleskiri pravednost. 21 Adaleske, frden tumendar sekova melalipe hem lošnipe,* hem krotko prifatinen te sadinel pe ki tumende e Devleskoro lafi, kova so šaj te spasinel tumen.

22 Ama, ma šunen samo o lafi, nego hem postapinen sprema leste, te šaj te na hovaven korkori tumen. 23 Soske, ako nekoj šunela o lafi, a na postapinela sprema leste, tegani ov tano sar jekh manuš kova so dikhela plo muj ki ajna, 24 ama otkeda ka dikhel pe, džala peske hem odma bistrela savo tano. 25 A okova so dela pestar sa te haljol o sovršeno zakoni kova so dela sloboda hem ikerela pe ki leste, ov na bistrela adava so šungja, nego postapinela sprema leste. O manuš so kerela agjaar ka ovel srekjno.

26 Ako nekoj mislinela kaj obožavinela e Devle, ama na kontrolirinela pli čhib,* ov hovavela korkori pes* hem leskoro obožavibe na vredinela. 27 O obožavibe kova soj tano čisto hem bizo nisavo melalipe anglo amaro Devel hem Dad, tano akava: te grižine tut e čhavenge soj bizo roditelija hem e udovicenge ko lengere nevolje, hem te arakhe tut taro melalipe akale svetoskoro.

2 Phraljalen, zarem šaj te verujnen ko amaro slavno Gospodari o Isus Hristos, a ko isto vreme te delinen e manušen?* 2 Soske, ako ko tumaro sostanok avela manuš so phiravela zlatna angrustika hem skupa šeja, a avela hem čorolo manuš melale šeencar, 3 dali e manušeske so phiravela skupa šeja sikavena poviše poštovanje hem vakerena leske: „Tu beš akate ko šužo than“, a e čoroleske vakerena: „Tu tergjov ko pre“, ili: „Beš tele“? 4 Ako kerena agjaar, zarem na kerena razlike maškar tumende hem na ovena li sudie so anena nepravedna* odluke?

5 Šunen, mangle phraljalen. Zarem o Devel na biringja okolen so o sveto dikhela len sar čorole, te oven barvale ki vera hem te nasledinen o Carstvo kova so ov vetingja okolenge so mangena le? 6 Ama tumen ponižingjen e čorolen. Nane li o barvale adala kola so mučinena tumen hem vlečinena tumen anglo sudo? 7 Nane li ola adala kola so vredžinena o anav so anela tumenge čest, kova so dengja tumen o Devel? 8 Znači, ako tumen ikerena o carsko zakoni, sar so pišinela ko Spisija: „Mang tle pašutne sar korkori tut“, tegani šukar kerena. 9 Ama, ako ponadari da delinena e manušen,* tegani tumen grešinena hem o zakoni osudinela tumen sar grešnikija.

10 Soske, ako nekoj ikerela celo Zakoni, ama phagela samo jekh zapoved lestar, krivo tano sar te phene phaglja celo Zakoni. 11 Soske, okova so vakergja: „Ma ker preljuba“, isto vakergja: „Ma mudar“. Znači, ako na kerea preljuba, a mudarea, tu palem phagea o Zakoni. 12 Ponadari da keren lafi hem ponašinen tumen sar okola so ka oven sudime sprema o zakoni kova so dela sloboda e manušenge.* 13 Okova so na sikavela milost e javerenge, leske da ka ovel sudimo bizi milost. Soske, i milost tani pobari taro sudibe.

14 Phraljalen, savi korist isi ako nekoj vakerela kaj isi le vera, a na sikavela adava ko ple postapke? Šaj li asavki vera te spasinel le? 15 Ako nesave phrale ili phenja nane len so te uraven* hem nane len dovolno hajbaske soj lenge potrebno sekova dive, 16 a nekoj tumendar vakerela lenge: „Džan tumenge ko mir, takjoven hem čaljoven“, ama na dela len adava so valjani lenge živibaske, savi korist isi taro adava? 17 Agjaar tano e veraja da, ako na sikavela pe ko postapke, oj tani muli.

18 Ama nekoj šaj te vakerel: „Tut isi tut vera, a man isi man postapke so sikavena mli vera. Sikav mange tli vera bizo postapke, a me ka sikavav tuke mli vera preku mle postapke“. 19 Verujnea kaj isi jekh Devel, neli? Šukar kerea. Ama o demonija da verujnena hem tresinena. 20 Glupavo manušea, keda ka haljove kaj i vera bizo postapke tani džabe? 21 Zarem o Devel na vakergja amare dadeske e Avraameske kaj tano pravedno bašo leskere postapke otkeda ov ple čhave e Isako čhivgja le ko žrtveniko te del le sar žrtva? 22 Na dikhea li kaj leskiri vera sine povrzimi leskere postapkencar, hem kaj leskiri vera uli celosno* preku leskere postapke 23 hem ispolningje pe o lafija taro Spisija: „E Avraame sine le vera ko Jehova* hem adaleske ov dikhlja ki leste sar pravedno manuš“, hem sine vikimo e Jehovaskoro* amal.

24 Dikhena kaj o manuš ka ovel pravedno anglo Devel bašo ple postapke, a na samo baši pli vera. 25 Isto agjaar baši Raav, i nemoralno džuvli,* na vakergja li o Devel kaj tani pravedno sebepi lakere postapke, otkeda šukar primingja e špionen hem bičhalgja len taro javer drumo? 26 Znači, sar soj o telo bizo dišibe* mulo, agjaar i vera da bizo postapke tani muli.

3 Phraljalen, but džene maškar tumende na valjani te oven učitelija, soske džanena kaj amenge sar učitelija postrogo ka sudinel pe. 2 Soske, sarine amen but puti grešinaja. Ako nekoj na grešinela ko lafija, ov tano sovršeno manuš kova soj tano sposobno te kontrolirinel hem celo plo telo.* 3 Ako čhivaja e grastenge ko muj dizginja* te šaj te šunen amen, tegani amen upravinaja hem celo lengere teloja. 4 Dikhen hem o brodija, iako tane but bare hem o silna bavlala ingarena len, o manuš kova so upravinela e brodea šaj te ingarel o brodi kote ov so mangela preku jekh tikno kormilo.

5 Isto agjaar i čhib da tani jekh tikno delo taro telo, ama but falinela pe. Ake, čak jekh tikni jag šaj te tharel bari šuma. 6 I čhib da tani jag. Taro sa amare delija taro telo i čhib pretstavinela jekh sveto pherdo lošnipaja, soske oj meljarela celo telo hem uništinela celo životo e manušeskoro hem tharela sar i geena.* 7 Soske, sekova divo životno, sekoja ptica, sap ili gušteri hem morsko životno šaj te pitominel pe hem o manuša uspejngje te kontrolirinen len. 8 Ama nijekh manuš našti te pitominel i čhib. Pharo tano te kontrolirine la, kerela bari šteta hem pherdi tani otrovo so mudarela. 9 Amen koristinaja i čhib te falina e Jehova,* amare Dade, ama isto agjaar e čhibjaja daja arman e manušen kola soj stvorime „slična sar o Devel“. 10 Taro isto muj ikljola hem i falba hem i arman.

Phraljalen, na valjani agjaar te ovel. 11 Zarem taro isto izvor ikljola hem o gudlo hem o kjerko pani? 12 Phraljalen, šaj li i smokva te bijanel maslinke ili i drakh, smokve? Agjaar našti taro izvor londale panjea te ikljol gudlo pani.

13 Koj maškar tumende tano mudro hem razumno? Neka sikavel adava agjaar so šukar ka ponašinel pe hem agjaar so ko krotko način ka kerel sa o bukja. A adaja krotkost avela tari mudrost. 14 Ama ako ko tumare vile isi tumen bari ljubomora hem želba te akošen tumen,* ma falinen tumen baši tumari mudrost, soske ako kerena adava, tegani tumen hovavena. 15 Adaja mudrost na avela taro Devel kova soj ko nebo, nego tani taro akava sveto, oj tani telesno* hem demonsko. 16 Soske, kote so isi ljubomora hem akošibe,* adathe nane redo hem isi razna lošna bukja.

17 A o manuš so isi le i mudrost so avela taro Devel, kova soj ko nebo, najangle živinela životo soj tano čisto, osven adava mangela o mir, razumno tano, spremno tano te ovel poslušno, pherdo tano milost, kerela adava soj šukar,* na delinela e manušen,* nane licemerno. 18 A i pravednost sejnela pe keda isi mir hem lakoro plodi ka kheden le* okola so kerena te ovel mir.

4 Kotar avena o vojne hem o akošiba so isi maškar tumende? Na avena li taro tumare sebična želbe kola so borinena pe te kontrolirinen tumen?* 2 Mangena nešto, ama nane tumen. Mrzinena* e javeren hem mangena te len adava soj lengoro, ama sepak ništo na dobinena. Tumen akošena tumen hem vodinena vojne. A nane tumen, soske na rodena taro Devel. 3 A keda rodena, na dobinena, soske rodena taro pogrešna namere, te šaj te zadovolinen tumare sebična želbe.

4 Tumen so na sien verna e Devleske,* na džanena li kaj o amalipe e svetoja tano dušmanluko e Devlea? Adaleske, koj mangela te ovel amal e svetoja, ovela dušmani e Devleske. 5 Mislinena li kaj o Spisija džabe vakerena: „Amaro vilo* kova so čhivela amen te ova zavidliva kerela te ovel amen silno želba bašo različna bukja“? 6 Ama o šukaripe so na zaslužinaja le, kova so dela amen o Devel, tano pobaro tari amari zavist. Adaleske o Spisija vakerena: „O Devel protivinela pe okolenge soj gorda, a e ponizna manušenge sikavela šukaripe so na zaslužinela pe“.

7 Adaleske, oven podložna e Devleske, a protivinen tumen e Bengeske, hem ov ka našel tumendar. 8 Oven paše e Devlea, hem ov ka ovel paše tumencar. Tumen o grešnikija, thoven tumare vasta, tumen so na sien odlučna, čistinen tumare vile. 9 Žalinen, tugujnen hem roven. Ma asan više, nego tugujnen, ma radujnen tumen više, nego žalinen. 10 Ponizno podložinen tumen e Jehovaske* hem ov ka vazdel tumen.

11 Phraljalen, čhinaven te keren lafi protiv jekh jekheste. Koj kerela lafi protiv jekh phral ili sudinela ple phraleske, ov kerela lafi protiv o zakoni hem sudinela e zakoneske. A ako sudinea e zakoneske, tegani tu sian leskoro sudija, a na sian okova so ikerela pe ko zakoni. 12 Samo o Devel tano okova so dela zakonija hem samo ov tano Sudija, samo ov šaj te spasinel hem te uništinel nekas. A koj sian tu te sudine tle pašutneske?

13 Šunen akana, tumen so vakerena: „Avdive ili tajsa ka dža ki akaja-akaja diz hem adathe ka ačhova jekh berš, ka kera buti hem ka zarabotina“, 14 a na džanena sar ka ovel tumaro životo tajsa. Soske, tumen sien magla koja so pojavinela pe samo kratko hem palo adava našavgjola. 15 Namesto adava, valjani te vakeren: „Ako tani e Jehovaskiri* volja, ka živina hem ka kera akava ili okova“. 16 A tumen akana frdena čalmi hem dičinena tumen adalea. Sa akava frdibe čalmi tano lošno. 17 Adaleske, ako nekoj džanela sar te kerel adava soj ispravno, a na kerela, adalea kerela grevo.

5 Šunen akana tumen o barvale, roven hem žalinen bašo muke so avena upri tumende. 2 Tumaro barvalipe kirnilo hem o insektija* hale tumare šeja. 3 Tumaro zlato hem tumaro srebro astargja ’rgja hem lengiri ’rgja ka ovel svedoko protiv tumende hem ka hal tumaro telo. Adava so khedingjen, ka ovel sar jag ko posledna dive. 4 Ake, o rabotnikija so khedingje o plodija taro tumare nive vikinena, soske na dengjen len lengiri plata, hem o Jehova* o zapovedniko e vojskengoro šungja sar vikinena baši pomoš okola so khedena i žetva. 5 Tumen ki phuv živingjen raskošno hem samo zadovolingjen tumare želbe. Sar o životne so thuljarena pe bašo dive čhinibaske, agjaar tumen thuljargjen tumare vile. 6 Tumen osudingjen hem mudargjen e pravedniko. Adaleske ov akana protivinela pe tumenge.

7 Oven strpliva phraljalen dži ki e Gospodareskiri prisutnost.* Ake, o zemjodelco da strplivo adžikerela o skapoceno plodi tari phuv, džikote na perela o esensko bršim hem o proletno bršim. 8 Tumen da oven strpliva hem zojrakeren tumare vile, soske paše tani e Gospodareskiri prisutnost.

9 Ma oven holjame jekh jekheske,* phraljalen, te šaj te na oven osudime. Ake, o Sudija tergjola anglo udar. 10 Phraljalen, neka oven tumenge primer o prorokija, kola so kerena sine lafi ko anav e Jehovaskoro,* bašo adava sar te trpinen lošnipe hem te oven strpliva. 11 Ake, bašo okola so istrajngje vakeraja kaj tane srekjna. Šungjen kobor istrajngja o Jov hem džanena sar o Jehova* blagoslovingja le ko krajo - džanena kaj o Jehova* tano pherdo sočuvstvo hem milost.

12 A soj najvažno, phraljalen, čhinaven te han sovli upro nebo, upri phuv ili upro bilo so javer. Namesto adava, keda ka vakeren: „Oja“, adava neka značinel „oja“, a keda ka vakeren: „Na“, adava neka značinel „na“, te šaj te na oven osudime.

13 Ako nekoj maškar tumende cidela muke, neka molinel pe. A ako nekoj tano radosno, neka giljavel gilja so falinena e Devle.* 14 Ako nekoj tano nasvalo maškar tumende, neka vikinel e starešinen taro sobranie, hem ola neka molinen pe leske hem neka makhen le maslo e Jehovaske* ko anav. 15 Hem i molitva koja soj bičhaldi veraja ka sasljarel e nasvale* hem o Jehova* ka vazdel le. Hem ako kergja grevija, ka ovel leske prostimo.

16 Adaleske, priznajnen tumare grevija jekh jekheske hem molinen tumen jekh jekheske te šaj te sasljoven. E pravednikoskiri molitva soj vakerdi taro vilo, isi la bari sila hem čače šaj te pomožinel. 17 O Ilija da sine manuš kole so sine le o ista čuvstvija sar amende, ama keda molingja pe taro vilo te na del bršim, na dengja bršim ki adaja phuv trin berš hem šov masek. 18 Palo adava palem molingja pe, hem taro nebo pelo bršim hem i phuv dengja plodija.

19 Phraljalen, ako nekoj maškar tumende sine hovavdo hem cidingja pe taro čačipe, hem nekoj tumendar pomožingja leske te iranel pe, 20 džanen kaj okova so irangja e grešniko taro leskoro pogrešno drumo, ka spasinel adale manuše taro meriba hem ka učharel but grevija.