PRVO PISMO E PETARESKORO

1 Me o Petar, apostoli e Isus Hristoseskoro, pišinava tumenge so sien birime taro Devel, kola so sien privremena žitelija ko akava sveto hem so sien rasturime ko Pont, ki Galatija, ki Kapadokija, ki Azija hem ki Vitinija. 2 O Devel, amaro Dad, biringja tumen sprema adava so ov angleder džanlja. Dengja tumen pli sila* te šaj te kerel tumen sveta. Ov kergja adava te šaj te oven leske poslušna hem te šaj te oven čista preku o rat e Isus Hristoseskoro.*

O Devel neka sikavel tumenge panda poviše plo šukaripe so na zaslužinaja le hem neka del tumen panda pobaro mir.

3 Neka ovel falimo o Devel, o Dad amare Gospodareskoro e Isus Hristoseskoro, soske sikavgja amenge bari milost. Adalea so voskresningja e Isus Hristose, kergja palem te bijangjova hem dengja amen dživdi nadež. 4 Hem dengja amen nasledstvo so na raspadinela pe, so na meljargjola hem so na našavgjola. Ov garavela adava nasledstvo upre ko nebo tumenge, 5 kolen so o Devel zaštitinela ple silaja adaleske so isi tumen vera, te šaj te dobinen o spasenie so ka ovel otkrimo ko vreme keda ka avel o krajo. 6 Tumen but radujnena tumen bašo akava, iako akana kratko vreme ka valjani te žalinen adaleske so trpinena razna iskušenija, 7 te šaj tumari ispitimi vera te anel tumenge falba, slava hem čest ko vreme keda ka pojavinel pe* o Isus Hristos. Akaja tumari vera tani poskapoceno taro zlato kova so, iako tano ispitimo* jagaja, na trajnela zasekogaš. 8 Iako nikogaš na dikhlen e Hristose, tumen mangena le. Iako akana da na dikhena le, sepak tumen verujnena ki leste hem pherde sien bari radost koja so našti lafencar te opišinel pe, 9 soske sien sigurna kaj sebepi tumari vera, ka dobinen tumaro spasenie.

10 O prorokija so vakergje bašo e Devleskoro baro šukaripe so na zaslužinaja le, kova so sikavgja pe tumenge, šukar ispitingje hem detalno istražingje bašo akava spasenie. 11 Ola but šukar ispitingje ko kova vreme hem ko save okolnostija ka ispolninen pe upro Hristos o bukja kolenge so e Devleskiri sila,* koja so sine ki lende, prorokujngja. Adaja sila prorokujngja angleder kaj o Hristos ka cidel muke hem kaj palo adava ov ka ovel slavimo. 12 O Devel otkringja e prorokonge kaj ola na služinena sine korkori peske, nego tumenge. O prorokija pišingje bašo adava so sine objavimo tumenge hem tumen šungjen akala bukja preku okola so propovedingje tumenge o šukar haberi, agjaar so pomožingja lenge e Devleskiri sila* koja so sine bičhaldi taro nebo. Čak e angelen isi len bari želba te haljoven akala bukja.

13 Adaleske, spreminen tumari godi baši naporno buti. Ko sa oven trezvena. Nadinen tumen ko šukaripe so na zaslužinaja le, kova so ka sikavel pe tumenge keda o Isus Hristos ka pojavinel pe.* 14 Sar poslušna čhave, ma mukhen ponadari da te oblikujnen tumen o želbe kola so sine tumen keda na pendžarena sine e Devle, 15 nego sar soj sveto o Devel kova so vikingja tumen, tumen da oven sveta ko sa so kerena. 16 Soske, ko Spisija pišinela: „Tumen mora te oven sveta, soske me sium sveto“.

17 Hem ako molinena tumen e Dadeske, kova so na delinela e manušen* keda sudinela lenge, nego sekaske sudinela sprema leskere postapke, tegani mukhen tumare postapke te sikaven kaj darana taro Devel džikote živinena sar privremena žitelija ko akava sveto. 18 Soske, džanena kaj na sien sine oslobodime* taro tumaro čučo način sar živinena, kova so nasledingjen le taro tumare parapapija, e bukjencar kola so raspadinena pe, sar soj o srebro ili o zlato. 19 Namesto adava sien sine oslobodime preku o skapoceno rat e Hristoseskoro, kova soj tano sar o rat jekhe bakhreskoro kova soj bizi maana hem soj čisto. 20 Točno tano kaj ov sine birimo angleder te ovel o sveto, ama pojavingja pe ko krajo taro akala vremija tumaro sebepi. 21 Preku leste tumen verujnena ko Devel, kova so vazdingja le taro mule hem dengja le slava. Adaleske, verujnen ko Devel hem nadinen tumen ki leste.

22 Akana, keda ulen čista adaleske so sien poslušna e čačipaske hem šaj te sikaven iskreno phralikano mangipe, mangen tumen jekh jekhea silno taro vilo. 23 Soske, palem bijandilen, ama na taro seme so raspadinela pe, nego taro seme so na raspadinela pe,* preku o lafi e Devleskoro kova soj dživdo hem večno. 24 Soske, „sa o manuša tane sar čar hem lengoro šužipe tano sar luludi ko pole. I čar šukjola hem i luludi perela, 25 ama e Jehovaskoro* lafi ačhola zasekogaš“. Hem akava „lafi“ tano o šukar haberi kova so sine tumenge objavimo.

2 Adaleske, ciden tumendar sekova lošnipe, prevara, licemerstvo, zavist hem sekova klevetibe.* 2 Sar o bebija so rodena thud, agjaar tumen da bajraren ki tumende silno želba bašo čisto thud taro e Devleskoro lafi, te šaj agjaar so ka hraninen tumen lea, te bajroven dži ki zrelost hem ko krajo te oven spasime, 3 ako čače dikhlen* kobor tano šukar o Gospodari.

4 O manuša otfrlingje o dživdo bar, ama o Devel biringja le hem anglo leskere jakhja ov tano skapoceno. Keda sikavena vera ki leste,* 5 tumen ovena sar dživde bara kolencar so gradinela pe jekh duhovno kher, te šaj te oven sveta sveštenikija, hem agjaar preku o Isus Hristos te den duhovna žrtve kola soj prifatliva e Devleske. 6 Soske, ko Spisija pišinela: „Ake! Me čhivava ko Sion birimo bar, jekh skapoceno glavno bar ki kjuša ko temeli. Hem sekoj so sikavela vera ki leste nikogaš nane te razočarinel pe.“*

7 Znači, tumenge adava bar tano skapoceno soske verujnena ki leste, ama okolenge so na verujnena ki leste, „o bar so frdingje le o graditelija, ulo o glavno bar ki kjuša“* 8 hem „bar so ka kerel o manuša te sopkinen pe hem karpa so ka kerel te peren“. Ola sopkinena pe adaleske so nane poslušna e Devleskere lafeske. Adava sine prorokujmo kaj ka slučinel pe lenge. 9 Ama tumen sien „birimo narodo, carska sveštenikija, sveto narodo, narodo so pripadinela samo e Devleske, te šaj segde te vakeren bašo but šukar osobine hem postapke e Devleskere“, kova so vikingja tumen te ikljoven tari temnica hem primingja tumen ki pli but šuži svetlina. 10 Soske, tumen jekh vreme na sien sine narodo, ama akana sien e Devleskoro narodo. Angleder na sikavela pe sine tumenge milost, ama akana sikavela pe tumenge milost.

11 Mangle phraljalen, pottikninava tumen sar strancija hem sar privremena žitelija ko akava sveto, ponadari da te ciden tumen podur taro telesna želbe, kola so vodinena vojna protiv tumende. 12 Živinen primerno maškar o manuša taro sveto te šaj keda ka krivinen tumen kaj kerena lošnipe, te dikhen tumare šukar postapke hem agjaar te slavinen e Devle ko dive keda ka avel te ispitinel save tane sekaskere postapke.

13 E Gospodareskoro sebepi, oven podložna sekole jekheske so isi le vlast, bilo te ovel adava e careske, soske tano ki pobari položba, 14 bilo e upravitelenge kola soj bičhalde lestar te kazninen okolen so kerena lošnipe, a te falinen okolen so kerena šukaripe. 15 Soske, e Devleskiri volja tani, adalea so ka keren šukaripe, te phanden o muja e nerazumna manušengere, kola so kerena lafi bašo nešto so na džanena. 16 Živinen sar slobodna manuša, ama ma koristinen tumari sloboda sar izgovor te keren lošnipa, nego koristinen la sar e Devleskere robija. 17 Poštujnen sarinen, mangen sa e phralen, daran taro Devel, poštujnen e care.

18 O sluge neka oven podložna pumare gospodarenge hem neka poštujnen len sar soj tane dužna te keren, hem adava na samo e gospodaren soj tane šukar hem razumna, nego okolen da kolenge soj pharo te ugodinel pe. 19 Soske, ako nekoj trpinela nevolje* hem nepravde samo te šaj te ovel le čisto sovest anglo Devel, adava tano e Devleske ki volja. 20 Isi li nešto pofalno ko adava te trpinen maribe adaleske so grešingjen? Ama, ako trpinena muke adaleske so kerena nešto šukar, tegani o Devel tano zadovolno.

21 Ustvari, tumen sien sine vikime ko akava, soske o Hristos da cidingja muke tumenge hem dengja tumen primer ko sa te džan palo leskere čekorija. 22 Ov na kergja grevo, a ni na vakergja lafija so prevarinena. 23 Keda vredžingje le, na irangja vredžibaja. Keda cidingja muke, na zakaningja pe, nego mukhlja pe e Devleske ko vasta, kova so pravedno sudinela. 24 Ov ko plo telo lelja amare grevija keda sine kovimo ko stubo,* te šaj te oslobodinel amen taro grevija* hem te živina baši pravednost. Hem „preku leskere rane tumen sien sine sasljarde“. 25 Soske, sien sine sar bakhre kola so našavdile, ama akana irangjen tumen ko pastiri kova so arakhela tumaro životo.*

3 Agjaar, tumen o romnja, oven podložna tumare romenge, te šaj okolen so na šunena e Devleskoro lafi te anen len ki vera bizo lafija, nego tumare ponašibaja, 2 adaleske so dikhena tumaro šukar* ponašibe hem tumaro hor poštovanje. 3 Ma ukrasinen tumen adalea so dikhjola avrijaldan, sar soj o pletibe bala, o phirajbe zlato ili o urajbe šuže šeja, 4 nego neka ukrasinel tumen adava soj garavdo andre ko vilo - o mirno hem o krotko stavi* kova soj šužipe so na našavgjovela. Adava šužipe tano skapoceno anglo e Devleskere jakhja. 5 Soske, agjaar ukrasinena pe sine o sveta džuvlja ko purano vreme, kola so nadinena pe sine ko Devel hem sine podložna pumare romenge. 6 Agjaar i Sara da sine poslušno e Avraameske hem vikinela le sine „gospodari“. A tumen sien lakere čhaja ako ponadari da kerena šukaripe hem na dozvolinena ništo te daravel tumen.

7 Agjaar tumen da, o roma, ponadari da živinen tumare romnjencar agjaar so ka sikaven kaj šukar haljovena len. Poštujnen e džuvlen sar ponežno čaro, soske ola da sar tumende nasledinena o poklon e životoskoro so na zaslužinela pe. Te na kergjen adava, tumare molitve nane te oven šunde.

8 Ko krajo, sarine oven jekh ko misle, oven sočuvstvitelna, neka ovel tumen phralikano mangipe, oven milostiva hem ponizna. 9 Ma iranen lošnipaja e lošnipaske, ni vredžibaja e vredžibaske. Namesto adava, iranen šukaripaja, soske o Devel akaleske vikingja tumen te šaj te nasledinen o blagoslovija.

10 Soske, „okova so mangela te uživinel ko životo hem te dikhel šuže dive, neka arakhel pli čhib taro keribe lošno lafi hem plo muj taro hovajbe. 11 Neka cidel pe taro lošnipe hem neka kerel šukaripe. Neka rodel o mir hem neka trudinel pe te ikerel o mir. 12 Soske, e Jehovaskere* jakhja dikhena okolen soj pravedna hem leskere kana šunena lengere molitve vakerde taro vilo. Ama o Jehova* iranela plo dumo* okolenge so kerena lošnipe“.

13 Ustvari, koj ka kerel tumenge šteta ako revnosno kerena adava soj šukar? 14 Ama, čak te ciden da muke adaleske so sien pravedna, tumen sien srekjna. Sepak, ma daran taro adava so ola darana* hem ma voznemirinen tumen. 15 Nego poštujnen ko tumare vile e Hristose sar Gospodari hem sekogaš oven spremna anglo sekoj so ka pučel tumen te braninen i nadež so isi tumen, ama adava keren le ko krotko način hem sikaven hor poštovanje.

16 Ikeren čisto tumari sovest, te šaj agjaar, bilo so te vakeren protiv tumende, okola so kerena lošno lafi tumendar te oven ladžakerde taro tumaro šukar ponašibe sar e Hristoseskere sledbenikija. 17 Soske, pošukar te trpinen adaleske so kerena šukaripe, ako adava tani e Devleskiri volja, nego te trpinen adaleske so kerena lošnipe. 18 Soske, o Hristos mulo jekh puti hem zasekogaš bašo grevija, pravedniko bašo nepravedna, te šaj te anel tumen ko Devel. Ov mulo sar manuš, ama sine iramo ko životo sar duhovno ličnost. 19 Agjaar ov gelo te propovedinel e duhonge soj tane ko zatvor, 20 kola so na sine poslušna keda o Devel strplivo adžikergja ko dive e Noeskere džikote gradinela pe sine i arka ki koja so sine samo nekobor džene, ola sine ofto džene kola so bezbedno nakhle taro pani hem sine spasime.

21 Adava so ulo ko adala dive, šaj te sporedina le e krstibaja kova so akana spasinela tumen da preku o voskresenie e Isus Hristoseskoro. (O krstibe na cidela o melalipe taro telo, nego e krstibaja rodela pe čisto sovest taro Devel.) 22 O Hristos tano tari e Devleskiri desno strana, soske gelo ko nebo kote so o angelija, o vlastija hem o sile tane leske podložna.

4 Adaleske so o Hristos cidingja muke džikote sine manuš, tumen da spreminen tumen te šaj te razmislinen ko isto način sar leste, soske koj cidingja muke ov čhinavgja te kerel grevo, 2 te šaj o vreme so ačhola le taro leskoro životo sar manuš, te na živinel le agjaar so ka zadovolinel o manušikane želbe, nego ka kerel adava so mangela o Devel. 3 Soske, dosta sine so angleder kerena sine adava so kerena o manuša taro sveto, keda bezobrazno ponašinena* tumen sine, na kontrolirinena sine tumare pogrešna želbe, preterano piena sine, kerena sine raspuštena zabave, natprevarinena tumen sine ko pijbe hem kerena sine odvratno idolopoklonstvo. 4 Ola akana čudinena pe so tumen više na prastana lencar ko isto rumimo drumo, adaleske kerena lošno lafi baši tumende. 5 Ama akala manuša ka odgovorinen anglo okova soj spremno te sudinel hem e dživdenge hem e mulenge. 6 Ustvari, adaleske o šukar haberi sine objavimo e mulenge da, te šaj - iako o manuša sudinena lenge sprema adava so dikhjola avrijaldan - anglo e Devleskere jakhja ola te živinen agjaar so ka vodinel len e Devleskiri sila.*

7 Paše tano o krajo bašo sa. Adaleske, ispravno razmislinen hem sekogaš oven spremna te molinen tumen. 8 A soj najvažno, neka ovel tumen baro mangipe jekh jekheske, soske o mangipe učharela but grevija. 9 Oven gostoprimliva jekh jekhea bizo te žalinen tumen. 10 Služinen jekh jekheske, sekoj e poklonea so dobingja le, sar šukar upravitelija* kola so pomožinena e javerenge te dobinen e Devleskoro šukaripe so na zaslužinaja le, kova so sikavela pe ko razna načinija. 11 Ako nekoj kerela lafi, neka kerel adava sar nekoj so vakerela e Devleskere lafija. Ako nekoj služinela, neka kerel adava sar nekoj so zavisinela tari sila koja so dela la o Devel. Agjaar o Devel preku o Isus Hristos ka ovel slavimo ko sa. Leskiri tani i slava hem i mokj zasekogaš. Amin.

12 Mangle phraljalen hem phenjalen, ma iznenadinen tumen so doživinena iskušenija kola soj tane sar jag, sar te phene nešto čudno slučinela pe tumenge. 13 Namesto adava, radujnen tumen, soske tumen da cidena o ista muke save so cidingja o Hristos, te šaj isto agjaar but te radujnen tumen ko vreme keda ka otkrinel pe leskiri slava. 14 Ako vredžinena tumen bašo e Hristoseskoro anav, tumen sien srekjna, soske adava značinela kaj tumen isi tumen e Devleskiri slavno sila.*

15 Ama, nijekh tumendar ma te cidel muke adaleske soj tano ubijco, čor, ili adaleske so kerela lošnipe ili mešinela pe e javerenge ko bukja. 16 Ama, ako nekoj cidela muke adaleske soj tano hristijani, ma te ladžal, nego ponadari da neka slavinel e Devle adalea so ka živinel sprema adava anav so phiravela. 17 Soske, alo o vreme te počminel o sudibe hem adava taro e Devleskoro kher. A ako o sudibe počminela amendar, tegani so ka ovel okolencar so nane poslušna e Devleskere šukar habereske? 18 „Hem ako e pravedno manušeske tano pharo te spasinel pe, tegani so ka ovel e lošno manušea hem e grešnikoja?“ 19 Adaleske, okola so cidena muke bašo adava so kerena e Devleskiri volja, neka den* pumaro životo e verno Stvoriteleske hem ponadari da neka keren šukaripe.

5 Adaleske so me da sium starešina hem svedoko e Hristoseskere mukenge, hem me da ka dobinav i slava so ka ovel otkrimi, pottikninava e starešinen soj maškar tumende: 2 oven pastirija e Devleskere stadoske soj tumenge dendo te grižinen tumen leske agjaar so ka služinen sar nadglednikija. Ma keren le adava silaja, nego dobrovolno, soske o Devel agjaar mangela. Ma keren le adava adaleske so mangena te dobinen nešto ko nečesno način, nego keren le adava celo vilea. 3 Ma gospodarinen upro okola so pripadinena e Devleske, nego oven primer e stadoske. 4 A keda ka pojavinel pe o glavno pastiri, ka dobinen i kruna tari slava koja so na raspadinela pe.

5 Agjaar tumen da, o terne murša, oven podložna e pophure muršenge.* A sarine ponašinen tumen jekh jekhea ponizno,* soske o Devel protivinela pe okolenge soj gorda, a e ponizna manušenge sikavela plo šukaripe so na zaslužinaja le.

6 Adaleske, oven ponizna telo e Devleskoro mokjno vas te šaj ov te vazdel tumen keda ka avel vreme, 7 hem sa tumare sekiracie frden leske, soske ov grižinela pe tumenge. 8 Razmislinen trezveno hem pazinen! Tumaro dušmani, o Beng, phirela akari-okori sar lavi kova so vikinela hem rodela nekas te hal. 9 A tumen protivinen tumen leske, ačhoven zorale ki vera, soske džanena kaj o ista muke trpinena len tumare phralja da ko celo sveto. 10 Ama, otkeda hari ka ciden muke, o Devel kova so ko sekova način sikavela plo šukaripe so na zaslužinaja le, kova so vikingja tumen te oven ko jekhipe e Hristosea hem te dobinen večno slava, ov celosno ka obučinel tumen. Ov ka kerel tumen zorale, ka pomožinel tumenge te ačhoven verna hem ka kerel te tergjoven cvrsto. 11 Leskiri tani i mokj zasekogaš. Amin.

12 Preku o Silvan,* kole so dikhava sar verno phral, pišingjum tumenge kratko pismo te šaj te ohrabrinav tumen hem te uverinav tumen kaj o Devel čače sikavgja tumenge plo šukaripe so na zaslužinaja le. Cvrsto ikeren tumen ko adava šukaripe. 13 Pozdravinela tumen okoja soj ko Vavilon,* soj tani birimi sar tumen so sien, hem o Marko mlo čhavo. 14 Mangipaja resen tumen jekh jekhea.*

Neka ovel mir sarinen tumen so sien ko jekhipe e Hristosea.