DUJTO PISMO E PETARESKORO

1 Me o Simon Petar, so sium robo hem apostoli e Isus Hristoseskoro, pišinava dži tumende kola so preku i pravednost amare Devleskiri hem amare Spasiteleskiri e Isus Hristoseskiri, dobingjen o skapocena čačutne sikljojba, kola so dobingjem amen da:

2 O Devel neka sikavel tumenge panda poviše plo šukaripe so na zaslužinaja le hem neka del tumen panda pobaro mir agjaar so šukar ka pendžaren e Devle hem e Isuse, amare Gospodare. 3 Preku e Devleskiri mokj amen sar poklon dobingjem sa adava so valjani amenge te šaj te živina hem te šaj te služina leske celo vilea, adaleske so šukar pendžargjem e Devle, kova so vikingja amen preku pli slava hem plo šukaripe. 4 Akale bukjencar o Devel dengja amen sar poklon o skapocena hem o but šuže vetuvanja, te šaj preku lende tumen da te oven duhovna suštestvija sar soj o Devel, soske našlen taro rumime bukja akale svetoskere, kola so avena taro pogrešna želbe.

5 Adaleske, den tumendar sa ki tumari vera te dodajnen o šukaripe, ko šukaripe o pendžaribe e čačipaskoro, 6 ko pendžaribe e čačipaskoro i samokontrola, ki samokontrola i istrajnost, ki istrajnost o služibe e Devleske celo vilea, 7 ko služibe e Devleske celo vilea o phralikano mangipe, ko phralikano mangipe o mangipe sprema sa o manuša. 8 Soske, ako isi tumen akala bukja ki tumende hem sikavena len ki bari mera, tegani nane te oven bizi buti hem nane te oven sar kaš kova so na dela plodija, soske šukar pendžargjen amare Gospodare e Isus Hristose.

9 Soske, ako nekas nane le akala bukja, ov tano korolo, phandela ple jakhja angli svetlina* hem bistrela kaj o Devel čistingja le taro leskere purane grevija. 10 Adaleske, phraljalen, panda poviše trudinen tumen te ačhoven maškar okolende so o Devel vikingja hem biringja, soske ako sikavena adala osobine, tumen nikogaš nane te peren. 11 Ustvari, ko asavko način darežlivo ka del pe tumenge prilika te khuven ko večno Carstvo amare Gospodareskoro hem Spasiteleskoro, e Isus Hristoseskoro.

12 Adaleske me sekogaš ka setinkerav tumen ko akala bukja, iako tumen džanena len hem sien cvrsto uverime ko čačipe so prifatingjen. 13 Ama mislinava kaj ka ovel šukar, sa džikote sium ko akava telo,* te setinkerav tumen te šaj te ačhoven džangavde, 14 soske džanava kaj panda hari ka mukhav akava telo, sar so jasno sikavgja mange hem amaro Gospodari o Isus Hristos. 15 Me ponadari da ka dav mandar sa, te šaj otkeda ka džav mange, tumen te setinen tumen ko sa akala bukja.

16 Amen na vakergjem tumenge baši sila hem i prisutnost amare Gospodareskiri e Isus Hristoseskiri sprema nesave hovavne paramisa kola soj šukar izmislime, nego adaleske so amare jakhencar dikhlem leskiri bari slava. 17 Soske, ov primingja i čest hem i slava taro Devel, o Dad, kastar so avela i bari slava, keda vakergja leske akala lafija: „Akava tano mlo čhavo, mlo manglo, kova so kerela man radosno“. 18 Amen šungjem akala lafija, kola so ale taro nebo keda siem sine lea ki sveto planina.

19 Adaleske amen siem pouverime kaj o proroštvija čače ka ispolninen pe, hem tumen šukar kerena so pazinena ko adala proroštvija. Ko tumare vile, akala proroštvija mora te oven sar jekh lampa koja so svetinela ko temno than. Keren adava sa džikote na phravgjola o dive hem na pojavinela pe i sabalutni zvezda.* 20 Soske, tumen najangle džanen akava: nijekh proroštvo taro Spisija na avela taro nekaskoro lično razmislibe. 21 Soske, nijekh proroštvo na sine vakerdo adaleske so adava manglja o manuš, nego o manuša vakerena sine o lafija so avena taro Devel agjaar sar so vodinela* len sine e Devleskiri sila.*

2 Ama, maškar o izraelsko narodo isto agjaar sine hovavne prorokija hem maškar tumende da ka oven hovavne učitelija. Ola, bizo te primetinel pe, ka anen sekte* kola so ka uništinen tumari vera hem nane te priznajnen e gazda kova so kingja len, hem adava sebepi ola sigate ka oven uništime. 2 Osven adava, but manuša ka džan palo lengoro bezobrazno ponašibe* hem lengoro sebepi ka kerel pe lošno lafi bašo drumo e čačipaskoro. 3 Isto agjaar, adaleske soj tane alčna ola ka dikhen te iskoristinen tumen hovavne lafencar. Ama i osuda baši lende koja so o Devel angja la panda but vreme angleder na kasninela hem lengoro uništibe na sovela.

4 Čače, o Devel na mukhlja bizi kazna e angelen kola so grešingje, nego frdingja len ko tartar,* phanlja len sindžirencar* ki gusto temnica kote so adžikerena te oven sudime. 5 Hem na mukhlja bizi kazna e sveto da taro e Noeskoro vreme, ama spasingja e Noe kova so propovedinela sine baši pravednost hem efta javeren keda angja potop hem uništingja o sveto so sine pherdo lošna manušencar. 6 Osven adava, ov osudingja o dizja Sodom hem Gomor agjaar so celosno thargja len, sa džikote na ačhilo lendar samo pravo. Agjaar sikavgja e lošna manušenge so ka slučinel pe lenge. 7 A oslobodingja e pravedno manuše e Lote, kova so but mučinela pe sine sebepi o bezobrazno ponašibe* e lošna manušengoro, 8 soske dive palo dive, akava pravedno manuš mučinela sine pli pravedno duša* adaleske so dikhela sine hem šunela sine lošna bukja so kerena sine akala manuša džikote živinela sine maškar lende. 9 Znači, o Jehova* džanela sar te spasinel taro iskušenie e manušen soj tane verna leske, a okolen soj nepravedna ikerela len bašo dive keda ka oven sudime te oven uništime, 10 a posebno okolen so mangena te meljaren e javerengoro telo hem so dikhena sar potele pestar okolen so isi len avtoriteti.

Ola tane drska hem tvrdoglava, na darana te keren lošno lafi taro okola kolenge so o Devel sikavgja čest. 11 A o angelija, iako tane posilna hem pomokjna lendar, na osudinena asavken hem na vredžinena len adaleske so poštujnena e Jehova.* 12 Ama akala manuša, soj tane sar nerazumna životne, kola so postapinena sprema o instinkt hem tane bijame te oven astarde hem mudarde, kerena lafi bašo bukja kola so na haljovena len. Lengoro lošno ponašibe ka ingarel len dži ko uništibe. 13 Ola ka oven uništime sebepi pumare lošna postapke.

Ola uživinena te zadovolinen pumare telesna želbe, hem adava kerena le čak sred dive. Ola tane sar fleke hem melalipe maškar tumende. Džikote hana hem piena tumencar, ola uživinena te prevarinen e javeren pumare hovavne sikajbaja. 14 Lengere jakhja tane pherde preljubaja hem našti te čhinaven te grešinen. Astarena ki zamka okolen so isi len slabo vera.* Lengoro vilo tano siklo te ovel alčno. Ola tane čhave soj dende arman. 15 Mukhle o pravo drumo hem sine hovavde. Gele palo e Valaameskoro drumo, o čhavo e Veoreskoro, kova so manglja i nagrada so valjani sine te dobinel la bašo ple lošna postapke, 16 ama sine ukorimo adaleske so gelo protiv adava soj ispravno. Leskiri herni, jekh životno kova so našti te kerel lafi, kergja lea lafi manušikane glasoja hem čhinavgja e proroko te kerel delinipe.

17 Adala manuša tane sar izvorija bizo pani hem oblakija bizo pani kola soj ingarde tari silno bavlal. Len adžikerela len i najkali temnica. 18 Ola vakerena bare lafija, ama adala lafija tane čuče. Preku o telesna želbe hem pumare bezobrazno ponašibaja,* ola astarena ki zamka okolen so samo so našle taro manuša kola so kerena pogrešna bukja. 19 Vetinena lenge sloboda, a korkori ola tane robija e grevoske. Soske, sekoj tano robo okoleske so isi le vlast upri leste. 20 Čače, ako ola, otkeda šukar pendžargje e Gospodare hem e Spasitele e Isus Hristose hem agjaar našle taro melalipe akale svetoskoro, palem mešinena pe ko akala bukja hem akala bukja kontrolirinena len, tegani ovela lenge pološno nego angleder te pendžaren o čačipe. 21 Lenge ka ovel sine pošukar te na pendžaren sine celosno o pravedno drumo, nego te pendžaren le, a palo adava te ciden pe taro sveta zapovedija so dobingje len. 22 Adava so ulo lenge sikavela kaj tano čače adava so vakerena: „O džukel iranela pe ko adava so čhadlja hem o balo so sine nangjardo palem iranela pe ki čik te valkajnel pe“.

3 Mangle phraljalen, akava tano više o dujto pismo kova so pišinava tumenge hem, isto sar ko prvo, ko akava da pismo pottikninava tumen te koristinen tumari sposobnost jasno te razmislinen agjaar so setinkerava tumen ko adava so više džanena, 2 te šaj te setinen tumen ko lafija so vakergje* len o sveta prorokija hem ko zapovedija taro Gospodari hem Spasiteli, kova so dengja len preku tumare apostolija. 3 Najangle, džanen akava: ko posledna dive ka pojavinen pe manuša kola so ka asan bašo adava soj šukar hem ka keren lošna bukja kola soj sprema lengere želbe 4 hem ka vakeren: „Kaj tani leskiri prisutnost so vetingja la? Panda otkeda mule amare parapapija, sa o bukja ačhile ista sar so sine ko vreme keda o Devel kergja e manušen“.

5 Ola namerno na prifatinena o čačipe kaj o nebo postojnela sine but vreme angleder hem kaj i phuv cvrsto tergjola sine upreder o pani hem maškar o pani preku e Devleskoro lafi. 6 Agjaar, adava sveto sine uništimo keda o pani učhargja celi phuv. 7 Preku adava isto lafi, o nebo hem i phuv so avdive postojnena, tane odredime te oven uništime jagaja hem arakhena pe sa dži ko dive keda ka oven sudime hem uništime o lošna manuša.

8 Mangle phraljalen hem phenjalen, ma bistren kaj e Jehovaske* jekh dive tano sar 1.000 berša, a 1.000 berša tane sar jekh dive. 9 O Jehova* na kasninela te kerel adava so vetingja, sar so nesave mislinena kaj kasninela, nego ov tano strplivo tumencar, soske na mangela nikoj te ovel uništimo, nego mangela sarinen te ovel len prilika te kainen pe. 10 Ama e Jehovaskoro* dive ka avel sar čor. Hem ko adava dive, o nebo ka našavgjovel jekhe silno zvukoja, o bukja soj tane ko nebo hem ki phuv ka thabljon hem ka oven uništime, i phuv hem o bukja soj kerde ki late ka oven otkrime.

11 Adaleske so sa akala bukja ka oven uništime ko asavko način, razmislinen bašo adava save manuša valjani te oven. Tumare postapke neka oven sveta hem neka sikaven kaj tumen sien verna e Devleske ko sa, 12 džikote adžikerena* hem sekogaš isi tumen ki godi e Jehovaskoro* dive. Ko adava dive o nebo ka ovel uništimo jagaja, hem o bukja soj ko nebo hem ki phuv ka topingjoven ki bari jag. 13 Ama sar so vetingja ov, adžikeraja nevo nebo hem nevi phuv kote so ka živinel i pravednost.

14 Mangle phraljalen hem phenjalen, adaleske so adžikerena akala bukja, den tumendar sa te šaj ko krajo anglo Devel te oven čista, bizi maana hem ko mir. 15 A ki strplivost amare Gospodareskiri dikhen sar spasenie, sar so pišingja tumenge hem amaro manglo phral o Pavle sprema i mudrost koja soj leske dendi. 16 Ov kerela lafi bašo akala bukja ko sa ple pismija. Ama ko adala pismija isi bukja so phare haljovena pe, bukja so prevrtinena len okola so na haljovena len hem soj slaba ki vera, sar so kerena e javere da deloncar taro Spisija, hem adava ka anel ola te oven uništime.

17 Mangle phraljalen, adaleske so angleder džanena akala bukja, pazinen te na hovaven tumen adala lošna manuša ple hovajbaja hem te na našaven tumari odlučnost te ačhoven ko ispravno drumo. 18 Ama nadinava man kaj ka dobinen panda poviše o šukaripe so na zaslužinaja le amare Gospodareskoro hem Spasiteleskoro e Isus Hristoseskoro hem kaj sa pošukar ka pendžaren le. Ov neka ovel slavimo akana hem zasekogaš. Amin.