PRVO PISMO E JOVANESKORO

1 Pišinaja tumenge bašo okova so anela o lafi so dela životo, kova so sine taro početok, kole so šungjem le, dikhlem le amare jakhencar, dikhlem so kergja hem pipingjem le amare vastencar. 2 (Oja, o večno životo sine objavimo amenge, amen dikhlem le, svedočinaja baši leste hem vakeraja le tumenge. Adava večno životo avela taro Dad hem sine objavimo amenge.) 3 Adava so dikhlem hem šungjem amen vakeraja le tumenge da, te šaj tumen da te oven ko jekhipe amencar, agjaar te oven ko jekhipe hem e Dadea hem leskere Čhavea e Isus Hristosea. 4 Amen pišinaja tumenge akava te šaj amari radost te ovel celosno.

5 A akava tano o haberi so šungjem le lestar hem vakeraja le tumenge: o Devel tano svetlina hem ki leste nane nisavi temnica. 6 Ako vakeraja: „Amen siem ko jekhipe lea“, a ponadari živinaja ki temnica, tegani amen hovavaja hem na postapinaja sprema o čačipe. 7 Ama, ako živinaja ki svetlina, sar ov soj tano ki svetlina, tegani amen siem ko jekhipe jekh jekhea hem o rat e Isuseskoro, leskere Čhaveskoro, čistinela amen taro sekova grevo.

8 Ako vakeraja: „Nane amen grevo“, tegani hovavaja korkori amen hem o čačipe nane ki amende. 9 Ako priznajnaja amare grevija, o Devel ka prostinel amenge hem ka čistinel amen taro sa o lošna bukja, adaleske soj tano verno hem pravedno. 10 Ako vakeraja: „Amen nikogaš na grešingjem“, tegani sar te phene vakeraja kaj o Devel hovavela, hem leskoro lafi nane ki amende.

2 Mle mangle čhave, pišinava tumenge akava te šaj te na keren grevo. Ama ako nekoj kerela grevo, ko amaro Dad isi amen pomošniko - o Isus Hristos, o pravedniko. 2 Hem ov tano žrtva bašo amare grevija koja so smirinela amen e Devlea, hem na samo bašo amare grevija, nego hem bašo grevija e celo svetoskere. 3 Hem ako ponadari da ikeraja amen ko leskere zapovedija, taro adava amen džanaja kaj pendžaraja le. 4 Ako nekoj vakerela: „Me pendžarava le”, a na ikerela pe ko leskere zapovedija, ov hovavela hem o čačipe nane ki leste. 5 Ama ako nekoj ikerela pe ko e Devleskoro lafi, leskoro mangipe sprema o Devel čače tano celosno.* Taro adava džanaja kaj siem ko jekhipe lea. 6 Ako nekoj vakerela kaj ačhola ko jekhipe lea, dužno tano ov da te živinel sar so živingja o Isus.

7 Mle mangle, na pišinava tumenge jekh nevi zapoved, nego i purani zapoved so sine tumen panda taro početok. Adaja purani zapoved tano o lafi kova so šungjen le. 8 A sepak pišinava tumenge jekh nevi zapoved ki kolate so ikergja pe o Hristos hem ki kolate so tumen da ikerena tumen, soske i temnica nakhela hem i čačutni svetlina više svetinela.

9 Koj vakerela kaj tano ki svetlina, a sepak mrzinela ple phrale, ov panda tano ki temnica. 10 Koj mangela ple phrale, ov ačhovela ki svetlina, hem le ništo našti te sopkinel le.* 11 Ama okova so mrzinela ple phrale tano ki temnica hem živinela ki temnica, hem ov na džanela kote džala, soske i temnica korjargja leskere jakhja.

12 Pišinava tumenge, mle mangle čhave, soske tumare grevija tane prostime sebepi leskoro anav. 13 Pišinava tumenge, e dadenge, soske pendžargjen okole so postojnela panda taro početok. Pišinava tumenge, e ternenge, soske pobedingjen e Benge.* Pišinava tumenge, e čhavenge, soske pendžargjen e Dade. 14 Pišinava tumenge, e dadenge, soske pendžargjen okole so postojnela panda taro početok. Pišinava tumenge, e ternenge, soske sien zorale hem e Devleskoro lafi ačhola ki tumende hem tumen pobedingjen e Benge.*

15 Ma mangen ni o sveto ni adava so isi ko sveto. Ako nekoj mangela o sveto, le nane le mangipe sprema o Dad. 16 Soske, sa soj ko sveto - i želba e teloskiri hem i želba e jakhengiri hem te falina amen e bukjencar so isi amen - na avela taro Dad, nego avela taro sveto. 17 A o sveto nakhela hem leskere želbe, a okova so kerela e Devleskiri volja ačhola zasekogaš.

18 Mangle čhavalen, akava tano o posledno saati. Šungjen kaj ka avel okova soj tano protiv o Hristos,* hem čače akana više pojavingje pe but soj tane protiv o Hristos.* Taro akava džanaja kaj akava tano o posledno saati. 19 Ola sine maškar amende ama mukhle amen, soske ola na sine sar amende.* A te oven sine sar amende ka ačhoven sine amencar. Ama mukhle amen te šaj te dikhjol kaj nane sarine sar amende. 20 A tumen biringja* tumen o Sveto Devel, hem sarine tumen džanena o čačipe. 21 Na pišinava tumenge adaleske so na pendžarena o čačipe, nego adaleske so pendžarena le hem adaleske so nisavo hovajbe na avela taro čačipe.

22 Koj tano hovavno ako na okova so na priznajnela kaj o Isus tano o Hristos? Okova so otfrlinela e Dade hem e Čhave, ov tano adava soj protiv o Hristos.* 23 Koj otfrlinela e Čhave, le o Dad da ka otfrlinel le. A koj priznajnela e Čhave, le o Dad da ka priznajnel le. 24 A tumen, adava so šungjen le ko početok mora te ačhovel tumenge ko vilo. Ako adava so šungjen le panda taro početok ačhola tumenge ko vilo, tumen da ka ačhoven ko jekhipe e Čhavea hem ko jekhipe e Dadea. 25 Osven adava, akava tano o vetuvanje so ov korkori dengja amen - o večno životo.

26 Akava pišinava tumenge bašo okola so probinena te hovaven tumen. 27 A o Devel biringja* tumen ple silaja* hem adaja sila ačhola ki tumende, hem tumen na valjani nikoj te sikavel tumen. A adava so sien sine birime preku leskiri sila* sikavela tumen bašo sa o bukja, a adava tano čače hem nane hovajbe. Ponadari da ačhoven ko jekhipe lea sar so sikavgja tumen e Devleskiri sila* te keren. 28 Adaleske akana, mle mangle čhave, ačhoven ko jekhipe lea, te šaj amen hrabro te kera lafi keda ka pojavinel pe ov hem tari ladž te na cida amen lestar ko vreme tari leskiri prisutnost. 29 Ako džanena kaj ov tano pravedno, tegani isto agjaar džanena kaj sekoj so postapinela pravedno bijamo tano taro Devel.

3 Dikhen savo mangipe sikavgja amenge o Dad, vikingja amen ple čhave hem amen adava da siem. Ama o sveto na pendžarela amen, soske na pendžargja e Devle. 2 Mle mangle, akana siem e Devleskere čhave, ama panda nane otkrimo so ka ova ki idnina. Džanaja kaj, keda ov ka pojavinel pe, ka ova sar leste, soske ka dikha le baš agjaar sar soj tano. 3 Hem sekoj so nadinela pe ki leste, čistinela korkori pes, sar soj tano čisto ov.

4 Sekova jekh so kerela grevo, phagela o zakoni da, soske o grevo značinela te phagel pe o zakoni. 5 Džanena kaj o Čhavo da alo te ingarel amare grevija, a ki leste nane grevo. 6 Sekova jekh so ačhola ko jekhipe lea, na kerela grevo, a sekoj so kerela grevo, na dikhlja le, a ni na pendžargja le. 7 Mle mangle čhave, ma mukhen nikoj te hovavel tumen. Koj kerela adava soj pravedno, pravedno tano, sar soj tano pravedno o Isus. 8 Koj kerela grevo, avela taro Beng, soske o Beng grešinela taro početok.* Adaleske alo e Devleskoro Čhavo, te uništinel o bukja so kergja o Beng.

9 Sekova jekh soj bijamo taro Devel, na kerela grevo, soske e Devleskiri sila* ačhola ki leste. Ov našti te kerel grevo, soske tano bijamo taro Devel. 10 O čhave e Devleskere hem o čhave e Bengeskere pendžargjovena palo akava: sekoj so na kerela adava soj pravedno, na avela taro Devel, a ni okova da so na mangela ple phrale. 11 Soske, taro početok šungjen akaja zapoved: te manga amen jekh jekhea. 12 Ma te ova sar o Kain kova so alo taro Beng hem mudargja ple phrale. A soske mudargja le? Adaleske so ov kerela sine lošna bukja, a leskoro phral kerela sine adava soj pravedno.

13 Phraljalen, ma te čudinel tumen adava so o sveto mrzinela tumen. 14 Amen džanaja kaj taro meribe alem ko životo, soske mangaja e phralen. Koj na mangela ple phrale, ačhola ko meribe. 15 Sekova jekh so mrzinela ple phrale tano ubijco, a džanena kaj nijekh ubijco nane te živinel večno. 16 Amen halilem soj o mangipe taro adava so ov dengja plo životo amenge. Amen da siem dužna te da amaro životo amare phralenge. 17 Ama, ako nekas isi le dovolno taro adava so valjani leske živibaske hem dikhela kaj leskere phrale nane le, a sepak na sikavela leske milost, tegani sar šaj te vakerel kaj mangela e Devle? 18 Mle mangle čhave, na valjani te manga amen lafencar, a ni mujea, nego postapkencar hem iskreno.

19 Taro adava ka džana kaj avaja taro čačipe hem ka uverina amaro vilo kaj o Devel mangela amen, 20 iako amaro vilo osudinela amen bašo nešto, soske o Devel tano pobaro taro amaro vilo hem ov džanela sa. 21 Mle mangle, ako amaro vilo na osudinela amen, tegani šaj slobodno te kera lafi e Devlea, 22 hem bilo so te roda lestar ov dela amen, soske ikeraja leskere zapovedija hem keraja adava soj leske ki volja. 23 A akaja tani leskiri zapoved: te verujna ko leskere Čhaveskoro anav, ko Isus Hristos, hem te manga amen jekh jekhea, sar so zapovedingja amenge ov. 24 Osven adava, okova so ikerela e Devleskere zapovedija, ačhola ko jekhipe e Devlea, hem o Devel ačhola ko jekhipe lea. Hem tari pli sila* so dengja amen, amen džanaja kaj ov ačhola ko jekhipe amencar.

4 Me mangle, ma verujnen ko sekova sikljojbe so dikhjola sar te phene avela taro Devel, nego ispitinen asavke sikljojba te šaj te dikhen dali čače avena lestar, soske but hovavne prorokija pojavingje pe ko sveto.

2 Ake sar šaj te haljoven dali nesave sikljojba avena taro Devel: sekova sikljojbe kova so priznajnela kaj o Isus Hristos alo ki phuv sar manuš, avela taro Devel. 3 A nijekh sikljojbe kova so na priznajnela e Isuse, na avela taro Devel. Osven adava, asavke sikljojba avena taro okova soj tano protiv o Hristos.* Šungjen kaj ka pojavinen pe asavke sikljojba ko sveto, hem više pojavingje pe.

4 Mle mangle čhave, tumen avena taro Devel hem pobedingjen e hovavne prorokon, soske okova soj tano ko jekhipe tumencar tano pobaro taro okova soj ko jekhipe e svetoja. 5 Ola avena taro sveto, hem adaleske kerena lafi bašo bukja so avena taro sveto, hem o sveto šunela len. 6 Amen avaja taro Devel. Koj pendžarela e Devle, šunela amen, a koj na avela taro Devel, na šunela amen. Taro adava haljovaja dali nesave sikljojba so dikhjona sar te phene avena taro Devel, tane čačutne ili hovavne.

7 Mle mangle, ponadari da te manga amen jekh jekhea, soske o mangipe tano taro Devel, hem sekova jekh so sikavela mangipe bijamo tano taro Devel hem pendžarela e Devle. 8 Koj na sikavela mangipe na pendžargja e Devle, soske o Devel tano mangipe. 9 O Devel sikavgja plo mangipe sprema amende agjaar so bičhalgja ple edinstveno bijame Čhave ko sveto, te šaj preku leste te dobina životo. 10 Adava mangipe značinela akava: amen na manglem e Devle, nego ov manglja amen hem bičhalgja ple Čhave sar žrtva bašo amare grevija so smirinela amen e Devlea.

11 Mle mangle, ako o Devel agjaar manglja amen, tegani amen da siem dužna te manga amen jekh jekhea. 12 Nikoj nikogaš na dikhlja e Devle. Ako ponadari da mangaja amen jekh jekhea, o Devel ačhola amencar hem leskoro mangipe ovela celosno* ko amare vile. 13 Amen džanaja kaj ačhovaja ko jekhipe lea hem ov ačhola ko jekhipe amencar, adaleske so dengja amen pli sila.* 14 Osven adava, amen korkori dikhlem hem svedočinaja kaj o Dad bičhalgja ple Čhave sar spasiteli e svetoskoro. 15 Koj priznajnela kaj o Isus tano e Devleskoro Čhavo, o Devel ačhovela ko jekhipe lea hem ov ačhovela ko jekhipe e Devlea. 16 Hem amen pendžargjem o mangipe kova so isi e Devle sprema amende hem uverime siem ko adava mangipe.

O Devel tano mangipe, hem koj stalno sikavela mangipe, ačhola ko jekhipe e Devlea hem o Devel ačhola ko jekhipe lea. 17 Agjaar o mangipe ovela celosno* ko amare vile te šaj hrabro te kera lafi ko dive e sudibaske, soske ko akava sveto amen siem sar o Hristos. 18 Ko mangipe nane dar, nego o celosno* mangipe brkinela i dar, soske i dar kočinkerela amen. Ustvari, koj darala nane le celosno mangipe. 19 Amen sikavaja mangipe, soske prvo ov sikavgja mangipe amenge.

20 Ako nekoj vakerela: „Mangava e Devle“, a mrzinela ple phrale, ov hovavela. Soske, koj na mangela ple phrale, kaste so dikhela, našti te mangel e Devle, kaste so na dikhela. 21 Hem lestar dobingjem akaja zapoved: okova so mangela e Devle, mora te mangel ple phrale da.

5 Sekoj so verujnela kaj o Isus tano o Hristos, ov tano bijamo taro Devel. Hem sekoj so mangela e Dade, mangela okole da soj bijamo lestar. 2 Amen džanaja kaj mangaja e Devleskere čhaven taro adava so mangaja e Devle hem ikeraja leskere zapovedija. 3 Soske, te mangel pe e Devle značinela te ikeren pe leskere zapovedija, a leskere zapovedija nane phare, 4 soske sekoj soj bijamo* taro Devel pobedinela e sveto. A amari vera tani adaja so pobedingja e sveto.

5 Koj šaj te pobedinel e sveto? Nane li okova so verujnela kaj o Isus tano e Devleskoro Čhavo? 6 Ov, o Isus Hristos, alo preku o pani hem o rat, ov na alo samo e panjea, nego e panjea hem e ratea. A e Devleskiri sila* svedočinela bašo adava, soske e Devleskiri sila* tani o čačipe. 7 Soske, isi trin bukja so svedočinena koj tano o Isus: 8 e Devleskiri sila,* o pani hem o rat. Ola sotrin svedočinena baši jekh isto buti.

9 Amen prifatinaja o svedočibe e manušengoro, ama o svedočibe e Devleskoro tano pobaro. Soske, o svedoštvo so dela o Devel tano akava: ov svedočingja bašo plo Čhavo. 10 Okova so verujnela ko e Devleskoro Čhavo sikavela kaj isi le adava svedoštvo taro Devel ko plo vilo. Koj na verujnela ko Devel, kerela e Devle hovavno, soske na verujnela ko adava so o Devel svedočingja bašo plo Čhavo. 11 A adava svedoštvo tano akava: o Devel dengja amen večno životo hem adava životo tano ko leskoro Čhavo. 12 Koj priznajnela e Čhave, isi le večno životo, a koj na priznajnela e Devleskere Čhave, nane le večno životo.

13 Pišinava tumenge akala bukja te šaj te džanen kaj tumen isi tumen večno životo, tumen so verujnena ko e Devleskere Čhaveskoro anav. 14 Amen isi amen doverba ko Devel* kaj bilo so te roda, ako tano sprema leskiri volja, ov šunela amen. 15 Hem ako džanaja kaj ov šunela amen, bilo so te roda lestar, džanaja kaj ka dobina adava so rodingjem, soske rodingjem adava lestar.

16 Ako nekoj dikhela kaj leskoro phral kerela grevo so na ingarela ko meribe, neka molinel pe baši leste hem o Devel adale phraleske ka del životo. O Devel ka del životo okolenge kola so na kerena grevo so ingarela ko meribe. Isi grevo kova so ingarela ko meribe, ama me nikaske na vakerava te molinel pe bašo okova so kerela asavko grevo. 17 Sa soj nepravedno tano grevo, ama sepak, isi grevo kova so na ingarela ko meribe.

18 Amen džanaja kaj sekoj soj bijamo taro Devel na kerela grevo, nego le arakhela le okova soj bijamo taro Devel,* hem o Beng* našti te pipinel le. 19 Džanaja kaj amen siem taro Devel, a celo sveto tano e Bengeske* ko vasta. 20 Ama amen džanaja kaj e Devleskoro Čhavo alo hem pomožingja amenge te haljova te šaj te pendžara e čačutne Devle. Amen preku leskoro Čhavo, o Isus Hristos, siem ko jekhipe e čačutne Devlea. Ov tano o čačutno Devel hem o večno životo. 21 Mle mangle čhave, arakhen tumen taro idolija.