Lekcija 9
E Devleskere sluge mora te oven čista
Soske mora te ova čista ko sa? (1)
Sar šaj te ova duhovno čista? (2)
Moralno čisto? (3)
Čisto ko misle? (4)
Telesno čisto? (5)
Soske valjani te pazina sar kjeraja lafi? (6)
1. O Jehova tano čisto hem sveto Devel. Ov rodela taro ple sluge te ačhoven čista — duhovno, moralno, ko misle hem telesno (1. Petrovo 1:16). Valjani but buti te šaj te ačhovelpe čisto anglo e Devleskere jakha. Amen dživdinaja ko jek sumnal so nae čisto. Isto agjaar, valjani te borinamen amare slabostencar kola so čhivenamen te kjera grevo. Ama na valjani te pomukha.
2. Duhovno čisto: Ako mangaja te služina e Jehovaske, našti te ikjera o običaija ja odova so sikavela i hovavni religija. Mora te ikljova tari hovavni religija hem nisar te na podržinala (2. Korinkjanite 6:14-18; Otkrovenie 18:4). Akana, kjeda džanaja ko i o Devel, mora te pazinamen taro manuša so hovavena bašo Leste (2. Jovanovo 10, 11).
3. Moralno čisto: O Jehova mangela leskere sluge ko sakova vakti te dživdinen sar pravo hristijanja (1. Petrovo 2:12). Ov dikhela sa so kjeraja pa čak okova so kjerajale garavindor (Evreite 4:13). Valjani te cidamen taro seksualno nemoral hem taro javera navike kola so nae čista (1. Korinkjanite 6:9-11).
4. Čisto ko misle: Ako čhivaja amare gogjate čisto misle, tegani sa so kjeraja ka ovel čisto (Filipjanite 4:8). Ama, ako ikjeraja ki godi nečisto misle, odova ka čhivel amen te kjera bilačhe bukja (Matej 15:18-20). Valjani te cidamen taro zabave kola so amende ka čhiven melale misle. Amari godi šaj te phera čisto mislencar ako proučinaja i Biblija.
5. Telesno čisto: Bašo odova so služinaja e čisto Devleske, valjani amari snaga hem amare šeja te oven čista. Kjeda ka dža ko WC palo odova mora te thova amare vasta. Odova valjani te kjera isto angleder te ha ja te astara o hajbe. Ako nane kanalizacija, tegani o pisluko valjani te parunelpe (5. Mojseeva 23:12, 13). Pazindor amari snaga te ovel čisto, ka ovel amen pošukar sastipe. Amaro kher trebela te ovel čisto sar andre agjaar avri. Ko than kote so dživdineja tlo kher valjani te del šukar primer.
6. Čisto ko lafikjeribe: E Devleskere sluge sakova puti mora te vakjeren o čačipe. Okola so hovavena nae te khuven ko e Devleskoro Thagaripa (Efešanite 4:25; Otkrovenie 21:8). E Jehovaskere sluge na akošena. Ola na šunena hem na vakjerena bezobrazna vicija. Bašo odova so i čista ko lafikjeribe, ola tane pendžarde sar po javera manuša ki buti, ki sikavni hem maškaro komšije (Efešanite 4:29, 31; 5:3).
[Pictures on page 18, 19]
E Devleskere sluge mora te oven čista ko sa o bukja