Lekcija 12

Te cenina amaro dživdipe thaj o rat

Sar valjani te dikha ko dživdipe? (1) Abortus? (1)

Sar sikavena e Devleskere sluge kaj arakhena pumari bezbednost? (2)

Pogrešno li te mudarenpe životne? (3)

Kola tane disave navike so sikavena kaj na ceninelape o dživdipe? (4)

Kova i e Devleskoro zakoni bašo rat? (5)

So vakjerela o Devel baši transfuzija? (6)

1. Taro Jehova avela amenge o dživdipe. Sa so dživdinela, pumaro dživdipe dugunjena e Devleske (Psalmi 36:9). Anglo Devel o dživdipe tano sveto. Čak o dživdipe jekhe čhaveskoro so nae bijando, andre ki daj, e Jehovaske tano skapoceno. Namerno te mudarelpe asavko bebe, tano grevo anglo e Devleskere jakha (2. Mojseeva 21:22, 23; Psalmi 127:3).

2. O prava hristijanja arakhena pumari bezbednost. Ola dikhena lengjere vrdija hem khera te oven bezbedna (5. Mojseeva 22:8). Valjani li e Devleskere sluge te čhiven po dživdipe ko rizik odoleja so ka uživinen ko opasna sportija, sar so i tano o boksi? Na! Ola na dikhena filmija ja TV programe kote so sikavena maribe hem mudaribe (Psalmi 11:5; Jovan 13:35).

3. O dživdipe e životnengoro isto agja­ar tano sveto anglo Devel. Samo ako valjani oleskje hajbe, urajbe ja ako leskoro dživdipe tano ko opasnost, jek sluga e Devleskoro šaj te mudarel životne (1.  Mojseeva 3:21; 9:3; 2. Mojseeva 21:28). Ama ako mučinenape ja mudarenape bašo sport ja bašo kjefi, tegani tano pogrešno (Izreki 12:10).

4. O pušibe hem i droga nae e Devleskere slugenge. Akala navike tane pogrešna odoleske so 1) kjerena amen ­lengjere robija, 2) štetinena amenge thaj 3) meljarena amaro telo (Rimjanite 6:19; 12:1; 2. Korinkjanite 7:1). Šaj te ovel but pharo te mukha akala bila­čhe navike, ama mora te kjera odova te šaj te ugodina e Jehovaske.

5. O rat tano sveto anglo Devleskere jakha. O Devel vakjerela kaj i duša ja o dživdipe, tano ko rat. Odoleske, grevo i anglo Devel te halpe o rat. Isto agja­ar tano grevo te halpe mas so nae lestar cedimo fino o rat. Te sine disavo životno tasavdo ja mulo ki stapica, navaljani te halpe. Ako i mudardo valjani sigate te cedinelpe lestar o rat (1. Mojseeva 9:3, 4; 3. Mojseeva 17:13, 14; Dela 15:28, 29).

6. Pogrešno li tano te le rat preku transfuzija? Setintu, o Jehova rodela te na la rat. Odova sikavela kaj na valjani ko nisavo način te la rat taro javera ko amaro telo, čak ni amaro rat kova sine skladirimo (Dela 21:25). Znači, o prava hristijanja na valjani te len transfuzija. Šaj te len javera medicinska tretmanja, so i tane bizo rat. Ola mangena te dživdinen, ama na mangena te spasinen pumaro dživdipe odolea so ka phagjen e Devleskoro zakoni (Matej 16:25).

[Pictures on page 25]

Te ova e Devleske ki volja, mora te na la rat hem te cidamen taro nečisto navike