7 PUČIBE

So ako nekoj terinela man te ovel man seks?

SOSKE TANO VAŽNO

Tli odluka dali ka ovel tut seks angleder te khuve ko brako, ka vlijajnel ki tli idnina.

SO BI KEREA TU?

Zamislin tuke i situacija: I Sunita džala e Deniseja samo duj masek, a te phene džanela pe lea celo životo. Non-stop bičhalena peske porake, saatencar kerena lafi ko telefoni hem ka phene jekh jekheskere misle čitinena! Ama akana o Denisi mangela nešto pobuter nego samo te kerel lafi.

Ko akala duj masek ola na kergje ništo pobuter, osven te astaren pe taro vas hem ponekogaš kratko te čuminen pe. I Sunita mangela te ačhoven ko adava. Ama, na mangela te našavel ni e Denise. Samo ov kerela oj te osetinel pe šuži hem posebno. I Sunita razmislinela peske: „Ama, amen but mangaja amen...“

Ako sian dovolno baro baši vrska, so bi kerea sine tu te ove ko e Sunitakoro than?

AČHOV HEM RAZMISLIN!

Bluza koristimi kosibaske džamija — O seksualna odnosija tane poklon taro Devel samo okolenge soj tane ko brako. Ako nekas isi le odnosija angleder te ovel ko brako, ov zloupotrebinela akava poklon. Adava i tano isto sar te le jekh bluza soj tuke poklon, a te koristinela sar krpa čistibaske

Ako na lea ko obzir nesavo fizičko zakon, na primer o zakon baši gravitacija, ka ovel tut posledice. Isto i tano ako na šunea nesavo moralno zakon, primer o zakon te pazine tut taro blud (1. Solunjanite 4:3).

Save ka oven o posledice ako na šunela pe akaja zapoved? Ki Biblija pišinela: „Koj kerela blud, grešinela protiv plo telo“ (1. Korinkjanite 6:18). Ki koja smisla?

But istražuvačija phenena kaj o terne so sine len seks angleder o brako, akana isi len nesave taro akala posledice:

PERENA PIŠMANI. But terne pele pišmani so sine len seks angleder o brako.
NANE LEN DOVERBA. Palo seks, o solduj džene počminena te pučen pe: „Kasaja javerea/javeraja sukja?“
RAZOČARINENA PE. But čhaja poviše mangena te oven zaštitime a na iskoristime. Obično, but murša, palo seks nesave čhajaja, oj lenge vekje nane interesno.
Zaklučok: Ako isi tut seks angleder o brako, tegani gazinea tut korkori hem otkažinea tut taro nešto soj but vredno (Rimjanite 1:24). Tlo telo tano but vredno hem ma mukh o javera te iskoristinen le!

Sikav kaj sian odlučno te šune e Devleskiri zapoved te cide tut taro blud (1. Solunjanite 4:3). Ako jekh dive khuvea ko brako, tegani ka šaj te ovel tut seks. Ka šaj te uživine ki leste, bizo te osetine o posledice taro seks angleder o brako — te pere pišmani, te grižine tut hem te osetine tut nesigurno (Izreki 7:22, 23; 1. Korinkjanite 7:3).

SO MISLINEA?

Ako nekoj čače mangela tut, dali ka mangel te anel ki opasnost tlo fizičko hem emocionalno sastipe?
Ako nekoj čače mangela tut, dali ka čhivel tut te rumine tlo šukar odnos e Devlea? (Evreite 13:4).