I Vavilonsko kula

Palo Potop, o čhave e Noeskere hem lengere romnja sine len but čhave. O familie ovena sine sa pobare, hem počmingje te živinen ko različna thana ki Phuv, sar so vakergja lenge o Jehova.

Ama, nesave familie na šunena sine e Jehova. Ola vakergje: „Te kera amenge diz hem te ačhova akate. Ka kera doborom bari kula so ka ovel uči dži ko nebo. Agjaar ka šaj te ova pendžarde maškar o manuša“.

Ama, e Jehovaske na svidžingja pe adava so počmingje te keren o manuša, adaleske čhinavgja len. Džanea li sar kergja adava? Ov kergja taro jekh puti o manuša te počminen te keren lafi ko različna čhibja. Adaleske so našti sine te haljoven pe maškar peste, ola čhinavgje te keren i kula. I diz so počmingje te keren la sine pendžardi sar Vavel, so značinela „zbrka“. O manuša počmingje te džan peske adathar hem te živinen ko javera thana ki celi Phuv. Ama, ola kerena sine ponadari da lošna bukja ko thana kote so gele te živinen. Dali ki Phuv sine nekoj so mangela e Jehova? Bašo adava ka dikha ko javer poglavje.