O Jehova biringja e Isus Navine

O Mojsej beršencar vodingja e Izraelcon, ama akana phurilo hem alo dži ko krajo taro plo životo. O Jehova phengja leske: „Tu nane te khuve e Izraelconcar ki Vetimi phuv. Ama, ka mukhav tut te dikhe la“. Palo adava, o Mojsej rodingja taro Jehova te birinel nevo vodači so ka vodinel e narodo. O Jehova vakergja leske: „Dža ko Isus Navin hem vaker leske kaj ov ka ovel o nevo vodači“.

O Mojsej vakergja e narodoske kaj panda hari ka merel hem kaj o Jehova biringja o Isus Navin te vodinel len dži ki Vetimi phuv. Palo adava, o Mojsej vakergja e Isus Navineske: „Ma dara. O Jehova ka pomožinel tut“. Palo nesavo vreme, o Mojsej uklilo ki planina Nevo, hem adathar o Jehova sikavgja leske i Vetimi phuv so vetingja la e Avraameske, e Isakoske hem e Jakoveske. O Mojsej sine le 120 berš keda mulo.

O Jehova vakergja e Isus Navineske: „Nakhen i reka Jordan, hem khuven ki phuv Hanaan. Ka pomožinav tut isto sar so pomožingjum e Mojseje. Sekova dive čitin mlo Zakoni. Ma dara hem ov hrabro. Dža hem ker adava so zapovedinava tuke“.

O Isus Navin bičhalgja duj špionja ki diz Erihon. Ki javer lekcija ka dikha nešto poviše bašo adava so ulo adari. Keda irangje pe o špionja, ola vakergje kaj o narodo šaj te džal te osvojnel i phuv Hanaan. Tajsutno dive, o Isus Navin vakergja e Izraelconge te kheden ple šatorija hem te ciden. Tegani ola mukhle prvo e sveštenikon so ingarena sine o kovčeg bašo sojuz te džan ki reka Jordan. I reka sine la but pani. Ama, samo so čhivgje po pro o sveštenikija ko pani, o pani šukilo! Tegani o sveštenikija gele ki sredina tari reka so šukili hem adari tergjovena sine sa džikote o Izraelcija na nakhle ki javer strana. So mislinea, dali akava čudo setinkergja len ko čudo so kergja le o Jehova ko Crveno More?

Palo nesave berša, o Izraelcija konečno resle ki Vetimi phuv. Adathe valjani sine te keren peske khera hem dizja. Šaj sine te ovel len nive, hem te sadinen zelenčuk hem ovošje. Adaja phuv sine doborom šukar so o manuša sine len but šuže bukja hajbaske hem pijbaske. Adaleske lake vakerela pe kaj tani phuv kote so thavdela sine avgin hem thud.