O Isus biringja dešuduj apostolija

Otkeda o Isus propovedingja okolu jekh tekvaš berš, alo vreme te anel jekh važno odluka. Ov valjangja te birinel učenikija kola so najviše ka sorabotinen lea hem kola so ka predvodinen ko hristijansko sobranie. Te šaj te anel šukar odluka, e Isuseske valjani sine pomoš taro Jehova. Ov gelo ki jekh planina kote so šaj sine te ovel korkori, hem adari molingja pe celo rat. Tajsutno dive sabajle, o Isus vikingja nesaven taro ple učenikija hem lendar biringja 12 apostolija. Setinea tut li sar sine lengere anava? Lengere anava sine Petar, Andrej, Jakov, Jovan, Filip, Vartolomej, Toma, Matej, Jakov — o čhavo e Alfejeskoro, Tadej, Simon hem Juda Iskariot.

Akala 12 apostolija valjani sine te patujnen e Isusea. Otkeda sikavgja len, ov bičhalgja len te propovedinen. O Jehova dengja len mokj te palden e demonen hem te sasljaren nasvalen.

O Isus dikhela sine e apostolen sar amala hem sine le doverba ki lende. O fariseija mislingje kaj ola nane pismena hem kaj tane prosta manuša. Ama, o Isus ceninela len sine hem sikavela len sine sar te propovedinen. Ola valjani sine te ačhoven lea ko najvažna momentija taro leskoro životo, sar na primer angleder te merel hem palo leskoro voskresenie. Isto sar o Isus, poviše taro apostolija sine tari Galileja. Nesave lendar sine ženime.

O apostolija sine nesovršena hem kerena sine greške. Ponekogaš vakerena sine nešto bizo te razmislinen hem anena sine nesave lošna odluke. Osven adava, ponekogaš sine but nestrpliva, pa čak akošena pe sine koj lendar tano považno. Ama, o apostolija sine šukar manuša so mangena sine e Jehova. Pokasno, ola valjani sine te oven o temeli taro hristijansko sobranie.