O Isus sasljarela sine ki sabota

O fariseija mrzinena sine e Isuse hem rodena sine pričina te astaren le. Ola vakerena sine kaj na smejnela te sasljarel nasvalen ki sabota, ko dive bašo odmor. Jekh sabota, o Isus dikhlja jekhe korole sar mangela peske ki ulica. Tegani vakergja ple učenikonge: „Dikhen sar e Devleskiri sila ka sasljarel akale manuše“. Tegani o Isus čhungargja ki phuv, taro adava kergja čik hem laja makhlja o jakhja e manušeskere. Palo adava vakergja leske: „Dža, thov te jakhja ko ezero Siloam“. Otkeda kergja akava, o manuš šaj sine prvo puti ko životo te dikhel.

O manuša našti sine te verujnen ko akava. Ola vakergje: „Akava li tano o manuš so bešela hem mangela peske sine, ili samo ličinela ki leste?“ Ov phengja lenge: „Me sium adava. Taro bijanibe sium korolo, ama akana dikhava!“ O manuša pučle le: „A sar šaj akana te dikhe?“ Keda vakergja lenge so ulo, ola ingargje le ko fariseija.

O manuš vakergja e farisejenge: „O Isus čhivgja mange čik ko jakhja hem vakergja mange te džav te thovav me jakhja. Me šungjum le, hem akana ake, dikhava“. O fariseija vakergje leske: „Ako o Isus sasljarela ki sabota, tegani i mokj leskiri na avela taro Devel“. Ama, o javera vakergje: „Ako i mokj leskiri na avela taro Devel, tegani ov ka našti sine te sasljarel“.

O fariseija vikingje e manušeskere roditelen hem pučle len: „Sar šaj tumaro čhavo akana te dikhel?“ Ola darandile soske o fariseija zakaningje pe kaj sekoj so ka verujnel ko Isus ka ovel isklučimo tari sinagoga. Adaleske vakergje: „Na džanaja. Pučen le“. O fariseija ponadari da pučena sine e manuše, hem ko krajo ov vakergja lenge: „Ama vakergjum tumenge sa so džanava. Soske panda pučena man?“ O fariseija but holjangje hem frdingje le avri.

O Isus arakhlja akale manuše hem pučlja le: „Verujnea li ko Mesija?“ Ov vakergja: „Te džanav sine koj adava, ka verujnav sine“. O Isus vakergja leske: „Me sium o Mesija“. Kobor šukar sine o Isus! Na samo so sasljargja e manuše, nego pomožingja le te ovel le vera ki leste.