Ola dikhle mangipe ko delo

I Jomara hem lakere phralja o Marčelo hem o Iver živinena ko jekh tikno gav ki Gvatemala. Oj počmingja jekhe phenjaja te proučinel i Biblija hem kratko palo adava lakere phralja da počmingje te proučinen. Ama sine jekh problemi. O sotrin tane korole hem na džanena sine te čitinen ko Brajovo pismo. Adaleske, i phen so proučinela sine lencar čitinela sine o materijali hem o stihija so sine dende ki lekcija.

Isto agjaar sine lenge pharo te oven prisutna ko sostanokija. Ola našti sine korkori te patujnen 40 minutija ki najpaše dvorana. Ama o phralja taro sobranie pomožingje lenge te oven prisutna ko sa o sostanokija. Hem keda počmingje te učestvujnen ki teokratsko škola, o phralja pomožingje lenge te pamtinen pumare prezentacie.

Ko Maj 2019 berš počmingje te ikeren pe sostanokija ko lengoro gav. Ko adava vreme jekh bračno pari soj opšta pionerija selingja pe ko adava gav. Iako ola na džanena sine sar te pišinen hem te čitinen ko Brajovo pismo, sepak čhivgje peske cel te sikaven akale trine dženen te čitinen hem te pišinen. Adaleske gele ki jekh biblioteka te sikljoven bašo Brajovo pismo te šaj te džanen sar te sikaven e javeren te koristinen adava pismo.

Palo nesave masekija o sotrin šaj sine šukar te čitinen ko brajovo pismo hem adava pomožingja lenge duhovno te napredujnen.a Akana i Jomara, o Marčelo hem o Iver služinena sar opšta pionerija. O Marčelo tano sluga-pomošniko. Ola celo kurko tane zafatime ki služba bašo Jehova. Lengiri revnost pomožingja e javerenge da te oven revna.

O sotrin tane but blagodarna baši poddrška so dobinena la taro sobranie. I Jomara vakerela: „Taro početok sikavgje amenge o Svedokija čačutno hristijansko mangipe“. O Marčelo vakerela: „Isi amen but šukar amala ko amaro sobranie hem siem delo tari jekh megjunarodno familija soj ko jekhipe“. I Jomara hem lakere phralja edvaj adžikerena o dive keda i phuv ka ovel raj (Ps. 37:10, 11; Isa. 35:5).