Jekh šukar postapka

KI JEKH tikni diz ko Gudžarat (Indija), ko krajo taro 1950-ta berša o dad e Džoneskoro ulo e Jehovaskoro svedoko. Ama, o Džon, leskere duj phralja, o trin phenja hem i daj sine revna katolikija. Adaleske, protivinena pe sine ple dadeske.

Jekh dive, e Džoneskoro dad pučlja le dali šaj te ingarel jekh pismo jekhe phraleske taro sobranie. Ama, adava sabaj o Džon čhingja plo naj džikote phravela sine jekh limeno bura. Adaleske so manglja te šunel ple dade, o Džon pakjargja plo naj jekhe krpaja hem gelo te ingarel o pismo.

Keda o Džon reslja ko adava than, ov dengja o pismo e phraleskere romnjake. Oj sine e Jehovaskoro svedoko. Oj dikhlja kaj leskoro naj tano pakjardo krpaja hem adaleske manglja te pomožinel le. Lelja pli kutija baši prva pomoš, čistingja i rana hem pakjargja leskoro naj. Palo adava kergja leske čaj hem celo vreme ko jekh šukar način kergja lea lafi baši Biblija.

Adaleske so sine šukar lea, ov počmingja pojaver čhane te dikhel ko Svedokija. Ov pučlja la duj pučiba bašo bukja kolende so verujnena e Jehovaskere svedokija kola so razlikujnena pe tari Katoličko crkva. Pučlja la dali o Isus tano Devel hem dali o hristijanja valjani te molinen pe e Marijake. I phen džanela sine i čhib gudžarati hem adaleske šaj sine te odgovorinel leske ki leskiri čhib. Oj sikavgja leske o odgovorija tari Biblija hem dengja le i brošura Akava šukar haberi bašo Carstvo.a (Dikh i fusnota.)

Palo adava, keda čitingja i brošura, halilo kaj adava tano o čačipe. Ov gelo ko plo svešteniko hem pučlja le o ista duj pučiba. O svešteniko but holjangja hem frdingja i Biblija upri leste, hem vikingja: „Uljan Beng! Sikav mange ki Biblija kote pišinela kaj o Isus nane Devel. Sikav mange kote pišinela kaj na valjani te molina amen e Marijake. Sikav mange!“ O Džon sine but iznenadimo tari reakcija e sveštenikoskiri. Ov vakergja leske kaj nikogaš poviše nane te džal ki Katoličko crkva. Čače da kergja agjaar!

O Džon počmingja te proučinel e Svedokoncar, prifatingja o čačipe hem počmingja te služinel e Jehovaske. Sar nakhela sine o vreme, javera da tari leskiri familija kergje o isto. Iako ottegani nakhle 60 berša, o belego ko leskoro naj panda setinkerela le ki jekh šukar postapka koja so pottikningja le celo životo te služinel e Jehovaske (2. Kor. 6:4, 6).