Lekcija 1

Sar šaj te dodžane so rodela o Devel?

Kola važna informacije arakhljovena ki Biblija? (1)

Kotar amenge i Biblija? (2)

Soske valjani te proučine i Biblija? (3)

1. I Biblija tani but baro poklon taro Devel. Oj tali sar jek lil so pišingjale jek dat so but mangela pe čhaven. Oj vakjerela o čačipe bašo Devel — ko i talo ov thaj so anglo leskere ja­kha i šukar, a so na. Isto agjaar sikavela amen sar te ikljova ko krajo e problemencar thaj sar šaj te ova bahtale. Samo ki Biblija šaj te dodžana so rodela amendar o Devel (Psalmi 1:1-3; Isa­ija 48:17, 18).

2. I Biblija tani pišimi bašo 1.600 berša, pišingjela 40 murša, počmindor tari 1513 a. a. e. Isila 66 tikne lila. O manuša so pišingje i Biblija, sine vodime taro Devel. Ola pišingje leskere misle, a na ple. Javere lafencar, i Biblija tani taro Devel, a na taro manuša (2. Timotej 3:16, 17; 2. Petrovo 1:20, 21).

3. O Devel kjergja i Biblija te ovel točno prepišimi hem arakhli. Ko sumnal but pobuter isi kjerde Biblije, nego li javera lila. Kjeda ka počmine te pro­učine i Biblija sarine nae te radujnenpes tuja, ama ma de te čhinaventu. Tlo večno dživdipe zavisinela taro odova te džane bašo Devel thaj te kjere leskiri volja, makar šaj nae te ovel tuke lokho (Matej 5:10-12; Jovan 17:3).