Lekcija 3
Ko i o Isus Hrist?
Soske i Biblija vakjerela e Isuseske „prvoroden“? (1)
Soske baši leskje vakjerelape kaj tano „Rečta“? (1)
Soske o Isus alo ki phuv sar manuš? (2-4)
Soske kjergja čudija? (5)
So ka kjerel o Isus ko vakti so ka avel? (6)
1. Angleder te avel ki phuv, o Isus sine upre ko nebo sar duho. Ov sine i prvo buti so o Devel kjergja, hem odoleske baši oleste vakjerelape kaj tano „prvoroden“ (Kološanite 1:15; Otkrovenie 3:14). Samo e Isuse, o Devel kjergjale korkoro. Sa o javera bukja, upre hem tele ki phuv, o Jehova kjergjalen barabar pe čhaveja kova so sikavgjape sar but bukjarno (Izreki 8:22-31; Kološanite 1:16, 17). Sa so mangela sine te vakjerel o Devel, vakjerela sine preku po čhavo. Odoleske baši oleste ki Biblija vakjerelape kaj tano „Rečta“ (Jovan 1:1-3; Otkrovenie 19:13).
2. E Isuseskoro dat nae disavo manuš, odoleskeda naele nisavo grevo. O Devel kjergja jek čudo ov te bijangjol tari i Marija. Ov bičhalgjale bašo trin bukja: 1) te sikavel amen savo i tano o Devel hem kola i leskere namere (Jovan 18:37), 2) te del amen primer sar te ačhova verna dži ko krajo (1. Petrovo 2:21) hem 3) te del po dživdipe bašo amare grevija so ingarena ko meribe. Soske valjani sine odova? (Matej 20:28).
3. I Biblija vakjerela kaj o prvo manuš, o Adam, kjergja grevo odoleja so našungja e Devleskere lafija. Odoleske o Devel vakjergja leske kaj valjani te merel (1. Mojseeva 3:17-19). Kjeda o Adam odlučingja te na dživdinel sar so rodela lestar o Devel, od tegani, nasine pobuter manuš bizo grevo. Odoleske počmingja te phujrol hem ko krajo mulo. Sarine amen olestar, isiamen o grevo, nasvaljovaja, phujrovaja hem meraja. Šaj li sa o manuša te spasinenpe? (Rimjanite 3:23; 5:12).
4. O Isus sine bizo grevo sar so sine o Adam ko početok. Ama, o Isus ačhilo dži ko krajo poslušno e Devleske čak kjeda sine ko baro iskušenie. Odoleske šajsine te del plo dživdipe, so i bizo grevo, hem odoleja te kjinel e Adameskoro grevo. Bašo akava ki Biblija vakjerelape kaj ov učhargja amare grevija. Odolea oslobodinkjergja amen taro o grevo so anela amenge meribe. Sarine so isilen bari vera ko Isus šaj te oven lengje prostime o grevija hem te dobinen večno dživdipa (1. Timotej 2:5, 6; Jovan 3:16; Rimjanite 5:18, 19).
5. Kjeda sine o Isus ki phuv sasljarela sine e nasvalen, čhaljarela sine e bokhalen hem but puti čhinagja bare balvala. Čak vazdela sine e mulen. Soske keregja sa odola čudija? 1) Sine leske grevo bašo manuša so mučinenape hem manglja te pomožinel lenge. 2) Sa o čudija so kergja sikavgje kaj ov i e Devleskoro čhavo. 3) Ola sikavgje, sa so ka kjerel e manušenge so šunenale kjeda ka ovel Thagar upri i phuv (Matej 14:14; Marko 2:10-12; Jovan 5:28, 29).
6. Kjeda o Isus mulo, o Devel vazdingjale taro mule hem ov irangjape upre ko nebo sar angeli (1. Petrovo 3:18). Palo nesavo vakti, o Devel kjergjale Thagar. Panda hari o Isus ka cidel sa o lošnipe hem o muke tari phuv (Psalmi 37:9-11; Izreki 2:21, 22).
[Pictures on page 7]
O Isus sikavela sine bašo Devel, kjerela sine čudija, čak dingja po dživdipe amengje