Lekcija 4
Ko i o Beng?
O Satana o Beng — kotar alo? (1, 2)
Sar o Satana hovavela e manušen? (3-7)
Soske valjani te protivinetu e Bengeske? (7)
1. O lafi ,Beng‘ ki orginalno čhib značinela kjeda neko vakjerela hovajbe bašo javera. „Satana“ značinela dušmani. Akala tane anava so i dinde e Devleskere najbare dušmaneske. Ko početok, ov sine jek taro šukar angelija ko nebo e Devleja. Sar nakhela sine o vakti, ov mislinela sine baši peste kaj i but baro hem manglja te obožavinen le ko than e Devleske (Matej 4:8-10).
2. Akava angeli, o Satana, kjergja lafi e Evaja preko jek sap. Hovajbaja, čhivgja e Eva te na šunel e Devle. Akaleja o Beng vakjergja kaj o Devel naele pravo te thagarel upro sa, kaj o Devel nae Najbaro. O Satana manglja te vakjerel kaj o Devel nae šukar Thagar hem kaj na thagarela šukar e manušencar. Isto agjaar mislingja kaj ni jek manuš nae te ačhol e Devleske verno dži ko krajo. Agjaar o Beng ulo dušmani e Devleskoro. Odoleske vakjerelape leske kaj tano Beng hem Satana (1. Mojseeva 3:1-5; Jov 1:8-11; Otkrovenie 12:9).
3. O Satana dikhela te hovavel e manušen te obožavinen oleste (2. Korinkjanite 11:3, 14). Jek način ko kova so hovavelalen tano preko i hovavni religija. Kjeda jek religija sikavela hovajbe bašo o Devel, tegani oj tani kotaro Beng (Jovan 8:44). O manuša kola tane ki odoja religija šaj dušaja verunjena kaj obožavinena e pravo Devle. Ama, ustvari, ola služinena e Bengeske. Ov tano ,devel akale sumnaleskoro‘ (2. Korinkjanite 4:4).
4. Spiritizam tano kjeribe buti bilačhe duhoncar, odova tano jek način sar hovavela o Satana e manušen te oven leskere. Ola rodena e lošno duhondar te zaštitinenlen, te šaj te kjeren bilačhipe javerengje, te džanen so ka ovel olencar poodorig hem te šaj te kjeren disavo čudo. Palo sa akala bukja bešela o Beng. Ako mangaja te kjera okova so o Devel rodela amendar, na valjani te ovelamen nisavi buti e bilačhe duhoncar (5. Mojseeva 18:10-12; Dela 19:18, 19).
5. O Satana hovavela e manušen odoleja so terinelalen te odvojnen o rase hem te obožavinen o politička organizacie. Disave mislinena kaj lengjiri nacija ja rasa tani pošukar taro javerengjiri. Ama odova nae čače (Dela 10:34, 35). Javera manuša adžikerena o politička organizacie te rešinen e manušengjere problemija. Kjerindoj odova, ola frdena e Devleskoro Thagaripa. Ama baš odova Thagaripe ka rešinel sa amare problemja (Daniel 2:44).
6. Javer način sar hovavela e manušen tano preko o grešna želbe. O Jehova vakjerela amengje te naša taro o grešna bukja soske džanela kaj odova ka kerel amengje zijani (Galatite 6:7, 8). Disave manuša ka mangen te ove lencar kjeda kjerena o bilačhe bukja. Ama, ma bistre kaj o Beng mangela te kjere odova (1. Korinkjanite 6:9, 10; 15:33).
7. O Beng šaj te kulandinel e manušen te protivinenpe amenge te cidamen taro Jehova. Disave manuša so mangealen šaj but te holjanen tuke so proučinea i Biblija. Javera šaj ka asan tuke. Ama, kastar zavisinela amaro dživdipa? O Satana mangela te daravel tut te na sikljove bašo Jehova. Ma muk te pobedineltu (Matej 10:34-39; 1. Petrovo 5:8, 9). Ako na kjergjan odova so mangela o Beng ka radujne e Jehovaskoro vilo hem ka sikave kaj samo Ov talo odova so isile pravo te thagarel ki celo phuv (Izreki 27:11).
[Pictures on page 9]
I hovavni religija, o spiritizam hem o delibe rase zavedinena e manušen
[Picture on page 9]
Protivintu e Bengeske odoleja so ka sikljove i poodorig bašo o Jehova