Lekcija 6

So i e Devleskoro Thagaripa?

Kote i e Devleskoro Thagaripa? (1)

Ko i leskoro Thagar? (2)

Kobor džene ka oven e Isusea ko Thagaripe? (3)

So sikavela kaj amen dživdinaja ko posledna dive? (4)

So ka kjerel e Devleskoro Thagaripe e manušengje ko avutno vakti? (5-7)

1. Kjeda sine o Isus ki Phuv, sikavela sine ple učenikon te molinenpe bašo e Devleskoro Thagaripa. E Devleskoro Thagaripe tano jek posebno vlada koja so isila thagar. Ov i upre hem ka vladinel upri phuv. Ka sikavel kaj o Devel i sveto hem kaj leskoro anav i Najbaro. Ov ka kjerel e Devleskiri volja te ovel ki Phuv sar so i upre ko nebo (Matej 6:9, 10).

2. O Devel dingja lafi kaj o Isus ka ovel Thagar ko Leskoro Thagaripa (Luka 1:30-33). Kjeda o Isus sine ki Phuv, sikavgjape kaj ka ovel but pravedno hem najšukar Thagar. Kjeda irangjape ko nebo, na ulo odma Thagar kje Devleskoro Thagaripe (Evre­ite 10:12, 13). Sar so dingja po lafi, ko 1914 berš o Jehova dingja e Isuseske vlast. Od tegani pa naakari, o Isus vladinela ko nebo sar Thagar kova so čhi­gja­le o Devel (Daniel 7:13, 14).

3. O Jehova biringja disave verno manušen tari Phuv so ka džan ko nebo. Ola e Isusea ka thagaren, ka sudinen hem ka sikaven sa e ma­nušen (Luka 22:28-30; Otkrovenie 5:9, 10). Akaja grupa so ka vladinel e Isusea, ki Biblija vakjerelape lengje „malo stado“. Ola tane 144.000 džene (Luka 12:32; Otkrovenie 14:1-3).

4. Samo so ulo o Isus ­Thagar, fr­dingja e Satana hem leskere bila­čhe angelen taro nebo ki Phuv. Odoleske taro 1914 berš naakari, o bilačhipe ki Phuv ulo but baro (Otkrovenie 12:9, 12). Maribe, bokhalipe, nasvalipe, bilačhipe — sa akava sikavela kaj o Isus thagarela hem kaj dživdinaja ko posledna dive taro akava sumnal (Matej 24:3, 7, 8, 12; Luka 21:10, 11; 2. Timotej 3:1-5).

5. O Isus panda hari ka sudinel e manušengje. Ka odvojnelen sar jek ovčari so odvojnela e bakhren taro buznja. O ,bakhre‘ tane okola so ka sikavenpe verna hem gogjaver e Isu­se­ske dži ko krajo. Ola ka dobinen večno dživdipe ki phuv. O ,buznja‘ tane okola so namangena te šunen bašo e Devleskoro Thagaripe (Matej ­25:31-34, 46). Tegani sa o asavke manuša ka oven uništime (2. Solunjanite ­1:6-9). Ako mangaja te prifatinel amen o Isus, mora te sikljova bašo e Devleskoro Thagaripe hem te kjera odova so sikljovaja (Matej 24:14).

6. Sako phuv isila pli vlada. But puti akala phuvja marenape maškaro peste. Ama, e Devleskoro Thagaripa ka uništinel sa akala vlade. Samo ov ka vladinel upri Phuv (Daniel 2:44). Tegani nae te ovel pobuter maribe, kriminal hem nasilstvo. Sa o manuša ka dživdinen rahati ko jekhipe (Mihej 4:3, 4).

7. Kjeda o Isus ka thagarel 1.000 berša, o verno manuša ka oven bizo grevo thaj celo Phuv ka ovel raj. Dži ko krajo taro 1.000 berša o Isus ka kjerel sa so rodingja lestar o Devel. Tegani ka iranel o Thagaripe pe dadeske (1. Korinkjanite 15:24). Soske na vakjereja te manglengje bašo odova so ka kjerel e Devleskoro Thagaripa?

[Picture on page 13]

Kjeda o Isus ka thagarel ki phuv, sa o manuša ka mangenpe