Lekcija 15
Pomožin javerengje te kjeren
e Devleskiri volja
Soske te vakjere javerenge bašo odova so sikljoveja? (1)
Kasaja šaj te deline o šukar haberija tari Biblija? (2)
So šaj te ovel kjeda ponašinejatu šukar? (2)
Kjeda šaj te propovedine jekajek e Jehovaskere svedokoncar? (3)
1. Dži akana sikljiljan but šukar bukja tari Biblija. Odova so sikljiljan valjani te pomožineltu te ove manuš sar so mangela o Devel (Efešanite 4:22-24). Odova so sikljoveja tano but važno soske ka anel tuke večno dživdipe (Jovan 17:3). Ama, valjani javerada te šunen o šukar haberija tari Biblija te šaj te spasinenpe. Sa o prava hristijanja mora te svedočinen javerenge. Odoja tani zapoved taro Devel (Rimjanite 10:10; 1. Korinkjanite 9:16; 1. Timotej 4:16).
2. Šaj te počmine te vakjere te najpašenge bašo akala šukar bukja. Vakjer te familijake, te amalenge, ki sikavni te amalenge hem okolencar so kjereja buti. Ov ljubezno hem strplivo kjeda kjereja odova (2. Timotej 2:24, 25). Ma bistre, o manuša pobuter dikhena odova so kjereja, a na so vakjerea. Odoleske, tle šukar postapke šaj te kjeren o javera te šunen so ka vakjere bašo Devel (Matej 5:16; 1. Petrovo 3:1, 2, 16).
3. Hari pohari, kjeda ka kjere sa odova so sikljiljan, tegani tuda ka šaj te propovedine jekajek e Jehovaskere svedokoncar. Odova i but važno bašo tlo napredok (Matej 24:14). Kozom bahtalo ka ove kjeda tu ka pomožine javerenge te oven e Jehovaskere sluge hem večno te dživdinen! (1. Solunjanite 2:19, 20).