O Devel vikinelatu te ove lea paše

O Devel mangela te ove lea paše. Dali šaj te zamisline tuke kaj šaj te ove paše e Devleja so kjergja sa? O Avraam, kova so dživdinela sine ko purano vakti, sine e Devleskoro amal (Jakov 2:23). Javerada manuša, kola so spomninenape ki Biblija, isto agjaar sine paše e Devleja hem sine but blagoslovime. Avdive, o manuša taro celo sumnal ule e Devleja paše. Tuda šaj te ove e Devleja paše, sar amal.

Te ove e Devleja paše tano but pošukar nego li te ove amal bilo kole manušeja. O Devel nikjed na razočarinela ple verno manušen (Psalm 18:25). Te ove e Devleja paše tano but pošukar taro barvalipe. Kjeda o manuš ka merel, leskere love ka len javera manuša. Ama, okola manuša kola tane paše e Devleja, sar amala, isilen barvalipe kova so nikoj našti te lel le o lendar (Matej 6:19).

Disave manuša ka mangen te čhinaventu te sikljove bašo Devel. Odova ka kjeren čak tle amala ili ti familija (Matej 10:36, 37). Ako javera asana tuke ili daravenatu, puč tu: ,Kaste te šunav — e manušen ili e Devle?‘ Razmislin bašo akava: Ako nekoj vakjerela tuke te na ha, dali ka šunele? Džangjolape, na! Valjani tuke o hajbe te ačhove dživdo. Ama o Devel šaj te kjerel večno te dživdine. Odoleske nikjed ma dozvolin nekoj javer te čhinaventu te sikljove sar te ove e Devleja popaše (Jovan 17:3).