O Raj tano paše!

O bilačhe bukja so ovena akana ki Phuv sikavena kaj o Raj tano paše. I Biblija vakjerela kaj ka oven but lošno vaktija angleder te avel o Raj. Amen akana dživdinaja ko asavko vakti! Ake nekozom bukja so i Biblija vakjerela kaj ka oven:

Maribe. Ka uštel narodo protiv narodo, thaj vlada protiv vlada (Matej 24:7). Akava avdive dikhaja. Taro 1914 berš naakari, sine duj sumnaleskere mariba hem javera potikne. Ki olende mule milionja manuša.

Ka ovel but nasvalipe. Ko razno thana ka oven zaraze so anena dži ko meribe (Luka 21:11). Dali ulo akava? Oja. Rako, nasvalipe taro srce, tuberkoloza, malarija, SIDA thaj javera nasvalipa mudargje milionja manušen.

Nae dovolno hajbaske. I Biblija vakjerela: ,Ka ovel . . . bokhalipe‘ (Marko 13:8). Ki celo Phuv isi manuša so nae len so te han. Sakova berš milionja manuša merena taro bokhalipe. Akava tano panda jek buti so sikavela kaj panda hari ka avel o Raj.

Zemjotresija. ,Ka oven . . . zemjotresija ko razna thana‘ (Matej 24:7). Akava, isto agjaar, ulo ko amaro vakti. Taro 1914 berš pa naakari pobut taro milionja manuša mule ko zemjotresija.

Bilačhe manuša. O manuša ka mangen pobuter o pare hem ka mislinen samo peske. Pobuter ka mangen te uživinen nego li te mangen e Devle. O čhave nae te šunen pe roditelen (2. Timotej 3:1-5). Mislinea li kaj but manuša avdive tane asavke? Ola na poštunjena e Devle hem kjerena problemi okolenge so mangena te služinen e Devleske.

Kriminal. Isto agjaar ka ovel but nasilstvo (Matej 24:12). Šaj dikhea kaj o nasilstvo tano pobaro nego li so sine angleder nekobor berša. O manuša darana te na čorenlen ili te hovavenlen.

Sa akala bukja sikavena kaj e Devleskoro Thagaripe tano paše. I Biblija vakjerela: ,Kjeda ka dikhen kaj sa akava ovela, te džanen kaj e Devleskoro thagaripe tano paše‘ (Luka 21:31). So i e Devleskoro Thagaripe? Odova tano e Devleskiri vlada ko nebo so ka anel Raj akate ki Phuv. E Devleskoro Thagaripe ka uništinel e manušengere vlade (Daniel 2:44).