Muk i hovavni religija!

O Beng hem leskere demonija namangena te služine e Devleske. Ola mangena, ako šaj, te iranen sarinende protiv o Devel. Sar kjerena odova? Jek način tano preku i hovavni religija (2. Korinkjanite 11:13-15). Jek religija tani hovavni ako na sikavela o čačipe tari Biblija. I hovavni religija tani sar hovavne pare — ola dičhona sar čače, ama na vredinena. Ola šaj te kjeren tuke but problemija.

O Jehova tano Devel e čačipaskoro odoleske namangela i hovavni religija. Kjeda o Isus sine ki Phuv, tegani jek grupa religozna manuša mangle te mudarenle. Ola mislinge kaj služinena e Devleske ko ispravno način. Vakjergje: ,Jek Dat isi amen — o Devel‘. So mislingja o Isus? Ov vakjergja lenge: ,Tumaro dat tano o Beng‘ (Jovan 8:41, 44). Avdive but manuša mislinena kaj služinena e Devleske, ama ola služinena e Bengeske hem leskere demonenge! (1. Korinkjanite 10:20).

Isto sar jek rumimo kaš so dela lošno plodija agjaar o manuša tari hovavni religija kjerena lošna bukja. O sumnal tano pherdo problemencar so kjerenalen o lošna manuša. Isi nemoral, maribe, čoribe, maltretiribe, mudariba hem siluvanja. But džene kola so kjerena akala lošna bukja isilen pli religija, ama oj na ohrabrinelalen te kjeren šukar bukja. Ola našti te oven paše e Devleja ako kjerena i poodorig lošna bukja (Matej 7:17, 18).

I hovavni religija sikavela e manušen te molinenpe e idolenge. O Devel vakjerela te namolina amen anglo idolija. Akava tano pametno. Dali tu mangea nekoj te kjerel lafi samo te slikaja, a tuja na? Šaj li odova manuš te ovel tlo najpaše amal? Na, našti. O Jehova mangela te kjere lea lafi, a na disave ikonaja ili slikaja so nae dživdi (2. Mojseeva 20:4, 5).

I hovavni religija sikavela kaj šaj te mudare manušen kjeda isi maribe. O Isus vakjerga kaj sa okola so i paše e Devleja ka ovel len mangipe maškari peste. Amen na mudaraja e manušen so mangajalen (Jovan 13:35). Pogrešno tano čak te mudare e lošno manušen. Kjeda e Isuseskere protivnikija ale te astarenle, ov na manglja leskere učenikija te marenpe te šaj te spasinenle (Matej 26:51, 52).

I hovavni religija sikavela kaj o bilačhe mučinenape ko pekol. Ama, i Biblija sikavela kaj o grevo ingarela ko meribe (Rimjanite 6:23). O Jehova tano Devel so isile baro mangipe. Dali jek asavko Devel bi mučinela sine e manušen zasekogaš? Sigurno na! Ko Raj ka ovel samo jek religija, odoja so o Jehova ka vakjerel kaj tani šukar (Otkrovenie 15:4). Sa o religie so ikjerenape ko e Satanaskoro hovajbe, ka oven uništime.