O Jehova dengja sila e Samsone

But Izraelcija palem počmingje te obožavinen idolija, adaleske o Jehova mukhlja o Filistejcija te vladinen lengere phuvjaja. Ama, sine nesave Izraelcija so mangena sine e Jehova. Jekh lendar sine o Manoj. Le hem leskere romnja na sine len čhave. Jekh dive, o Jehova bičhalgja jekhe angele ki e Manojeskiri romni. O angeli vakergja lake: „Ka ovel tut čhavo. Ov ka spasinel e Izraelcon taro Filistejcija. Ov ka ovel nazarejco“. Dali džanea koj sine o nazarejcija? Ola sine sluge e Jehovaskere so kerena sine posebna zadače. Isto agjaar, o nazarejcija na smejnena sine te čhinen pe bala.

Palo nesavo vreme, o Manoj dobingja čhavo hem dengje le anav Samson. Keda o Samson barilo, o Jehova dengja le bari sila. Ov šaj sine te mudarel lave pe vastencar! Jekh puti, o Samson korkori mudargja 30 Filistejcon. O Filistejcija mrzinena le sine hem rodena sine način sar te mudaren le. Jekh rat, džikote o Samson sovela sine ki Gaza, ola gele anglo porte e dizjakere te šaj te mudaren le sabajle. Ama ki ekvaš i rat o Samson uštilo, gelo ko porte e dizjakere hem ikalgja i porta taro zido. Lelja i porta ko pe pike hem ingargja la upre ki planina paše uzo Hevron!

Pokasno, o Filistejcija gele ki e Samsoneskiri džuvli, i Delila, hem vakergje lake: „Sekoj amendar ka del tut but srebrenikija ako doznajngjan soske o Samson tano doborom silno. Mangaja te astara le hem te čhiva le ko zatvor“. I Delila prifatingja te kerel adava, soske manglja te lel o pare. Ko početok, o Samson na manglja te vakerel soske tano doborom silno. Ama oj pučela le sine stalno sa džikote ov na vakergja lake pli tajna. Ov vakergja lake: „Me bala nikogaš na čhingjum, me sium nazarejco. Ako čhinava me bala ka našavav mi sila“. O Samson but grešingja so vakergja lake pli tajna, neli?

I Delila odma vakergja e Filistejconge: „Džanava leskiri tajna!“ Tegani sovljargja e Samsone ki pli angali hem palo adava vikingja nekas te čhinen leskere bala. I Delila tegani vikingja: „Samson, o Filistejcija tane akate!“ Keda o Samson uštilo, na sine le više isto sila sar poangle. O Filistejcija astargje le, korjargje le hem čhivgje le ko zatvor.

Jekh dive, but Filistejcija khedingje pe ko hrami pumare devleskoro, o Dagon. Ola počmingje te vikinen: „Amaro devel dengja amen e Samsone! Ikalen e Samsone te khela amenge lea! Tegani čhivgje le te tergjol maškar o duj stubija hem počmingje te asan leske. O Samson vikingja: „Jehova, molinava tut, de man sila samo panda jekh puti“. Džitegani, e Samsoneskere bala palem barile. Ov guringja o stubija e hrameskere sa ple silaja hem celo hrami rušindilo. Sa o manuša so sine adathe mule, a isto agjaar mulo o Samson da.