O Josija mangela sine e Devleskoro zakoni

O Josija ulo cari ki Juda keda sine le ofto berš. Ko adava vreme, o manuša kerena sine but magie hem obožavinena sine idolija. Keda sine e Josija 16 berš, mangela sine te sikljol sar te služinel ispravno e Jehovaske. Keda sine le 20 berš, počmingja te uništinel o idolija hem o žrtvenikija so sine ki celo phuv. A keda sine le 26 berš, naredingja te obnovinel pe o hrami e Jehovaskoro.

Ko hrami, o prvosvešteniko, o Helkija, arakhlja jekh lil kote so sine pišimo e Jehovaskoro zakoni. Šaj akava sine o isto lil so pišingja le o Mojsej. O Safan, so sine pisari e careskoro, angja o lil e Josijaske hem počmingja te čitinel le leske. Džikote šunela sine adava so čitinela, halilo kaj o manuša but berša na kerena sine adava so vakerela o Jehova. Tegani o cari, o Josija, vakergja e Helkijaske: „O Jehova tano but holjamo amenge. Dža hem molin tut leske. O Jehova ka vakerel amenge so te kera“. Tegani, preku i proročica, i Olda, o Jehova vakergja lenge: „O manuša tari Juda bistergje man. Ola ka oven kaznime, ama na džikote tano o Josija cari, soske ov tano ponizno“.

Keda šungja bašo adava o Josija, gelo ko hrami hem vikingja sa e manušen tari Juda. Tegani ov čitingja e Jehovaskoro Zakoni anglo celo narodo. O Josija hem o narodo vetingje e Jehovaske kaj ka šunen e Devle taro vilo.

O narodo tari Juda beršencar na slavinena sine o prazniko Pasha. Ama, keda o Josija čitingja o Zakoni kaj i Pasha valjani te slavinel pe sekova berš, vakergja e narodoske: „Ka slavina i Pasha bašo Jehova“. Tegani o Josija spremingja te den pe but žrtve hem ko hrami te ovel hor so ka giljavel. Agjaar o manuša slavingje i Pasha, hem palo adava, efta dive slavinena sine o Prazniko e marengoro bizo kvasaco. Asavki Pasha na sine panda taro vreme e Samoileskoro. O Josija čače mangela sine but e Devleskoro zakoni. Dali uživinea džikote sikljovea bašo Jehova?