I Estira spasingja ple narodo

I Estira sine Evrejka koja so živinela sine ki persisko diz Suza. Angleder but berša, o Navuhodonosor zarobingja lakere familija hem ingargja len taro Erusalim. Bajrargja la lakoro bratučeti o Mardohej, kova so sine sluga e persisko careske, e Ahasvereske.

O cari, o Ahasver, manglja te birinel peske nevi carica. Leskere sluge angje leske e najšuže čhajen ko celo carstvo, maškar kola sine i Estira da. Taro sa adala, o cari biringja e Estira te ovel carica. O Mardohej vakergja e Estirake te na vakerel kaj tani Evrejka.

Jekh gordo manuš, so vikinela pe sine Aman, sine čhivdo upro sa o knezija. Ov manglja sa o manuša te pokloninen pe leske. Ama, o Mardohej na manglja te kerel adava. O Aman but holjangja hem manglja te mudarel le. Keda o Aman šungja kaj o Mardohej tano Evrei, kergja plani te mudarel sa e Evreen ki phuv. Ov vakergja e careske: „O Evreija tane but opasna. Mora te oslobodina amen lendar. O Ahasver vakergja leske: „Ker adava so mislinea kaj tano najšukar“. Palo adava dengja le vlast te anel zakoni. O Aman angja zakoni te mudaren pe sa o Evreija ko 13-to dive ko masek adar. O Jehova sa adava dikhlja.

I Estira na džanlja bašo adava zakoni. Adaleske o Mardohej bičhalgja lake kopija taro zakoni hem vakergja lake: „Dža ko cari hem ker lea lafi“. I Estira vakergja leske: „Sekoj so ka džal ko cari bizo te ovel vikimo lestar ka ovel mudardo. A mande o cari na vikingja man 30 dive! Ama ka džav. Ako pružinela ki mande plo žezol, ka ačhovav dživdi. A ako na, ka merav“.

I Estira geli anglo cari. Keda dikhlja la, ov pružingja ki late po žezol. Oj ali uzi leste, hem ov pučlja la: „So šaj te kerav baši tute, Estiro?“ Oj vakergja: „Mangava te kaninav tute hem e Amane ki jekh gozba“. Džikote sine ki gozba, oj kaningja len ki panda jekh gozba. Ki adaja gozba, o cari palem pučlja la: „So šaj te kerav baši tute?“ Oj vakergja: „Nekoj mangela te mudarel man hem mle narodo. Molinaja tut, spasin amen“. O cari pučlja la: „Koj mangela te mudarel tumen? Oj vakergja: „Akava lošno Aman!“ O Ahasver doborom holjangja so naredingja odma te mudaren e Amane.

Ama, o zakoni so angja le o Aman našti sine nikoj te poništinel le, čak ni o cari. Adaleske o cari čhivgja e Mardoheje te ovel upro knezija hem dengja le vlast te anel nevo zakoni. O Mardohej angja zakoni kaj o Evreija šaj te braninen pe keda ka oven napadime. Ko 13-to dive taro masek adar, o Evreija pobedingje pumare dušmanen. Ottegani, ola sekova berš slavinena sine akaja pobeda.