O Isus keda sine le dešuduj berš

O Josif hem i Marija živinena sine ko Nazaret zaedno e Isusea hem lengere javere čhavencar. O Josif grižinela pe sine pe familijake adalea so kerela sine buti sar stolari hem sikavela sine ple familija bašo Jehova hem bašo leskoro Zakoni. Ola redovno džana sine ki sinagoga te obožavinen e Jehova, hem sekova berš džana sine ko Erusalim te slavinen i Pasha.

Keda e Isuse sine le 12 berš, leskiri familija cidingja baro drumo dži ko Erusalim. I diz sine pherdi manušencar so ale te slavinen i Pasha. Palo prazniko, o Josif hem i Marija cidingje te džan peske khere. Ola mislingje kaj o Isus tano lencar ki adaja grupa. Ama, keda dikhle kaj nane maškar lengiri familija, počmingje te roden le.

Tegani, o Josif hem i Marija irangje pe ko Erusalim, hem trin dive rodingje pe čhave. Ko krajo, arakhle le ko hrami. Adathe o Isus bešela sine maškar o učitelija, šunela sine šukar hem pučela len sine phare pučiba. O učitelija sine iznenadime taro Isus agjaar so počmingje ola da te pučen le pučiba. Ola sine vooduševime taro leskere odgovorija. Šaj sine jasno te dikhen kaj o Isus šukar haljola e Jehovaskoro zakoni.

O Josif hem i Marija sine but sekirime. I Marija vakergja: „Mo čhavo, segde rodingjem tut! Kaj sian sine?“ O Isus odgovoringja: „Na džanena li sine kaj me valjani te ovav ko kher me Dadeskoro?“

O Isus irangja pe khere pe roditelencar. O Josif sikavela sine e Isuse te ovel šukar stolari. So mislinea, savo sine o Isus džikote sine terno čhavo? Džikote bajrola sine, o Isus ovela sine sa pomudro, hem but mangena le sine o Devel hem o manuša.