O Jovan propovedinela kaj ka avel o Mesija

O Jovan, o čhavo e Zaharijaskoro hem e Elisavetakoro, keda barilo ulo proroko. O Jehova dengja le zadača te objavinel kaj ka avel o Mesija. O Jovan na sikavela sine e manušen ko sinagoge ili ko dizja, nego ki pustina. But manuša taro Erusalim hem tari celo Judeja džana sine te šaj te šunen le. Ov sikavela len sine kaj mora te čhinaven te keren lošna bukja ako mangena te radujnen e Jehova. Otkeda šungje o pouke e Jovaneskere, but džene kajngje pe bašo ple grevija hem ov krstingja len ki reka Jordan.

O Jovan živinela sine but ednostavno životo. Uravela sine šeja so sine kerde taro bala e kamilakere hem hala sine skakulcija hem divo avgin. Adaleske o manuša pučena pe sine savo manuš tano o Jovan. Čak o gorda fariseija hem o sadukeija ale te dikhen le. O Jovan vakergja lenge: „Mora te meninen tumen hem te kajnen tumen. Ma mislinen kaj sien nešto posebno samo bašo adava so vakerena kaj sien e Avraameskere čhave. Adava na značinela kaj sien e Devleskere čhave“.

But džene ale ko Jovan hem pučle le: „So valjani te kera te šaj te radujna e Devle?“ O Jovan odgovoringja lenge: „Ako isi tumen duj šeja, den jekh okolenge so nane len“. Džanea li soske vakergja adava? Te šaj te sikavel len kaj, ako mangena te radujnen e Devle, mora te mangen e javeren.

O Jovan vakergja e danočnikonge: „Oven česna hem ma čoren taro manuša“. A e vojnikonge vakergja: „Ma len mito hem ma hovaven“.

Isto agjaar, nesave sveštenikija hem levitija ale ko Jovan te pučen le: „Koj sian tu? Sarine mangena te džanen adava“. O Jovan vakergja lenge: „Me sium o glaso ki pustina so vodinela e manušen dži ko Jehova, sar so prorokujngja o Isaija“.

E manušenge svidžinela pe sine adava so sikavela len sine o Jovan. But džene mislinena sine kaj o Jovan tano o Mesija. Ama, ov vakergja lenge: „Avela nekoj soj tano pobaro mandar. Me na sium dostojno o sandale leskere te phravav. Me krstinava panjea, a ov ka krstinel sveti duhoja“.