O Isus biringja e Savle

O Savle sine rimsko gragjani so sine bijando ko Tars. Ov sine farisei hem but šukar pendžarela sine o evrejsko zakoni hem mrzinela sine e hristijanen. O Savle khuvela sine ko khera e hristijanengere, lela sine e romen hem e romnjen hem phandela len sine ko zatvor. Jekh puti, jekh grupa holjame manuša frdingje e Stefaneske barencar sa džikote na mulo, a o Savle tergjola sine hem dikhela sine.

Ama, e Savleske na sine dovolno samo taro Erusalim te astarel hem te phandel e hristijanen. Ov taro prvosvešteniko rodingja te bičhalel le ko Damask te šaj adari da te progoninel e hristijanen. Keda sine paše uzi akaja diz, taro jekh puti okolu leste sine bari svetlina hem ov pelo ki phuv. Tegani jekh glaso vakergja leske: „Savle, soske progoninea man?“ O Savle pučlja le: „A koj sian tu?“ O glaso vakergja: „Me sium o Isus. Dža ko Damask, hem ka džane so valjani te kere“. Ko adava momenti, o Savle korolilo, hem nekoj valjani sine te vodinel le taro vas dži ki diz.

Ko Damask živinela sine jekh verno hristijani so vikinela pe sine Ananija. Ki vizija o Isus vakergja leske: „Dža ko kher e Judaskoro, ki ulica Prava, hem rode e Savle“. O Ananija vakergja: „Gospodaru, ama me džanava adale manuše! Ov čhivela tle učenikon ko zatvor!“ Ama, o Isus vakergja leske: „Dža ki leste. Biringjum e Savle te propovedinel o šukar haberi bute narodonge“.

Agjaar o Ananija arakhlja e Savle hem vakergja leske: „Savle, mo phral, o Isus bičhalgja man ki tute te phravav te jakhja“. Ko isto momenti, o Savle palem šaj sine te dikhel. Ov počmingja te sikljol bašo Isus hem ulo leskoro sledbeniko. Otkeda krstingja pe, o Savle počmingja te propovedinel ko sinagoge zaedno e javere hristijanencar. O Evreija sine but iznenadime keda dikhle kaj o Savle sikavela e manušen bašo Isus! Ola vakerena sine: „Nane li akava o manuš so progoninela sine e Isuseskere učenikon?“

Trin berš, o Savle propovedinela sine e manušenge so živinena sine ko Damask. O Evreija mrzinena sine e Savle hem planirinena sine te mudaren le. Ama, o phralja šungje bašo akava hem pomožingje le te našel. Ola čhivgje le ki jekh korpa hem mukhle le taro jekh otvor taro zido e dizjakoro.

Keda o Savle gelo ko Erusalim, ov manglja adari te ovel zaedno e phralencar. Ama, ola darana sine lestar. Tegani jekh učeniko, o Varnava, ingargja e Savle ko apostolija hem uveringja len kaj o Savle čače promeningja pe. O Savle počmingja revnosno te propovedinel bašo šukar haberi zaedno e phralencar taro sobranie ko Erusalim. Pokasno, ov sine pendžardo sar Pavle.