O zatvorsko čuvari ulo hristijani

Ko Filipi živinela sine jekh sluginka hem ki late andre sine demoni. Adaleske oj šaj sine te vakerel i idnina hem agjaar pomožinela sine ple gospodarenge te ovel len but pare. Keda o Pavle hem o Sila ale ko Filipi, oj but dive džala sine pali lende. O demoni terinela la sine te vikinel: „Akala manuša služinena e Najbare Devleske!“ Ko krajo, o Pavle vakergja e demoneske: „Ko anav e Isuseskoro, zapovedinava tuke ikljov latar!“ O demoni odma iklilo tari čhaj.

Keda o gospodarija e čhajakere halile kaj oj našti više te anel lenge pare sar poangle, but holjangje. Ingargje e Pavle hem e Sila ko e dizjakere upravitelija hem vakergje: „Akala manuša phagena o zakoni hem voznemirinena celi diz!“. O upravitelija naredingje e Pavle hem e Sila te maren len hem te čhiven len ko zatvor. O zatvorsko čuvari ingargja len ko andruno, najtemno delo ko zatvor hem čhivgja lenge okovija.

O Pavle hem o Sila giljavena sine gilja te falinen e Jehova, a o javera zatvorenikija šunena len sine. Taro jekh puti, ki ekvaš i rat sine baro zemjotres hem tresingje čak o temelija taro zatvor. Phravdile o udara e zatvoreskere, a o okovija e zatvorenikongere pele. O zatvorsko čuvari sigate gelo ko andruno delo taro zatvor hem dikhlja kaj o udara sine phravde. Ov mislingja kaj sa o zatvorenikija našle hem adaleske lelja o mači te mudarel pe.

Ama, tegani o Pavle vakergja leske: „Ma! Sarine siem akate!“ O čuvari prastandilo hem pelo ko kočaka anglo Pavle hem o Sila. Tegani pučlja len: „So valjani te kerav te šaj te ovav spasimo?“ Ola odgovoringje leske: „Tu hem tli familija valjani te verujnen ko Isus“. O Pavle hem o Sila sikavgje e čuvare hem leskere familija bašo Jehova, hem sarine krstingje pe.