100 LEKCIJA
O Pavle hem o Timotej
O Timotej sine terno phral ko sobranie Listra. Leskoro dad sine Grko, a i daj leskiri Evrejka. I daj leskiri, i Evnika, hem i baba leskiri i Loida sikavgje e Timoteje bašo Jehova panda taro tiknipe.
Keda o Pavle alo ki Listra ko plo dujto propovedničko patuvanje, dikhlja kaj o Timotej but mangela sine e phralen hem kaj sine spremno te pomožinel lenge. O Pavle vikingja e Timoteje te džal lea ko propovedničko patuvanje. Sar so nakhela sine o vreme, o Pavle pomožingja e Timotejeske šukar te propovedinel hem te sikavel e javeren bašo šukar haberi.
O sveti duh vodingja e Pavle hem e Timoteje segde kaj so gele. Jekh rat, ki vizija jekh manuš vakergja e Pavleske te avel ki Makedonija hem te pomožinel lenge. Agjaar o Pavle, o Timotej, o Sila hem o Luka gele adari te propovedinen hem te keren neve sobranija.
Ko Solun, but murša hem džuvlja ule hristijanja. Ama, nesave Evreija sine ljubomorna e Pavleske hem okolenge so sine lea. Ola khedingje grupa manuša hem ingargje e phralen ko e dizjakere upravitelija hem počmingje te vikinen: „Akala tane dušmanja e Rimeskere!“ Adaleske so sine lengoro životo ki opasnost, o Pavle hem o Timotej rakjate našle ki Verija.
O manuša so živinena sine ki Verija but mangena sine te sikljoven bašo šukar haberi, pa agjaar hem o Grkija hem o Evreija ule učenikija. Ama, keda nesave Evreija taro Solun ale hem kergje problemija maškar o narodo, o Pavle našlja ki Atina. O Timotej hem o Sila ačhile ki Verija te ohrabrinen e phralen. Palo nesavo vreme, o Pavle ohrabringja e Timoteje palem te džal ko Solun hem te pomožinel e phralenge te izdržinen o silno progonstvo. A pokasno, o Pavle bičhalgja e Timoteje te ohrabrinel e phralen taro javera da sobranija.
O Pavle vakergja e Timotejeske: „Sekoj so mangela te služinel e Jehovaske ka ovel progonimo“. O Timotej sine progonimo hem phanlo baši pli vera. Ov sine srekjno so šaj sine te sikavel kaj tano verno e Jehovaske.
O Pavle vakergja e Filipjanenge: „Bičhalava tumenge e Timoteje. Ov ka sikavel tumen sar valjani te živinel jekh sluga e Devleskoro hem ka sikavel tumen te propovedinen“. O Pavle sine le doverba ko Timotej. Ola but berša sorabotinena sine sar amala hem sluge e Jehovaskere.
„Nane man nikoj sar leste, kova so čače ka grižinel pe bašo adava so valjani tumenge. Soske, sa o javera grižinena pe samo peske, a na bašo adava so mangela o Isus Hristos“ (Filipjanja 2:20, 21)