LEKCIJA 11

Sar te ovel tut pobari korist taro čitibe i Biblija

Pečatimo izdanie

Dali nekogaš mangljan te počmine te kere nesavi bari buti, ama mislingjan kaj ka ovel tuke pharo te kere la? Te šaj te ovel tuke polokho, šaj počmingjan te kere delo po delo. Slično tano e čitibaja i Biblija. Šaj pučea tut: „Kotar te počminav?“ Ki akaja lekcija, ka dikha kola ednostavna bukja šaj te kere te šaj te uživine ko čitibe hem ko proučibe i Biblija.

1. Soske valjani redovno te čitina i Biblija?

Okova so redovno čitinela i Biblija, ili „e Jehovaskoro zakoni“, ka ovel hem bahtalo hem uspešno. (Čitin Psalm 1:1-3.) Ko početok, probin te čitine samo nekobor minutija sekova dive. Kobor poviše bukja doznajnea tari Biblija, doborom poviše ka uživine ko lakoro čitibe.

2. So ka pomožinel amenge te ovel amen pobari korist taro čitibe i Biblija?

Te šaj te ovel amen pobari korist taro čitibe i Biblija, valjani te odvojna amenge vreme hem te razmislina bašo adava so čitinaja (Isus Navin 1:8, fusnota). Džikote čitinea, puč tut: „So sikljovava bašo Jehova taro akava so čitingjum? Sar šaj te primeninav adava ko mlo životo? Sar šaj te koristinav akala stihija te pomožinav e javerenge?“

3. Keda šaj te odvojne tuke vreme te čitine i Biblija?

Dali tuke pharo te arakhe vreme te čitine i Biblija? Bute dženenge amendar tano pharo. Trudin tut šukar te koristine tlo vreme (Efešanite 5:16). Adava šaj te kere agjaar so ka birine tuke konkretno vreme ko dive keda ka čitine i Biblija. Nesave manuša odvojnena peske vreme te čitinen i Biblija rano sabajle. Javera birinena te keren adava pokasno, na primer džikote tane ki pauza ručkoske. A nesave čitinena i Biblija rakjate, angleder te soven. Kova tano o najšukar vreme tuke te čitine i Biblija?

DOZNAJN POVIŠE

Sikljov sar te kere tuke pointeresno o čitibe i Biblija. Dikh sar šaj šukar te spremine tut, te šaj te ovel tut pobari korist taro tlo kursi.

Slike: Sar so nakhela o vreme, jekh čhavo sikljovela te mangel jekh hajbe. 1. O čhavo khelela peske e hajbaja. 2. Pokasno ko plo životo, o čhavo hala o hajbe. 3. Palo nekobor berš, o čhavo uživinela te hal o hajbe. — Isto sar so šaj te sikljova te manga te ha različno hajbe, agjaar šaj te sikljova te uživina ko čitibe i Biblija

4. Sikljov te uživine ko čitibe i Biblija

Šaj nane tuke lokho te počmine te čitine i Biblija. Ama, tu šaj te sikljove te uživine ko čitibe i Biblija, isto sar so šaj te sikljove te uživine ko hajbe kova so na haljan angleder. Čitin 1. Petrovo 2:2, a palo adava keren lafi bašo akava pučibe:

Ako sekova dive čitinea i Biblija, dali mislinea kaj ka uživine ko adava hem ka mange te čitine la poviše?

Dikh o VIDEOKLIPI hem primetin sar nesave terne počmingje te uživinen ko čitibe i Biblija. Palo adava keren lafi bašo akala pučiba:

VIDEOKLIPI: O terne sikljona te mangen e Devleskoro Lafi (5:33)

Kola predizvikija sine e ternen taro akava videoklipi?
So pomožingja lenge te prodolžinen redovno te čitinen i Biblija?
Sar kergje peske pointeresno o čitibe i Biblija?

Predlogija so ka pomožinen tuke te počmine:

Birin točno hem sovremeno prevod. Probin o Prevod nov svet ako tano dostapno ki tli čhib ili ki nesavi javer čhib so džanea la šukar.
Prvo počmin te čitine o delija tari Biblija kola so svidžinena pe tuke najviše. Bašo nesave idee, dikh i ramka „Počmin te čitine i Biblija“.
Beležin adava so čitingjan. Koristin i ramka „Prodolžin te čitine i Biblija“ koja soj ko krajo tari akaja publikacija.
Koristin i aplikacija JW Library^®. Ki late tu šaj te čitine hem te šune i Biblija ko bilo kova than taro tlo mobilno telefoni ili nesavo javer elektronsko ured.
Koristin i brošurka Da ja istražuvame Božjata Reč. Ki late šaj te arakhe karte hem tabele so šaj te keren o čitibe i Biblija te ovel tuke pointeresno.

5. Spremin tut baši tlo biblisko kursi

Čitin Psalm 119:34, a palo adava keren lafi bašo akava pučibe:

Soske tano šukar te moline tut angleder te čitine i Biblija ili te spremine tut bašo tlo biblisko kursi?

Sar šaj te ovel tut najbari korist taro kursi? Džikote spreminea tut baši jekh lekcija ko kursi, probin te kere akala bukja:

(1) Čitin o pasusija soj ko početok tari lekcija.
(2) Dikh hem čitin o stihija, hem probin te haljove sar tane povrzime e lekcijaja.
(3) Beležin o lafija ili o izrazija kola so dena odgovor ko pučibe, soske adava ka pomožinel tuke te diskutirinen baši lekcija adalea so proučinela tuja i Biblija.

Slike: Jekh džuvli spreminela pe bašo plo biblisko kursi. A. Oj čitinela o pasusija soj ko početok tari lekcija. B. Oj čitinela o bibliska stihija. V. Oj beležinela o glavna lafija hem rečenice tari lekcija.

Dali džanljan?

E Jehovaskere svedokija koristingje različna prevodija tari Biblija. Ama, najviše ceninena o Sveto pismo — prevod Nov svet adaleske soj tano točno, jasno hem ki leste koristinela pe e Devleskoro anav. (Dikh i internet statija „Dali e Jehovaskere svedokon isi len pumari Biblija?“)

NESAVE ŠAJ VAKERENA: „O proučibe i Biblija tano but pharo hem lela but vreme. Me našti te kerav adava“.

So mislinea tu?

SO SIKLILEM

Te šaj te ovel tut pobari korist tari Biblija odvojn tuke vreme te čitine la, molin tut te šaj te haljove adava so čitinea hem spremin tut bašo sekova biblisko kursi.