LEKCIJA 46
Soske te de lafi e Jehovaske kaj ka služine leske hem te krstine tut?
Tu dea lafi e Jehovaske kaj ka služine leske agjaar so ki molitva vetinea kaj ka obožavine samo le hem kaj leskiri volja ka čhive ko prvo than ko tlo životo (Psalm 40:8). Palo adava krstinea tut hem agjaar sikavea e javerenge kaj tu dengjan zavet e Jehovaske. I odluka te da zavet e Jehovaske tani i najvažno odluka so valjani te ana. Adaleske te dikha so šaj te pottikninel tut te ane asavki važno odluka koja so ka meninel tlo životo.
1. So pottikninela nekas te del lafi e Jehovaske kaj ka služinel leske celo životo?
Amen daja lafi e Jehovaske kaj ka služina leske adaleske so mangaja le (1. Jovanovo 4:10, 19). I Biblija ohrabrinela amen: „Mang e Jehova, tle Devle, sa tle vilea, hem sa tle dušaja, hem sa tle gogjaja, hem sa tle silaja“ (Marko 12:30). Amen sikavaja amaro mangipe e Devleske na samo amare lafencar nego hem amare postapkencar. Isto sar so duj džene venčinena pe adaleske so mangena pe, agjaar amaro mangipe sprema o Jehova pottikninel amen te da leske zavet hem te krstina amen.
2. Kola bereketija dela o Jehova ple krstime slugenge?
Keda krstinea tut, tu ovea delo tari e Jehovaskiri bahtali familija. Tegani, tu ka osetine leskoro mangipe ko but načinija hem ka ove lea popaše nego so sian akana. (Čitin Malahija 3:16-18.) Na samo so tegani o Jehova ka ovel tlo Dad, nego isto agjaar ka ovel tut duhovno familija taro phralja hem phenja ko celo sveto, kola so mangena e Devle hem mangena tut. (Čitin Marko 10:29, 30.) Džangjola pe, angleder te krstine tut valjani te kere nesave bukja. Valjani te sikljove bašo Jehova, te mange le hem te ovel tut vera ko leskoro Čhavo. Ko krajo, tu mora te de lafi e Jehovaske kaj ka služine leske celo životo. Ako kerea sa akala bukja hem krstinea tut, tu ka šaj te ove bahtalo zasekogaš. E Devleskoro Lafi vakerela: „O krstibe... akana spasinela tumen da“ (1. Petrovo 3:21).
DOZNAJN POVIŠE
Doznajn soske tano važno te de zavet e Jehovaske hem te krstine tut.
3. Sarine amen valjani te odlučina kaske ka služina
Nesave manuša ko purano Izrael mislingje kaj šaj te služinen hem e Jehovaske hem e hovavne devleske e Vaaleske. Ama, o Jehova bičhalgja e proroko e Ilija te isprajnel adava pogrešno stavi. Čitin 1. Carevite 18:21, a palo adava keren lafi bašo akava pučibe:
Savi odluka valjani sine te anen o Izraelcija?
Isto sar o Izraelcija, amen da mora te odlučina kaske ka služina. Čitin Luka 16:13, a palo adava keren lafi bašo akala pučiba:
Soske našti te služina hem e Jehovaske hem nekaske javereske?
Sar sikavaja e Jehovaske kaj odlučingjem te služina samo leske?
4. Razmislin bašo adava kobor mangela tut o Jehova
O Jehova dengja amen but skapocena poklonija. So šaj amen te da leske? Dikh o VIDEOKLIPI.
Ko kola načinija sikavgja o Jehova kaj mangela tut? Čitin Psalm 104:14, 15 hem 1. Jovanovo 4:9, 10, a palo adava keren lafi bašo akala pučiba:
Bašo kova poklon taro Jehova sian posebno blagodarno?
So osetinea sprema o Jehova keda razmislinea bašo adava?
Ako nekastar dobinaja jekh poklon kova so kerela amen bahtale, amen mangaja te sikava leske kaj siem blagodarna. Čitin 5. Mojseeva 16:17, a palo adava keren lafi bašo akava pučibe:
Keda razmislinea bašo sa adava so kergja tuke o Jehova, so sian pottiknimo te de leske?
5. Adava so ka de lafi e Jehovaske kaj ka služine leske ka anel tuke bereketija
But manuša mislinena kaj i slava, i kariera ili o pare šaj te keren len bahtale. Ama, dali adava tano čače agjaar? Dikh o VIDEOKLIPI, a palo adava keren lafi bašo akala pučiba:
Soske akava manuš čhinavgja pli kariera, iako but mangela sine te khelel fudbal?
Ov odlučingja te del plo najšukar bašo Jehova, a na bašo fudbal. So mislinea, dali ov angja ispravno odluka? Soske mislinea agjaar?
O apostol Pavle angleder te ovel hristijani šaj sine te ovel le uspešno kariera. Ov proučingja o evrejsko zakoni ko jekh poznato učiteli. Ama, ov mukhlja sa adava te šaj te ovel hristijani. Dali o Pavle nekogaš žalingja baši pli odluka? Čitin Filipjanite 3:8, a palo adava keren lafi bašo akala pučiba:
Soske o Pavle dikhela sine sar gjubre ko adava so kerela sine angleder te ovel hristijani?
So dobingja o Pavle adaleske so mukhlja pli kariera?
So mislinea so ka kerel tlo životo pošukar — o služibe e Jehovaske ili nešto javer?
Keda o Pavle ulo hristijani, ov dobingja but poviše taro adava so našavgja
NESAVE ŠAJ VAKERENA: „Džanava kaj akava tano o čačipe, ama na sium spremno te krstinav man“.
So mislinea, soske tano šukar te de lafi e Jehovaske kaj ka služine leske hem te krstine tut?
SO SIKLILEM
O mangipe pottikninela amen te da lafi e Jehovaske kaj ka služina leske celo životo hem te krstina amen.
Sar ka odgovorine?
Soske o Jehova zaslužinela te manga le celo vilea hem te obožavina le?
Sar o Jehova nagradinela ple krstime slugen?
Dali mangea te de lafi e Jehovaske kaj ka služine leske celo životo?
ISTRAŽIN
Dikh soske jekh opersko peačka hem jekh ragbisti odlučingje te den zavet e Jehovaske.
Mladite prašuvaat — na što da go posvetam mojot život? — Navrakjanje na minatoto (6:54)
Dikh javera šukar pričine soske te de zavet e Jehovaske.
„Zošto da mu se zavetuvaš na Jehova?“ (Stražarska kula taro 15 januari 2010)
Ko akava muzičko spoti, dikh kobor tane bahtale okola so dengje zavet e Jehovaske.
Ko iskustvo e naslovea „So godini se prašuvav: ’Zošto postoime?‘“, čitin so pottikningja jekhe džuvlja te razmislinel bašo adava soj lake najvažno ko životo.
„Biblijata menuva životi“ (Stražarska kula taro 1 noemvri 2012)