Koj tano „o verno hem razborito robo“ hem koja tani leskiri uloga?

O Isus tano poglavari ko sobranie (Efešanite 5:23). Avdive, ov taro nebo vodinela ple sledbenikon soj tele ki Phuv preku „o verno hem razborito robo“. (Čitin Matej 24:45.) O Isus postavingja akale robo hem dengja le avtoriteti te anel nesave odluke. Sepak, akava robo mora te ovel poslušno e Isuseske hem te služinel leskere pomazime phralenge. Ama, koj tano akava robo hem sar ov grižinela pe amenge?

1. Koj tano „o verno hem razborito robo“?

O Jehova sekogaš koristinela sine jekhe manuše ili jekh tikni grupa taro murša te šaj te vodinel ple narodo (Malahija 2:7; Evreite 1:1). Palo e Isuseskoro meribe, o apostolija hem o starešine ko Erusalim vodinena sine e Devleskere narodo (Dela 15:2). Isto sar tegani, avdive da jekh tikni grupa starešine — o Vodečko telo e Jehovaskere svedokongoro — dela duhovno hrana hem vodinela o propovedibe. Akaja grupa tani „o verno hem razborito robo kaste so [o Isus] čhivgja“ te grižinel pe bašo akala bukja (Matej 24:45a). Sa o členija taro Vodečko telo tane pomazime hristijanja kolen so isi len nadež te vladinen zaedno e Isusea ko leskoro nebesno Carstvo, odkeda lengoro životo ki Phuv ka završinel.

2. Soj tani i duhovno hrana so dela amen „o verno hem razborito robo“?

O Isus vakergja kaj o verno robo ka „del [e hristijanenge] hrana ko pravo vreme“ (Matej 24:45b). Isto sar i doslovno hrana so pomožinela amenge te ova fizičko zorale hem saste, agjaar i duhovno hrana — o pouke taro e Devleskoro Lafi — dela amen sila te ačhova verna e Jehovaske hem te kera i zadača so dengja amen o Isus (1. Timotej 4:6). Amen dobinaja adaja duhovno hrana preku o sostanokija, o kongresija, amare publikacie hem o videoklipija. Sa akala bukja pomožinena amenge te haljova koja tani e Devleskiri volja hem pomožinena amenge te kera pozoralo amaro amalipe lea.

DOZNAJN POVIŠE

3. E Jehovaskoro narodo mora te ovel organizirimo

Preku e Isuseskoro vodstvo, o Vodečko telo organizirinela o aktivnostija e Jehovaskere svedokongere. Ko slično način o Isus vodinela sine e hristijanen taro prvo veko. Dikh o VIDEOKLIPI.

VIDEOKLIPI: O Jehova organizirinela ple narodo (6:18)

Čitin 1. Korinkjanite 14:33, 40, a palo adava keren lafi bašo akava pučibe:

• Sar akala stihija sikavena kaj o Jehova mangela leskoro narodo te ovel organizirimo?

4. O verno robo organizirinela o propovedibe

I najvažno zadača e prva hristijanenge sine o propovedibe. Čitin Dela 8:14, 25, a palo adava keren lafi bašo akala pučiba:

• Koj organizirinela sine o propovedibe ko prvo veko?

• Sar o Petar hem o Jovan reagiringje ko upatstvija so dobingje taro apostolija?

O propovedibe tani i najvažno zadača so organizirinela la o Vodečko telo. Dikh o VIDEOKLIPI.

VIDEOKLIPI: O propovedibe — najvažno zadača (1:24)

O Isus istakningja kobor tano važno o propovedibe. Čitin Marko 13:10, a palo adava keren lafi bašo akala pučiba:

• Soske o Vodečko telo dikhela ko propovedibe sar najvažno zadača?

• Soske amenge potrebno „o verno hem razborito robo“ te šaj te organizirinel pe o propovedibe ko celo sveto?

5. O verno robo dela vodstvo

O Vodečko telo dela vodstvo e hristijanenge ko celo sveto. Ama, sar džanena save upatstvija valjani te den? Te dikha o primer taro vodečko telo ko prvo veko. Čitin Dela 15:1, 2, a palo adava keren lafi bašo akala pučiba:

• Savo nesoglasuvanje pojavingja pe maškar o phralja taro prvo veko?

• Kastar rodingje pomoš o Pavle, o Varnava hem o javera te šaj te rešinel pe adava nesoglasuvanje?

Čitin Dela 15:12-18, 23-29, a palo adava keren lafi bašo akava pučibe:

• So kergja o vodečko telo taro prvo veko te šaj te haljovel sar o Jehova dikhela ko adava problemi? (Dikh o stihija 12, 15 hem 28.)

Čitin Dela 15:30, 31 hem 16:4, 5, a palo adava keren lafi bašo akala pučiba:

• Sar reagiringje o hristijanja taro prvo veko ko upatstvija so dobingje taro vodečko telo?

• Save bereketija dengja len o Jehova adaleske so sine poslušna?

Čitin 2. Timotej 3:16 hem Jakov 1:5, a palo adava keren lafi bašo akava pučibe:

• So pomožinela e Vodečko teloske avdive te anel mudra odluke?

SO SIKLILEM

O Vodečko telo tano „o verno hem razborito robo“ kaste so postavingja o Hristos. Adava robo dela vodstvo hem duhovno hrana e hristijanenge ko celo sveto.

Sar ka odgovorine?

• Koj postavingja e „verno hem razborito robo“?

• Sar o Vodečko telo grižinela pe amenge?

• Dali verujnea kaj o Vodečko telo tano „o verno hem razborito robo“?

ISTRAŽIN

Dikh sar tano organizirimo o Vodečko telo.

„Soj tano o Vodečko telo e Jehovaskere svedokongoro?“ (internet statija)

Sar amare sostanokija hem kongresija sikavena kaj o Jehova vodinela e Vodečko telo?

Jehova go poučuva svojot narod (9:39)