Vera — osobina so pomožinela amenge te ova silna

I VERA dela amenge bari sila. Na primer, iako o Satana mangela te uništinel amaro amalipe e Jehovaja, i vera pomožinela amenge te ačhava „sa o jagale strele e Lošnoskere“ (Ef. 6:16). Ako isi amen vera, šaj te ikljova ko krajo e problemencar so dikhjona amenge bare sar planine. O Isus vakergja ple učenikonge: „Ako tumari vera tani bari samo kobor jekh sinapovo zrno, ka vakeren akale planinake: ’Premestin tut akatar adari‘, hem ka premestinel pe“ (Mat. 17:20). Adaleske so i vera šaj te kerel pozoralo amaro amalipe e Jehovaja, šukar tano te razmislina bašo akala pučiba: Soj tani i vera? Soske valjani te cenina o čačipe te šaj te ovel amen vera? Sar šaj te bajrara amari vera? Hem kaste valjani te ovel amen vera? (Rim. 4:3).

SOJ TANI I VERA?

Te ovel amen vera na značinela samo te verujna ili te priznajna kaj adava so vakerela i Biblija tano točno. Čak „o demonija da verujnena [kaj isi Devel] hem tresinena“ (Jak. 2:19). Tegani, soj tani i vera?

Baši vera i Biblija istakninela duj bukja. Prvo, „i vera tani te ovel pe silno uverimo kaj ka slučinel pe adava so nadinaja amen“ (Evr. 11:1a). Ako isi tut vera, tu sian silno uverimo kaj sa so vakerela o Jehova tano čače hem kaj ka ispolninel pe. Na primer, o Jehova vakergja e Izraelconge: „Ako šaj te phagen mlo sojuz e divea hem mlo sojuz e rakjaja, te šaj te na ovel ni dive ni rat ko pravo vreme, tegani ka šaj te phagel pe mlo sojuz e Davidea, mlo sluga“ (Erem. 33:20, 21). Dali nekogaš sumningjan tut kaj o kham nane te ikljol ili nane te perel? Ako sian sigurno kaj o kham ka ikljol sekova dive, valjani li te sumnine tut kaj okova so stvoringja sa o bukja ka ispolninel adava so vetingja? Sigurno kaj na! (Isa. 55:10, 11; Mat. 5:18).

Dujto, i vera tani „jasno dokaz kaj čače postojnela adava so na dikhela pe“. Znači i vera tani dokaz bašo bukja so na dikhaja len, ama sepak postojnena (Evr. 11:1b). Te dikha jekh primer. Zamislin kaj jekh čhavo pučela tut: „Kotar džanea kaj postojnela o vozduh?“ Iako o vozduh na dikhjola, verojatno ka pomožine e čhaveske te razmislinel bašo bukja so sikavena kaj čače postojnela o vozduh, sar na primer, o dišibe, i bavlal so phudela hem slično. Keda o čhavo ka uverinel pe kaj akala bukja postojnena, ov ka haljovel kaj šaj te verujnel ko nešto so na dikhjola. Slično, i vera temelinela pe ko silna dokazija (Rim. 1:20).

TE ŠAJ TE OVEL AMEN VERA, VALJANI TE CENINA O ČAČIPE

Adaleske so i vera temelinela pe ko dokazija, te šaj nekas te ovel vera, prvo mora šukar te džanel o čačipe (1. Tim. 2:4). Ama adava nane dovolno. O apostol Pavle pišingja: „E vilea verujnela pe“ (Rim. 10:10). Znači nane dovolno samo te verujna ko čačipe, nego isto agjaar valjani te cenina le. Samo tegani ka ova pottiknime te sikava vera, javere lafencar amare životoja te kera bahtale e Jehova (Jak. 2:20). Nekoj so nane taro vilo blagodarno bašo čačipe šaj te otfrlinel čak o najsilna dokazija adaleske so odbinela te meninel plo veruvanje ili mangela te kerel sar ov so ka odlučinel (2. Pet. 3:3, 4; Juda 18). Baš adaleske ko biblisko vreme na razvingje sarine vera iako dikhle nesave čudija taro Devel (4. Moj. 14:11; Jovan 12:37). O Jehova preku plo sveti duh dela vera samo adalenge so mangena o čačipe poviše taro hovajbe (Gal. 5:22; 2. Sol. 2:10, 11).

SAR O DAVID RAZVINGJA SILNO VERA

Jekh taro adala so sine len bari vera sine o cari o David (Evr. 11:32, 33). Ama, asavki vera na sine sarinen tari leskiri familija. Na primer, razmislin bašo Elijav, e Davideskoro najphuro phral. Keda o Golijat asala sine e Izraelconge, o David voznemiringja pe. Tegani o Elijav ukoringja e Davide hem adalea ki adaja prilika sikavgja kaj nane le vera ko Jehova (1. Sam. 17:26-28). Nikoj na bijangjovela veraja, a našti ni te nasledinel vera taro ple roditelija. Sprema adava, e Davide sine le vera soske sine paše amal e Devlea.

Ko 27 Psalm, o David otkrinela sar alo dži ko adava te ovel le doborom silno vera (1 stiho). Ov hor razmislinela sine bašo adava sar o Jehova angleder pomožingja leske keda soočingja pe dušmanencar (2, 3 stiho). Ov but ceninela sine e Jehovaskoro sveto šatori (4 stiho). O David obožavinela sine e Devle ko sveto šatori zaedno e javerencar (6 stiho). Taro vilo molinela pe sine e Jehovaske (7, 8 stiho). O David isto agjaar manglja te ovel sikavdo bašo e Devleskere drumija (11 stiho). I vera sine leske doborom važno so čak pučlja: „Kote ka ovav sine te na ovel man sine vera?“ (13 stiho).

SAR TE KERE POZORALI TLI VERA

Šaj te ovel tut isto sar e Davideskiri vera ako razmislinea hem postapinea agjaar sar so pišinela ko 27 Psalm. Te šaj te ovel tut vera važno tano šukar te džane o čačipe. Adaleske, kobor poviše proučinea e Devleskoro Lafi hem o bibliska publikacie doborom polokhe ka ovel tuke te razvine akaja osobina so avela taro e Devleskoro duho (Ps. 1:2, 3). Džikote proučinea, odvojn tuke vreme hor te razmisline. Ako razmislinaja bašo adava so proučinaja, amari blagodarnost sprema o Jehova ka bajrol. A kobor poviše bajrola amari blagodarnost, doborom pobari želba ka ovel amen te sikava vera agjaar so ka falina e Devle ko amare sostanokija hem agjaar so ka vakera baši nadež e javerenge (Evr. 10:23-25). Isto agjaar, amari vera sikavaja la adalea so ponadari da molinaja amen e Jehovaske hem na otkažinaja amen (Luka 18:1-8). Adaleske, stalno molin tut e Jehovaske hem neka ovel tut doverba kaj ov grižinela pe tuke (1. Sol. 5:17; 1. Pet. 5:7). I vera pottikninela amen ko postapke, a preku amare postapke amari vera ovela pozorali (Jak. 2:22).

SIKAV VERA KO ISUS

I rat angleder te merel, o Isus vakergja ple učenikonge: „Verujnen ko Devel hem verujnen ki mande“ (Jovan 14:1). Adaleske valjani te sikava vera ko Jehova hem ko Isus. Sar šaj te sikave vera ko Isus? Te dikha trin načinija.

Prvo, dikh ki otkupnina sar poklon taro Devel so dengja le tuke lično. O apostol Pavle vakergja: „Živinava sprema i vera so isi man ko e Devleskoro Čhavo, kova so manglja man hem dengja plo životo mange“ (Gal. 2:20). Ako sikavea vera ko Isus, tu cvrsto verujnea kaj i otkupnina šaj te pomožinel tuke, kaj oj tani temeli te prostinen pe tle grevija, kaj dela tut nadež bašo večno životo hem kaj tani najbaro dokaz kobor but mangela tut o Jehova (Rim. 8:32, 38, 39; Ef. 1:7). Akava ka pomožinel tuke te na dikhe negativno ki tute (2. Sol. 2:16, 17).

Dujto, ov popaše e Jehovaja agjaar so ka moline tut leske ko temeli e Isuseskere žrtvakoro. Adaleske so isi otkupnina, amen šaj te molina amen e Jehovaske „doverbaja... te šaj o Devel te sikavel amenge milost hem šukaripe so na zaslužinaja le keda valjani amenge pomoš“ (Evr. 4:15, 16; 10:19-22). I molitva bajrarela amari odlučnost te borina amen protiv o iskušenie te kera grevo (Luka 22:40).

Trito, šun e Isuse. O apostol Jovan pišingja: „Okova so sikavela vera ko Čhavo, isi le večno životo. Okova so na šunela e Čhave, nane te dikhel životo, nego e Devleskiri holi ačhola upri leste“ (Jovan 3:36). Primetin kaj sprema o lafija taro akava stiho, te na šunel pe tano sprotivno taro adava te sikavel pe vera. Sprema adava, sikavea vera ko Isus adalea so šunea le. A šunea le agjaar so ikerea tut ko e „Hristoseskoro zakoni“, javere lafencar ko leskere pouke hem zapovedija (Gal. 6:2). Isto agjaar, dikhela pe kaj šunea le keda primeninea o upatstvija so dela len o Isus preku „o verno hem razborito robo“ (Mat. 24:45). Ako šunea e Isuse, ka ovel tut sila te izdržine problemija kola so dikhjona opasna hem strašna sar bura (Luka 6:47, 48).

„OVEN ZORALE PREKU TUMARI NAJSVETO VERA“

Jekh puti, jekh manuš vakergja e Isuseske: „Isi man vera! Ama pomožin mange te ovel man panda pobari vera“ (Mar. 9:24). Dži negde le sine le vera, ama akava manuš sine skromno hem džanlja kaj valjani leske panda vera. Slično sar akava manuš, sarine amen ka ova ko situacie kote so ka valjanel amenge poviše vera. Osven adava, sarine amen šaj panda akana te kera pozorali amari vera. Sar so dikhlem ki akaja statija, amari vera keraja la pozorali keda proučinaja e Devleskoro Lafi hem keda hor razmislinaja baši leste. A agjaar bajrola amari blagodarnost sprema o Jehova. Amari vera isto agjaar ka ovel pozorali keda falinaja e Jehova zaedno e phralencar hem e phenjencar, keda vakeraja e javerenge baši amari nadež hem keda molinaja amen istrajno. A adalea so keraja amari vera pozorali, dobinaja i najbari nagrada — ačhovaja ko e Devleskoro mangipe (Juda 20, 21).