Dali održinea tlo „baro štiti e verakoro“?

1-2. a) Sprema Efešanite 6:16, soske valjani amenge „o baro štiti e verakoro“? b) Bašo kola pučiba ka kera lafi?

DALI phiravea „o baro štiti e verakoro“? (Čitin Efešanite 6:16.) Sigurno oja. Sar jekh štiti so šaj te zaštitinel pobaro delo taro telo, agjaar i vera zaštitinela amen taro lošna bukja akale svetoskere, sar soj o nemoral, o nasilstvo hem sa javer so nane sprema e Jehovaskere merilija.

² Sepak, adaleske so živinaja ko „posledna dive“, amari vera ponadari da ka ovel ispitimi (2. Tim. 3:1). Sar šaj te proverine ki savi sostojba tano tlo štiti e verakoro? Hem so šaj te kere te šaj tli vera te ačhovel zorali? Te dikha o odgovor taro akala pučiba.

ŠUKAR PROVERIN TLO ŠTITI

3. So kerela sine jekh vojniko ple štitea, hem soske?

³ Ko biblisko vreme, e vojnikon but puti sine len štitija kola so sine učharde kožaja. Ola makhena len sine maslo te šaj te zaštitinen i koža hem te na astaren ’rgja o metalna delija. Ako o vojniko dikhela sine kaj o štiti tano oštetimo, ov odma kerela sine nešto te šaj te popravinel le hem te ovel spremno baši javer borba. Sar akava primer tano povrzimo tle veraja?

4. Soske mora te proverine tlo štiti e verakoro, hem sar šaj te kere adava?

⁴ Isto sar o vojnikija ko purano vreme, tu da mora redovno te proverine hem te održine tlo štiti e verakoro te šaj te ove sekogaš spremno baši borba. Sar hristijanja, amen siem ki duhovno vojna hem borinaja amen protiv o lošna duhija (Ef. 6:10-12). Nikoj javer našti te održinel tlo štiti e verakoro tuke ko than. Sar šaj te ove sigurno kaj tli vera ka ovel zorali keda ka ovel tut ispitija? Prvo, mora te rode pomoš taro Devel ki molitva. A palo adava, valjani te koristine e Devleskoro Lafi te šaj te ispitine korkori tut hem te dikhe dali sian sprema e Devleskiri volja (Evr. 4:12). I Biblija vakerela: „Neka ovel tut doverba ko Jehova celo vilea hem te na ovel tut doverba ko tlo haljojbe“ (Izr. 3:5, 6). Akale stihoja ki godi, razmislin bašo nesave odluke so angjan len ko posledno vreme. Dali šaj sine tut nesavo pharo finansisko problemi? Dali tegani setingjan tut ko lafija taro Evreite 13:5, kote so o Devel vakerela: „Nikogaš nane te mukhav tut hem nane te iranav tuke mlo dumo“? Dali adava vetuvanje bajrargja tli doverba kaj o Jehova ka pomožinel tuke? Ako oja, adava sikavela kaj održinea tlo štiti e verakoro ki šukar sostojba.

5. So šaj te otkrine ako ispitinea tli vera?

⁵ Šaj ka iznenadine tut taro adava so ka otkrine keda šukar ka ispitine tli vera. Šaj ka dikhe slabostija kola so na primetingjan len nesavo vreme. Na primer, šaj ka haljove kaj o preterana sekiracie, o obeshrabruvanje ili nesave hovajba džinegde kergje tli vera poslabo. Sar šaj te kere tli vera pozorali?

ARAKH TUT TARO PRETERANA SEKIRACIE, HOVAJBA HEM OBESHRABRUVANJE

6. Bašo kola bukja nane pogrešno te grižina amen ili te sekirina amen?

⁶ Nane pogrešno te grižina amen ili te sekirina amen bašo nesave bukja. Na primer, grižinaja amen te kera adava so mangena o Jehova hem o Isus (1. Kor. 7:32). Ako keraja nesavo seriozno grevo, trudinaja amen palem te ova amala e Jehovaja (Ps. 38:18). Osven adava, grižinaja amen sar šaj te ugodina amare bračno partnereske, a isto agjaar grižinaja amen amare familijake, e phralenge hem e phenjenge (1. Kor. 7:33; 2. Kor. 11:28).

7. a) Sar šaj o preterana sekiracie te keren poslabo amari vera? b) Sprema Izreki 29:25, soske na valjani te dara taro manuša?

⁷ Sepak, o preterana sekiracie šaj te uništinen amari vera. Na primer, šaj celo vreme sekirinaja amen bašo adava dali ka ovel amen dovolno hajbe hem šeja (Mat. 6:31, 32). Adaleske, šaj ka ovel amenge najvažno te oven amen materijalna bukja. Šaj čak ka počmina te manga o pare. Ako mukhaja te slučinel pe nešto asavko, amari vera ko Jehova ka ovel poslabo hem ka rumina amaro amalipa lea (Mar. 4:19; 1. Tim. 6:10). Jekh javer stapica tani te ova preterano sekirime so mislinena o javera baši amenge. I dar te na asan amenge ili te na protivinen pe amenge šaj te ovel pobari tari dar te na razočarina e Jehova. Te šaj te zaštitina amen, valjani te molina e Jehova te del amen vera hem hrabrost te na dara taro manuša. (Čitin Izreki 29:25; Luka 17:5.)

8. So valjani te kera ako nekoj probinela te širinel hovajba?

⁸ O Satana, „o dad e hovajbaskoro“, koristinela okolen so kontrolirinela len te šaj te širinen hovajba bašo Jehova hem bašo amare phralja (Jovan 8:44). Na primer, o otpadnikija vakerena hovajba hem prevrtime informacie baši e Jehovaskiri organizacija preku internet, televizija hem javera mediumija. Adala hovajba tane nesave taro „jagale strele“ e Satanaskere (Ef. 6:16). So valjani te kera ako nekoj počminela te širinel asavke hovajba? Na mangaja te šuna len! Soske? Adaleske so isi amen vera ko Jehova hem doverba ko amare phralja. Ustvari, amen nane amen nisavo kontakt e otpadnikoncar. Na dozvolinaja nikoj hem ništo, pa čak ni i radoznalost, te čhivel amen te ava ki raspravija lencar.

9. Sar šaj o obeshrabruvanje te vlijajnel upri amende?

⁹ O obeshrabruvanje šaj te kerel amari vera poslabo. Ponekogaš osetinaja amen obeshrabrime adaleske so isi amen problemija. Džangjola pe, tegani na valjani te kera amen kaj tano sa šukar. Ustvari, nane mudro te mislina kaj adala problemija na vlijajnena upri amende. Ama na smejnaja te mislina samo ko problemija. Ako keraja adava, šaj te bistra sa o šukar bukja so vetingja amenge o Jehova (Otk. 21:3, 4). O obeshrabruvanje šaj te lel amari sila hem te čhivel amen te otkažina amen (Izr. 24:10). Ama, šaj te pobedina o obeshrabruvanje.

10. So sikljovaja taro pismo jekhe phenjakoro?

¹⁰ Te dikha sar jekhe phenja taro SAD isi la zorali vera džikote grižinela pe ple romeske kova soj but nasvalo. Ko jekh pismo dži ko amaro glavno sedište, oj pišingja: „Iako ponekogaš tano pharo hem osetinaja amen obeshrabrime, isi amen zorali nadež. But sium blagodarno bašo sa o pouke so dela amen o Jehova te šaj te kerel amari vera pozorali hem te ohrabrinel amen. Čače valjanena amenge asavke sovetija hem uteha. Ola pomožinena amenge ponadari da te služina e Jehovaske hem te istrajna ko nevolje kola so o Satana koristinela len protiv amende“. Taro e phenjakere lafija sikljovaja kaj šaj te pobedina o obeshrabruvanje. Sar? Dikh ko nevolje sar ispit taro Satana. Neka ovel tut doverba kaj o Jehova ka utešinel tut hem ov blagodarno baši duhovno hrana koja so dela amen.

11. Te šaj te dikha dali amari vera tani zorali, kola pučiba valjani te puča amen?

¹¹ Dali isi nesavo podračje kote so valjani te kere tli vera pozorali? Dali ko posledna nekobor masekija uspejngjan te na sekirine tut preterano? Dali otfrlingjan o iskušenie te šune otpadnikon ili te rasprajne tut nekasaja lendar bašo hovajba so širinena len? Hem dali uspejngjan te ikljove ko krajo e obeshrabribaja? Ako oja, tegani tli vera tani ki šukar sostojba. Ama, mora te pazina adaleske so o Satana koristinela javera da oružja protiv amende. Te dikha jekh lendar.

ARAKH TUT TARO MATERIJALIZAM

12. So šaj te kerel amenge o materijalizam?

¹² O materijalizam šaj te lel amaro vnimanie taro duhovna bukja hem te kerel te na održina amaro štiti e verakoro. O apostol Pavle vakergja: „Nijekh vojniko nane zafatimo te zarabotinel pare, soske mangela te kerel i volja adaleskiri so lelja le te ovel vojniko“ (2. Tim. 2:4). Ustvari, e rimsko vojnikonge sine zabranimo te keren bilo savi javer buti. So šaj sine te slučinel pe ako nesavo vojniko na šunela akaja zabrana?

13. Soske o vojnikija ko purano vreme na smejnena sine te keren javer buti?

¹³ Zamislin tuke akaja situacija. Jekh grupa vojnikija celo sabajle vežbinena ple mačencar. Ama, jekh vojniko tari lengiri grupa nane adathe. Namesto te ovel lencar, ov tano ki diz kote so isi le pli tezga ko pazari. Rakjate, džikote o vojnikija proverinena pli oprema hem oštrinena ple mačija, o vojniko so kerela buti ko pazari spreminela i tezga tajsaske. Ama, o tajsutno dive o protivniko iznenadeno napadinela. Kova vojniko ka ovel pošukar spremimo baši borba, hem kastar o zapovedniko ka ovel zadovolno? A ako tu borinea tut, dali bi mangea uzi tute te tergjol vojniko soj šukar spremimo ili nekoj so mukhlja nešto javer te lel leskoro vnimanie?

14. Sar vojnikija e Hristoseskere, soj amenge najvažno?

¹⁴ Sar šukar vojnikija, amen na mukhaja ništo te lel amaro vnimanie tari amari glavno cel — te oven amendar zadovolna amare zapovednikija, o Jehova hem o Hristos. Amenge tano adava poskapoceno taro sa so šaj te nudinel amenge e Satanaskoro sveto. Adaleske trudinaja amen te ovel amen dovolno vreme hem sila te šaj te služina e Jehovaske, hem te održina ki šukar sostojba amaro štiti e verakoro hem amari duhovno voeno oprema.

15. Savo predupreduvanje dengja amen o Pavle, hem soske?

¹⁵ Amen valjani sekogaš te ova džangavde hem spremna! Soske? O apostol Pavle predupredingja kaj „okola so mangena te barvaljoven“ ka oven cidime tari vera (1. Tim. 6:9, 10). O lafija „cidimo taro vera“ sikavena kaj šaj te lel pe amaro vnimanie tari služba bašo Devel ako trudinaja amen te kheda materijalna bukja kola so na valjanena amenge. Agjaar šaj te razvina ko amaro vilo but „nerazumna hem štetna želbe“. Namesto te mukha asavke želbe te khuven amenge ko vilo, na smejnaja te bistra kaj o Satana koristinela len sar oružje kolea so mangela te kerel poslabo amari vera.

16. Bašo kola pučiba valjani te razmislina džikote čitinaja o izveštaj taro Marko 10:17-22?

¹⁶ Šaj isi amen dovolno pare te kina but materijalna bukja. Dali tano pogrešno te kina bukja so mangaja len, ama ustvari, na valjanena amenge? Na valjani te značinel. Sepak šukar tano te razmislina bašo akala pučiba: Čak ako šaj te dozvolina amenge nesave bukja, dali čače ka ovel amen vreme hem sila te koristina len hem te održina len? Dali šaj te počmina previše te manga o bukja so isi amen? Dali amaro mangipe sprema lende šaj te čhivel amen te postapina sar o terno manuš so odbingja e Isuseskiri pokana te služinel ki pobari mera e Devleske? (Čitin Marko 10:17-22.) Kobor pošukar ka ovel ako živinaja ednostavno životo hem ako trošinaja amaro skapoceno vreme hem sila te šaj te kera e Devleskiri volja!

IKER ŠUKAR TLO ŠTITI E VERAKORO

17. So na smejnaja te bistra?

¹⁷ Nikogaš na smejnaja te bistra kaj siem ki vojna hem kaj mora te ova spremna baši borba sekova dive (Otk. 12:17). Amare phralja hem phenja našti te phiraven amaro štiti e verakoro amenge ko than. Sekova jekh korkori mora šukar te ikerel plo štiti, javere lafencar te kerel pli vera zorali.

18. Soske o vojnikija ko purano vreme šukar ikerena sine pumare štitija?

¹⁸ Ko purano vreme, jekh vojniko dobinela sine čest ako borinela pe sine hrabro ki borba. Ama, ka osetinel pe sine ponižimo ako iranela pe sine bizo plo štiti. O rimsko istoričari o Tacit pišingja: „Jekhe vojnikoske sine najbari ladž te iranel pe khere bizo plo štiti“. Adaja sine jekh pričina soske o vojnikija šukar ikerena sine pumare štitija džikote borinena pe sine.

19. Sar šaj šukar te ikera amaro štiti e verakoro?

¹⁹ Amen šukar ikeraja amaro štiti e verakoro agjaar so džaja redovno ko sostanokija hem keraja lafi e javerencar bašo e Jehovaskoro anav hem bašo leskoro Carstvo (Evr. 10:23-25). Osven adava, sekova dive čitinaja e Devleskoro Lafi hem molinaja e Jehova te pomožinel amenge te primenina leskere sovetija ko sa so keraja (2. Tim. 3:16, 17). Agjaar, nijekh oružje kova so o Satana koristinela protiv amende nane te kerel amenge trajno šteta (Isa. 54:17). Amaro „baro štiti e verakoro“ ka arakhel amen. Ka ova hrabra hem ka uspejna te pobedina ko borbe so isi amen sekova dive agjaar so ka sorabotina amare phralencar hem phenjencar. A soj najvažno, ka ovel amen čest te ova tari e Isuseskiri strana keda ov ka pobedinel e Satana hem leskere sledbenikon (Otk. 17:14; 20:10).