TE ŽIVINA SAR HRISTIJANJA
„O Pavle blagodaringja pe e Devleske hem ohrabringja pe“
Keda o phralja taro sobranie ko Rim šungje kaj o Pavle avela, nesave lendar nakhle okolu 64 kilometre te šaj te dikhen pe lea. Sar vlijajngja upri leste lengoro verno mangipe? I Biblija vakerela: „Keda dikhlja len, o Pavle blagodaringja pe e Devleske hem ohrabringja pe“ (De 28:15). Iako o Pavle sine adava so ohrabrinela sine e phralen džikote posetinela sine o sobranija, ki akaja prilika džikote sine phanlo, ov dobingja ohrabruvanje (2Ko 13:10).
Avdive o pokrainska nadglednikija džana taro sobranie ko sobranie te šaj te ohrabrinen e phralen hem e phenjen. Isto sar sa o javera sluge e Devleskere, ola da ponekogaš tane umorna, sekirime hem obeshrabrime. Adaleske, javer puti keda ka avel o pokrainsko nadgledniko ple romnjaja ko tlo sobranie, so šaj te kere te šaj te ohrabrine len tu da? (Ri 1:11, 12).
Ov prisutno ko sostanokija propovedibaske. O pokrainsko nadgledniko tano ohrabrimo keda o objavitelija kerena žrtve te šaj te ovel len korist taro aktivnostija soj tane planirime adale posebno kurkeske (1So 1:2, 3; 2:20). Razmislin dali šaj te ove pomošno pioneri adava masek keda tani i poseta lestar. Šaj li te prijavine tut te dža ki služba lea ili leskere romnjaja? Šaj li te dža ko biblisko kursi nekasaja lendar? Ola mangena te sorabotinen različno objavitelencar, čak okolencar soj poneve ili okolencar so mislinena kaj pharo lenge te propovedinen.
Ov gostoprimlivo. Šaj li te nudine e pokrainsko nadglednikoske hem leskere romnjake te soven ki tute ili te vikine len ko ručko? Adalea ka sikave kaj mangea len. Ola na adžikerena ništo posebno (Lk 10:38-42).
Šun hem primenin leskere upatstvija hem sovetija. O pokrainsko nadgledniko ljubezno mangela te pomožinel amenge te dikha sar šaj panda pošukar te služina e Jehovaske. Ponekogaš šaj ka valjani te del amen strogo sovet (1Ko 5:1-5). Ako siem poslušna hem podložna, ov but ka ovel bahtalo (Ev 13:17).
Sikav cenenje. Vaker e pokrainsko nadglednikoske hem leskere romnjake kobor pomožingja tuke lengiri poseta. Akava šaj te vakere lenge lično ili te pišine lenge kartička (Kol 3:15).