Koristin videoklipija te šaj te sikave e interesenten

O slike hem o videoklipija lena o vnimanie e manušengoro hem pomožinena lenge te haljoven hem te pamtinen o pouke. Amaro Najbaro Učiteli, o Jehova, koristingja bukja so šaj te dikhen pe te šaj te del važna pouke e javerenge (1Mo 15:5; Ere 18:1-6). A isto akava kergja amaro Baro Učiteli, o Isus (Mt 18:2-6; 22:19-21). Ko berša so nakhle, o videoklipija sikavgje pe sar but uspešna. Dali koristinea len džikote sikavea e interesenten?

Spremime sine 10 videoklipija te šaj pošukar te sikava e manušen e brošuraja Šukar haberi taro Devel! O naslov skoro taro sekova klipi tano isto sar jekh taro pučiba ki lekcija, soj tano pišimo pokale bukvencar. Ko elektronsko izdanie tari akaja brošura isi linkija kola so pomožinena amenge te na bistra te mukha o videoklipi. Osven adava, isi javera da videoklipija kola so šaj te koristina len keda sikavaja e interesenten nesave publikacijaja taro glavna publikacie službake.

Šaj tle interesentea proučinea nesavi biblisko tema so nane lokhe te haljovel la. Ili, šaj isi le nesavo problemi. Te šaj te pomožine leske, rode nesavo videoklipi ko jw.org® ili ko JW Broadcasting®. Šaj zaedno te dikhen le, a palo adava te diskutirinen baši leste.

Sekova masek ikljona neve klipija. Džikote dikhea len, razmislin ko kola prilike šaj te koristine len keda sikavea e interesenten.