Sar šaj te pomožina pali nesavi katastrofa?

Avdive slučinena pe sa poviše hem poviše prirodna katastrofe. Keda slučinena pe asavke katastrofe, i pomoš so dela pe valjani te ovel šukar organizirimi hem valjani te ovel šukar sorabotka. Tari adaja pričina, o Vodečko telo odlučingja ki sekoja podružnica te ovel jekh Oddelenie baši pomoš ko katastrofe.

Keda o phralja taro adava oddelenie šunena kaj slučingja pe nesavi katastrofa, ola odma kontaktirinena e starešinen taro adava than te doznajnen savi pomoš valjani e objavitelenge. Ako i šteta tani bari hem o phralja kote so slučingja pe i katastrofa našti te ikljoven ko krajo korkori, tegani i podružnica ka birinel nesave phralen te organizirinen te pomožinel pe lenge. Ola ka roden dobrovolcija te pomožinen len, ili ka organizirinen te kheden pe o potrebna materijalija. A ako valjani ka džan korkori te kinen hem te anen sa soj potrebno.

Ako kerena pe o bukja ko asavko način, isi but prednostija. Sprotivno taro adava, ako o phralja kerena nešto ki pli inicijativa, šaj te slučinel pe te ovel nedorazbiranje, duplo buti, te našavel pe vreme, trudo hem materijalija.

O phralja soj tane birime tari podružnica ka odlučinen kobor pare hem kobor dobrovolcija tane potrebna te šaj te pomožinel pe ko than kote so sine i katastrofa. Isto agjaar, šaj o phralja te roden pomoš tari lokalno vlast te šaj posigate hem ko poefikasno način te pomožinel pe. Adaleske, nekoj korkori pestar na valjani te organizirinel te khedel pare, te bičhalel hajbe, ili javera bukja ili palem te džal ko than kote so sine i katastrofa, a bizo te ovel vikimo.

Ama akava na značinela kaj našti pomožinaja. Amen mangaja amare phralen hem phenjen hem adaleske keda isi prirodna katastrofe, mangaja te pomožina (Ev 13:16). So šaj te kera? Jekh taro najvažna bukja so šaj te kera tano te molina amen okolenge so sine pogodime tari katastrofa hem okolenge so pomožinena len. Isto agjaar, šaj te da dobrovolna prilogija bašo megjunarodno delo. Preku o Vodečko telo, sekoja podružnica šaj te dikhel kote najšukar šaj te koristinen pe o prilogija. Ako mangea tu da te pomožine, šaj te phere i Molba za lokalen dobrovolec za izgradba (DC-50). Agjaar o phralja ka džanen kaj sian spremno te pomožine lično.

DIKH O KLIPI BARE POPLAVE KO BRAZIL, A PALO ADAVA ODGOVORIN KO AKAVA PUČIBE:

So mukhlja tuke vpečatok baši pomoš so dengje e Jehovaskere svedokija pali poplava ko Brazil ko 2020 berš?