I čačutni mudrost glasno vikinela

1. Sar but manuša dikhena ki biblisko mudrost? (Izreki 1:20, 21).

KO BUT phuvja šaj sine te dikha sar amare phralja hem phenja tergjona ko prometna thana hem nudinena publikacie e manušenge so nakhena. Dali tu da učestvujngjan ki asavki služba? Ako oja, sigurno setingjan tut ko lafija taro Izreki kaj i mudrost glasno vikinela te šaj o manuša te šunen lakoro sovet. (Čitin Izreki 1:20, 21.) Ki Biblija hem ko amare publikacie isi čačutni mudrost, e Jehovaskiri mudrost. E manušenge valjani akaja mudrost te šaj te dobinen večno životo. Amen but radujnaja amen keda nekoj lela taro amare publikacie. Ama na mangena sarine te len. Nesave na interesinena pe bašo adava so vakerela i Biblija. A javera asana amenge. Ola mislinena kaj i Biblija tani but purani hem nane amenge korisno. A nesave kritikujnena o bibliska moralna merilija hem mislinena kaj okola so ikerena pe ki lende nane ljubezna hem tane prepravedna. Ama, o Jehova ponadari da ljubezno dela pli mudrost sekaske. Ko save načinija?

2. Ko kola načinija tani dostapno i mudrost avdive, ama so birinena poviše manuša te keren?

² Jekh način sar o Jehova dela pli mudrost tano preku plo Lafi, i Biblija. Akava lil tano skoro sarinenge dostapno. A so te vakera bašo amare publikacie? Blagodarna siem e Jehovaske so dengja bereketi te šaj amare publikacie te oven prevedime ko poviše taro 1.000 čhibja. Okola so šunena, javere lafencar so čitinena hem so primeninena adava so sikljona, ka ovel len korist. Sepak, poviše manuša odlučingje te na šunen i čačutni mudrost. Keda valjani te anen odluke ola obično kerena adava so mangena, ili pučena javere manušen. Šaj čak dikhena negativno ki amende adaleske so keraja adava so vakerela i Biblija. Ki akaja statija ka kera lafi bašo adava soske o manuša reagirinena agjaar. Ama, prvo te dikha sar šaj te steknina mudrost taro Jehova.

O PENDŽARIBE BAŠO JEHOVA INGARELA DŽI KI MUDROST

3. So značinela i čačutni mudrost?

³ I mudrost tani sposobnost te koristine adava so džanea te šaj te ane šukar odluke. Ama, i čačutni mudrost značinela nešto poviše. I Biblija vakerela: „I dar taro Jehova tani početok tari mudrost, hem te pendžare okole soj Najsveto anela razboritost“ (Izr. 9:10). Keda valjani te ana nesavi važno odluka, valjani te džana sar o Jehova dikhela ki adaja buti. Adava šaj te kera agjaar so ka proučina i Biblija hem o bibliska publikacie. Samo agjaar ka šaj te sikava čačutni mudrost (Izr. 2:5-7).

4. Soske samo o Jehova šaj te del amen čačutni mudrost?

⁴ Samo o Jehova šaj te del amen čačutni mudrost (Rim. 16:27). Soske šaj te vakera adava? Prvo, o Jehova tano amaro Stvoriteli hem ov džanela sa bašo bukja so stvoringja len (Ps. 104:24). Dujto, taro sa e Jehovaskere postapke dikhjola pe leskiri mudrost (Rim. 11:33). Trito, e Jehovaskere sovetija sekogaš tane korisna adalenge so primeninena len (Izr. 2:10-12). Ako mangaja te ova čače mudra mora te prifatina akala osnovna čačipa hem te dozvolina te vodinen amare odluke hem postapke.

5. Kola tane o posledice keda o manuša na prifatinena kaj i čačutni mudrost avela taro Jehova?

⁵ But džene ki služba priznajnena kaj o bukja ki priroda tane but šukar kerde ama ola vakerena kaj na postojnela Stvoriteli. Javera vakerena kaj verujnena ko Devel ama ola mislinena kaj o bibliska merilija tane but purane hem živinena ola sar so mangena. Soj tano o rezultati taro adava? Dali o sveto tano pošukar adaleske so o manuša živinena sprema pli mudrost namesto e Devleskiri? Dali arakhle čačutno bahtalipe ili nadež baši idnina? Adava so dikhaja okolu amende uverinela amen ko akava čačipe: „Nane mudrost, ni razboritost, ni sovet protiv o Jehova“ (Izr. 21:30). Akava pottikninela amen ponadari da te roda taro Jehova te del amen i čačutni mudrost! Žalno tano so but manuša na kerena adava. Soske?

SOSKE O MANUŠA OTFRLINENA I ČAČUTNI MUDROST

6. Sprema Izreki 1:22-25, koj tane adala so na mangena te šunen e Jehovaskiri mudrost?

⁶ But džene na šunena keda i čačutni mudrost „glasno vikinela ki ulica“. Sprema i Biblija isi trin grupe manuša so na šunena i mudrost: „O neiskusna“, „okola so asana e javerenge“ hem „o glupava“. (Čitin Izreki 1:22-25.) Akana te dikha soske akala manuša na šunena e Devleskiri mudrost hem sar šaj amen te na ova sar lende.

7. Soske nesave birinena te ačhoven „neiskusna“?

⁷ „O neiskusna“ tane okola so verujnena ko sa ili lokhe šaj te hovave len (Izr. 14:15). But puti arakhaja asavke manušen ki služba. Na primer, razmislin bašo milionja manuša soj tane hovavde taro religiozna ili politička vodačija. Nesavenge tano but pharo keda doznajnena kaj lengere vodačija hovavgje len. Ama okola soj spomnime ko Izreki 1:22, birinena te ačhoven neiskusna adaleske so agjaar mangena (Erem. 5:31). But pošukar lenge te keren adava so ola mangena, hem na mangena te džanen so vakerela i Biblija ili te ikeren pe ko lakere merilija. Jekh džuvli tari Kanada, koja soj tani but religiozno, vakergja jekhe phraleske: „Ako amaro svešteniko hovavela amen, tegani ov ka ovel odgovorno bašo adava a na amen!“ But džene mislinena sar late ama amen na mangaja te ova sar okola so namerno mangena te ačhoven neiskusna (Izr. 1:32; 27:12).

8. So ka pomožinel amen te steknina šukar iskustvo?

⁸ Isi šukar pričine soske i Biblija ohrabrinela amen te na ačhova neiskusna nego te ova „vozrasna ko [amaro] haljojbe“ (1. Kor. 14:20). Amen stekninaja šukar iskustvo keda primeninaja o bibliska načelija ko amaro životo. Ako keraja agjaar šaj te dikha sar i Biblija pomožinela amen te izbegina problemija hem te ana mudra odluke. Šukar tano te razmislina bašo odluke so angjem len angleder. Na primer, ako proučinea i Biblija hem džaja ko sostanokija, šaj te puče tut soske panda na kerea nešto te šaj te de lafi kaj ka služine e Jehovaske hem te krstine tut. A ako sian krstimo, dali trudinea tut te ove pošukar ko propovedibe hem sikajbe? Dali tle odlukencar sikavea kaj dozvolinea te vodinen tut o bibliska načelija? Dali ponašinea tut e javerencar sar o Isus bi ponašinela pe sine? Ako dikhaja kaj valjani te kera promene, valjani hor te razmislina bašo e Jehovaskere pouke kola so kerena „mudro okole so nane iskusno“ (Ps. 19:7).

9. Sar okola so „asana e javerenge“ sikavena kaj otfrlinena i mudrost?

⁹ I dujto grupa so na šunela e Devleskiri mudrost tane okola so „asana e javerenge“. Nekogaš keraja lafi asavke manušencar ki služba. Ola uživinena te vredžinen e javeren (Ps. 123:4). I Biblija panda but angleder vakergja kaj ko posledna dive ka oven but asavke manuša (2. Pet. 3:3, 4). Isto sar o džamutre e Loteskere, avdive da nesave manuša na šunena o predupreduvanja taro Devel (1. Moj. 19:14). But džene asana okolenge so živinena sprema o bibliska načelija. Ola kerena adava soske mangena te „džan palo pumare želbe kola so o Devel osudinela len“ (Juda 7, 17, 18). O način sar i Biblija opišinela akale manušen, tano slično sar o stavi so isi e otpadnikon hem e javeren so otfrlinena e Jehova!

10. Sprema Psalm 1:1, so ka pomožinel amen te na ova sar okola so asana e javerenge?

¹⁰ Sar šaj te ova sigurna kaj na siem sar okola so asana e javerenge? Jekh način tano agjaar so nane te družina amen okolencar so sekogaš kerena negativno lafi. (Čitin Psalm 1:1.) Adava značinela kaj na šunaja ili na čitinaja ništo taro otpadnikija. Valjani but te pazina te na ovel amen negativno stavi, hem te počmina te sumnina amen ko Jehova hem ko upatstvija so dela len preku pli organizacija. Adaleske valjani te puča amen: „Dali obično žalinava man keda dobinaja neve upatstvija ili keda isi nesavo nevo haljojbe? Dali često arakhava greške okolenge so predvodinena?“ Keda sigate keraja nešto te šaj te menina amen, tegani o Jehova tano zadovolno amendar (Izr. 3:34, 35).

11. So mislinena „o glupava“ bašo e Jehovaskere moralna merilija?

¹¹ I trito grupa so na šunena i mudrost tane „o glupava“. Ola tane asavke adaleske so na mangena te živinen sprema e Devleskere moralna merilija. Kerena adava so ola mislinena kaj tano šukar (Izr. 12:15). Ola otfrlinena e Jehova, kastar so avela i mudrost (Ps. 53:1). Keda keraja lencar lafi ki služba, but puti kritikujnena amen adaleske so ikeraja amen ko bibliska merilija. A tari javer strana nane len ništo popametno so te vakeren. I Biblija vakerela: „I čačutni mudrost tani but dur taro okova soj glupavo, nane le so te vakerel ki e dizjakiri porta“ (Izr. 24:7). Len nane len nesave šukar sovetija so šaj te den. Adaleske o Jehova predupredinela amen „cide tut taro glupavo manuš“ (Izr. 14:7).

12. So ka pomožinel amen te na postapina sar o glupava?

¹² Amen na siem sar okola so mrzinena e Devleskere sovetija nego mangaja len hem isto agjaar leskere merilija. Šaj te bajrara adava mangipe ako razmislinaja bašo adava so ovela keda siem leske poslušna, a so keda na siem. Razmislin samo bašo adava kobor problemija anena peske o manuša adaleske so tvrdoglavo otfrlinena e Jehovaskere mudra sovetija. Palo adava, razmislin kobor šukar životo isi tut adaleske so sian poslušno e Jehovaske (Ps. 32:8, 10).

13. Dali o Jehova silaja čhivela amen te šuna leskere mudra sovetija?

¹³ Iako e Jehovaskiri mudrost tani dostapno sarinenge, sepak ov nikas na čhivela silaja te prifatinen la. Ama, ov vakerela save posledice ka oven okolen so na šunena i mudrost so avela lestar (Izr. 1:29-32). Okola so birinena te na šunen e Jehova „ka trpinen o posledice taro pumare postapke“. Hem adaleske palo nesavo vreme ka ovel len bare dukha hem muke, a ko krajo ka oven uništime. Tari javer strana, okolenge so šunena e Jehovaskere mudra sovetija hem primeninena len, i Biblija vetinela lenge: „Koj šunela ma man, ka živinel mirno hem nane te daral taro lošnipe“ (Izr. 1:33).

I ČAČUTNI MUDROST KORISTINELA AMENGE

14-15. So sikljovaja taro Izreki 4:23?

¹⁴ Sekogaš isi amen korist keda primeninaja i mudrost so avela taro Devel. Sar so dikhlem, e Jehovaskiri mudrost šaj lokhe te arakhel pe. Na primer, ko lil Izreki o Jehova dela praktična sovetija kola so ako primeninaja len ka ovel amen pošukar životo. Akana te dikha štar asavke sovetija.

¹⁵ Arakh tlo simbolično vilo. I Biblija vakerela: „Taro sa o bukja so valjani te arakhe, najviše arakh tlo vilo soske lestar avela o životo“ (Izr. 4:23). Razmislin bašo adava so valjani te kera te šaj te zaštitina amaro doslovno vilo. Valjani te hranina amen šukar, dovolno te vežbina hem te izbegina lošna navike. Nešto slično keraja te šaj te zaštitina amaro simbolično vilo. Sekova dive čitinaja e Devleskoro Lafi, spreminaja amen bašo sostanokija, siem prisutna ki lende hem komentirinaja. Ačhovaja aktivna agjaar so redovno učestvujnaja ki služba. Izbeginaja te oven amen lošna navike, agjaar so cidaja amen taro sa so šaj te ruminel amare misle, sar soj i nemoralno zabava hem o lošno društvo.

16. Sar šaj o stihija taro Izreki 23:4, 5, te pomožinen amen avdive?

¹⁶ Ov zadovolno adalea so isi tut. I Biblija dela akava sovet: „Ma trudin tut te khede barvalipe...samo so ka dikhe ki leste ov našavgjola soske phravela pe paka sar orlo hem letinela upre ko nebo“ (Izr. 23:4, 5). O barvalipe šaj sigate te našavgjovel. Sepak, hem o barvale hem o čorole tane preokupirime te zarabotinen pare. Adaleske ola but puti kerena bukja kolencar so ruminena pumaro anav, pumaro amalipe hem kerena šteta pumare sastipaske (Izr. 28:20; 1. Tim. 6:9, 10). Tari javer strana, i mudrost pomožinela amen te dikha ispravno ko pare. Asavko stavi pomožinela amen te na ova alčna hem te ova zadovolna hem bahtale adalea so isi amen (Prop. 7:12).

17. Sprema Izreki 12:18, sar šaj te ovel amen „i čhib e mudro manušengiri“?

¹⁷ Angleder te kere lafi razmislin. Ako na pazinaja šaj te kera bari šteta amare lafencar. I Biblija vakerela: „O lafija soj vakerde bizo te mislinel pe posavena sar mači, ama i čhib e mudro manušengiri sasljarela“ (Izr. 12:18). Keda na keraja lafi javerencar bašo nekaskere maane, amen ačhovaja ko mir e phralencar (Izr. 20:19). Te šaj amare lafencar te sasljara, namesto te povredina amen mora redovno te čitina hem te razmislina bašo e Devleskoro Lafi (Luka 6:45). Keda hor razmislinaja bašo adava so pišinela ki Biblija, amare lafija šaj te oven sar jekh „izvor kotar so avela i mudrost“ kova so osvežinela e javeren (Izr. 18:4).

18. Sprema Izreki 24:6, sar šaj te ova uspešna ki služba?

¹⁸ Šun o upatstvija. I Biblija dela akava korisno sovet: „Vojna vodinela pe mudro vodstvoja, hem uspeh isi kote so isi but sovetnikija“ (Izr. 24:6). Te dikha sar adava so ka primenina akava načelo ka pomožinel amenge te ova pošukar ki služba. Namesto te kera i služba ko amaro način, trudinaja amen te primenina o predlogija soj amenge dende. Ko sostanokija dobinaja mudro vodstvo kote so iskusna phralja preku govorija hem prezentacie obučinena amen baši služba. Isto agjaar, isi amen publikacie hem videoklipija kola so pomožinena e manušenge te haljoven i Biblija. Šaj li te sikljove pošukar te koristine len ki služba?

19. So mislinea baši mudrost so dela la o Jehova? (Izreki 3:13-18).

¹⁹ Čitin Izreki 3:13-18. But siem blagodarna bašo šukar sovet so arakhljola ko e Devleskoro Lafi. So bi keraja sine bizo leste? Ki akaja statija dikhlem nesave primerija bašo korisna sovetija taro lil Izreki. Ama na samo ko jekh lil, o Jehova mukhlja ki celi Biblija te oven pišime asavke mudra sovetija. Adaleske te ova odlučna ko sekova delo taro amaro životo te primenina len. Amenge nane važno sar o manuša dikhena ki e Devleskiri mudrost soske uverime siem kaj „okola so cvrsto ikerena pe ki late ka oven vikime bahtale“.