Sar šaj te ovel amen silno mangipe jekh jekheske?

1-2. a) Soske o apostol Pavle šaj sine te vakerel kaj o mangipe tani i najbari osobina? b) Bašo kola pučiba ka kera lafi ki akaja statija?

KEDA o apostol Pavle kergja lafi baši vera, nadež hem mangipe, ov vakergja kaj i najbari osobina taro akala trin tano o mangipe (1. Kor. 13:13). Soske vakergja adava o Pavle? Ki idnina nane više te valjanel amenge vera ko e Devleskere vetuvanja bašo nevo sveto, a ni nadež kaj adala vetuvanja ka ispolninen pe adaleske so više ka oven ispolnime. Ama sekogaš ka valjani te ovel amen mangipe sprema o Jehova hem o manuša. Ustvari, amaro mangipe sprema lende ka bajrol sa poviše ki celi večnost.

² Adaleske so sekogaš ka valjanel amenge mangipe, te dikha o sledna trin pučiba. Prvo, soske valjani te manga amen jekh jekhea? Dujto, sar šaj te sikava mangipe jekh jekheske? Hem trito, sar šaj ponadari da te ovel amen silno mangipe sprema o javera?

SOSKE VALJANI TE MANGA AMEN JEKH JEKHEA?

3. Taro kola pričine valjani te manga amen jekh jekhea?

³ Soske tano važno te manga amen jekh jekhea? Jekh taro pričine tano adava so keda sikavaja mangipe amare phralenge, amen dokažinaja kaj siem čačutne hristijanja. O Isus vakergja ple apostolenge: „Agjaar sarine ka džanen kaj sien mle učenikija, ako isi tumen mangipe maškar tumende“ (Jovan 13:35). O mangipe isto agjaar pomožinela amen te ova ko jekhipe. O Pavle vakergja kaj o mangipe „sovršeno povrzinela“ (Kol. 3:14). Ama isi panda jekh javer važno pričina soske valjani te manga amen. O apostol Jovan pišingja ple phralenge: „Okova so mangela e Devle, valjani te mangel hem ple phrale“ (1. Jov. 4:21). Ustvari, keda sikavaja mangipe jekh jekheske, amen sikavaja kaj mangaja e Devle.

4-5. Vaker primer bašo adava sar amaro mangipe sprema o Jehova tano povrzimo e mangipaja so isi amen sprema amare phralja.

⁴ Sar amaro mangipe sprema o Devel tano povrzimo e mangipaja sprema amare phralja hem phenja? Te šaj pošukar te haljova akava, te vakera jekh primer: Razmislin baši povrzanost so isi maškar o srce hem o javera delija taro amaro telo. Keda o doktori proverinela o pulsi ko amaro vas te šaj te dikhel dali tano slabo ili silno, ov adalea šaj te doznajnel dali amaro srce kerela šukar buti. Sar šaj te primenina o načelo taro akava primer keda kerela pe lafi bašo mangipe?

⁵ Keda o doktori proverinela amaro pulsi, ov šaj te doznajnel kobor silno khuvela amaro srce. Slično, amen šaj te doznajna kobor silno tano amaro mangipe sprema o Devel agjaar so ka proverina kobor silno tano amaro mangipe sprema amare phralja. Ako primetinaja kaj amaro mangipe sprema o phralja slabongja, adava šaj te ovel znako kaj amaro mangipe sprema o Devel isto agjaar slabongja. Ama keda sekogaš sikavaja mangipe amare phralenge adava tano znako kaj amaro mangipe sprema o Devel tano silno.

6. Soske tano seriozno problemi ako amaro mangipe sprema o phralja počminela te slabonel? (1. Jovaneskoro 4:7-9, 11).

⁶ Ako amaro mangipe sprema o phralja hem o phenja počminela te slabonel, adava tano seriozno problemi. Soske? Adaleske so adava sikavela kaj amari duhovnost tani ki opasnost. O apostol Jovan jasno vakergja: „Koj na mangela pe phrale, kaste so dikhela, našti te mangel e Devle, kaste so na dikhela“ (1. Jov. 4:20). Koja tani i pouka amenge? O Jehova ka ovel zadovolno amendar samo ako mangaja amen jekh jekhea. (Čitin 1. Jovaneskoro 4:7-9, 11.)

SAR ŠAJ TE SIKAVA MANGIPE JEKH JEKHESKE?

7-8. Kola tane nesave načinija sar šaj te sikava mangipe jekh jekheske?

⁷ But puti ko e Devleskoro Lafi arakhaja i zapoved „mangen tumen jekh jekhea“ (Jovan 15:12, 17; Rim. 13:8; 1. Sol. 4:9; 1. Pet. 1:22; 1. Jov. 4:11). Ama o mangipe tani osobina soj andre ko vilo, a so isi amen ko vilo našti nijekh manuš te džanel. Tegani, sar šaj o javera te džanen kaj mangaja len? Taro amare lafija hem postapke.

⁸ Isi but načinija sar šaj te sikava kaj mangaja amare phralen hem phenjen. Te dikha nekobor primerija: „Vakeren o čačipe jekh jekheske!“ (Zah. 8:16). „Oven ko mir jekh jekhea“ (Mar. 9:50). „Oven prva ko adava te sikaven kaj poštujnena jekh jekhe“ (Rim. 12:10). „Prifatinen tumen jekh jekhea“ (Rim. 15:7). Ponadari da „prostinen tumenge“ (Kol. 3:13). „Phiraven o pharipa jekh jekheskoro“ (Gal. 6:2). „Ponadari da utešinen jekh jekhe“ (1. Sol. 4:18). „Izgradinen jekh jekhe“ (1. Sol. 5:11). „Molinen tumen jekh jekheske“ (Jak. 5:16).

9. Soske o utešibe tano jekh važno način sar sikavaja e javerenge kaj mangaja len? (Dikh hem i slika.)

⁹ Te dikha jekh taro načinija sar šaj te sikava mangipe e javerenge. O Pavle vakergja: „Ponadari da utešinen jekh jekhe“. Soske i uteha tano važno način sar sikavaja mangipe? Sprema jekh biblisko rečniko, o lafi so koristinela le o Pavle baši „uteha“ značinela „te ove uzi nekaste te šaj te ohrabrine le keda nakhela tari phari situacija“. Znači, adalea so utešinaja amare phrale pomožinaja leske te khedel sila hem ponadari da verno te služinel e Jehovaske. Sekova puti keda spremno šunaja amare phrale, adalea sikavaja kaj mangaja le (2. Kor. 7:6, 7, 13).

10. Sar o sočuvstvo hem i uteha tane povrzime?

¹⁰ O sočuvstvo hem sikajbe uteha tane but paše povrzime. Sar? Nekoj soj tano sočuvstvitelno tano pottiknimo te utešinel e javeren hem probinela te kerel nešto te šaj te pomožinel lenge. Znači o sočuvstvo pottikninela amen te utešina e javeren. O Pavle objasninela kaj o sočuvstvo so isi e Jehova pottikninela le te utešinel e javeren. Ov opišinela e Jehova sar „Dad soj milostivo hem Devel sekole utehakoro“ (2. Kor. 1:3). Akate o Pavle koristinela o lafi „milostivo“ te šaj te sikavel kaj e Jehova isi le sočuvstvo sprema o javera. Osven adava, bašo Devel vakerela pe kaj tano „Dad ili izvor kotar so avela i milost adaleske so isi le baro sočuvstvo sprema o manuša“. A adava sočuvstvo pottikninela le te utešinel amen „ki bilo savi nevolja“ (2. Kor. 1:4). Isto sar o pani so thavdela taro jekh izvor osvežinela okolen soj tane žedna, agjaar o Jehova osvežinela hem utešinela okolen so isi len nevolje. Sar šaj isto sar o Jehova te sikava e javerenge sočuvstvo hem te utešina len? Jekh način sar šaj te kera adava tano agjaar so ka razvina osobine kola so ka pomožinen amenge te ovel amen sočuvstvo hem te utešina e javeren. Kola tane nesave taro adala osobine?

11. Sprema Kološanja 3:12 hem 1. Petareskoro 3:8, kola javera osobine mora te oven amen te šaj te arakha o mangipe kova so pottikninela amen te utešina e javeren?

¹¹ So ka pomožinel amenge te na našava amaro mangipe kova soj potrebno te šaj ponadari da te utešina jekh jekhe sekova dive? Valjani te razvina osobine sar soj milost, phralikano mangipe hem ljubeznost. (Čitin Kološanja 3:12; 1. Petareskoro 3:8.) Sar ka pomožinen amen akala osobine? Keda ola ka oven delo tari amari ličnost, tegani edvaj adžikeraja te pomožina okolenge so nakhena taro phare situacie. Isto sar so vakergja o Isus: „O muj vakerela adava solea tano pherdo o vilo. O šukar manuš vakerela šukar bukja adaleske so ko vilo isi le šukar bukja“ (Mat. 12:34, 35). Adalea so utešinaja amare phralen hem phenjen tano jekh važno način sar sikavaja lenge kaj mangaja len.

SAR ŠAJ PONADARI DA TE BAJRARA AMARO MANGIPE SPREMA O JAVERA?

12. a) Soske valjani te pazina amen? b) Bašo kova pučibe ka kera akana lafi?

¹² Sarinen amen isi amen želba „te manga amen jekh jekhea“ (1. Jov. 4:7). Ama but tano važno te na bistra e Isuseskoro predupreduvanje kaj „bute dženengoro mangipe ka šudrol“ (Mat. 24:12). O Isus na manglja te vakerel kaj but taro leskere učenikija ka čhinaven te sikaven mangipe jekh jekheske. Ama valjani te pazina hem te na dozvolina te vlijajnel upri amende akava sveto koleste so isi sa pohari mangipe. Akale mislaja ki godi, te kera lafi bašo akava važno pučibe: So ka pomožinel amenge te džana dali amaro mangipe sprema o phralja hem o phenja tano silno?

13. So šaj te čhivel ko ispit amaro mangipe?

¹³ Jekh način sar šaj te dikha kobor tano silno amaro mangipe tano agjaar so ka ispitina sar reagirinaja ko nesave situacie (2. Kor. 8:8). O apostol Petar spomningja jekh asavki situacija: „Najangle, neka ovel tumen baro mangipe jekh jekheske, soske o mangipe učharela but grevija“ (1. Pet. 4:8). Znači, o slabostija hem i nesovršenost e javerengiri šaj te čhiven ko ispit amaro mangipe.

14. Sprema 1. Petareskoro 4:8, savo mangipe valjani te ovel amen? Vaker primer.

¹⁴ Akana te dikha podetalno o lafija so vakergja len o Petar. O prvo delo taro 8-to stiho opišinela savo mangipe valjani te ovel amen. Adathe pišinela: „Neka ovel tumen baro mangipe“. O dujto delo taro stiho objasninela ko so pottikninela amen o baro mangipe. Pottikninela amen te učhara o grevija amare phralengere hem phenjengere. Akava šaj te sporedina le jekhe primerea: Zamislin tuke astali kole so isi le but fleke hem tano grbimo. Šaj te la jekh čaršafi hem te phrava le upro astali te šaj te učhara na samo jekh ili duj fleke, ili grbime thana, nego poviše. Slično, ako isi amen baro mangipe sprema amare phralja hem phenja ka šaj te učhara, javere lafencar te prostina, na samo jekh ili duj slabostija nego „but grevija“.

15. So ka šaj te kera ako amaro mangipe sprema o phralja hem o phenja tano but silno? (Kološanja 3:13).

¹⁵ Amaro mangipe valjani te ovel doborom silno so ka prostina e javerengere greške — čak keda adava nane lokho. (Čitin Kološanja 3:13.) Keda prostinaja e javerenge, amen sikavaja kaj amaro mangipe tano silno hem kaj mangaja te radujnkera e Jehova. So javer šaj te pomožinel amenge te prostina e javerengere greške hem te na holjana sigate keda kerena nešto so nervirinela amen?

16-17. So javer šaj te pomožinel amenge te nakha preku o tikne greške e javerengere? Vaker primer. (Dikh hem i slika.)

¹⁶ Koncentririn tut ko pozitivna strane e phralengere, a na ko negativna. Razmislin bašo akava primer. Zamislin kaj sian ki jekh zabava e phralencar hem e phenjencar, nakhena tumenge šukar hem ko krajo kerea jekh grupno slika. Ustvari, kerea panda duj slike ako slučajno i prvo na ikljola šukar. Akana isi tut trin slike. Ama primetinea kaj ki jekh lendar jekh phral na iklilo šukar. So ka kere akale slikaja? Najverojatno ka brišine la soske isi tut panda duj javera kote so sarine asana.

¹⁷ O slike so garavaja len šaj te sporedina len e situaciencar so pamtinaja len. Obično pamtinaja o šukar bukja so nakhavgjem len e phralencar hem e phenjencar. Ama šaj ko jekh taro adala prilike, nesavo phral ili phen kergja ili vakergja nešto so na sine ljubezno. Dali valjani te pamtina asavke situacie? Valjani te trudina amen te brišina adava tari amari godi isto sar so bi brišinaja jekh taro adala slike (Izr. 19:11; Ef. 4:32). Šaj te bistra adaja tikni greška amare phraleskiri, adaleske so setinaja amen ko but javera šukar momentija so nakhavgjem len zaedno. Mangaja te pamtina hem te cenina samo asavke šukar momentija.

SOSKE POSEBNO AVDIVE TANO POTREBNO O MANGIPE?

18. Kola važna pouke bašo mangipe dikhlem ki akaja statija?

¹⁸ Soske amaro mangipe sprema o javera valjani ponadari da te ovel silno? Sar so dikhlem angleder, keda sikavaja mangipe amare phralenge hem phenjenge, amen sikavaja mangipe e Jehovaske. Sar sikavaja kaj mangaja amare phralen? Jekh način sar šaj te kera adava tano agjaar so ka utešina len. Šaj te kera adava ako sikavaja sočuvstvo. Sar šaj ponadari da te bajrara amaro mangipe sprema o javera? Valjani te prostina lenge čak keda adava nane lokho.

19. Soske avdive tano posebno važno te sikava mangipe jekh jekheske?

¹⁹ Soske avdive tano posebno važno te sikava mangipe jekh jekheske? O Petar vakergja jekh pričina: „Paše tano o krajo bašo sa, adaleske neka ovel tumen baro mangipe jekh jekheske“ (1. Pet. 4:7, 8). Sar so avela sa popaše o krajo akale lošno svetoskoro, so šaj te očekujna? Keda kergja lafi bašo ple sledbenikija, o Isus vakergja: „Sa o narodija ka mrzinen tumen bašo mlo anav“ (Mat. 24:9). Te šaj te ačhova verna e Jehovaske, iako o javera mrzinena amen, valjani te ova ko jekhipe. Ako keraja adava, o Satana nane te uspejnel te odvojnel amen, nego ka ačhova ko jekhipe preku o mangipe „kova so sovršeno povrzinela amen“ (Kol. 3:14; Fil. 2:1, 2).