Neka ovel tut doverba kaj o Jehova ka pomožinel tut ko phare dive

1-2. a) Save sličnostija isi maškar amende hem o Evreija so irangje pe ko Erusalim? b) Vaker nesave pharipa so sine e Evreen. (Dikh i ramka „Ko vreme e Ageeskoro, e Zaharijaskoro hem e Ezraskoro“.)

DALI ponekogaš sekirinea tut so ka ovel ki idnina? Šaj našavgjan tli buti hem sekirinea tut sar ka grižine tut tle familijake. Ili sekirinea tut tle familijake adaleske so i političko situacija nane šukar, isi progonstvo ili protivibe bašo amare aktivnostija. Dali isi tut nesave taro akala problemija? Ako oja, akaja statija ka ohrabrinel tut soske ki late ka dikha sar o Jehova pomožingja e Izraelconge taro purano vreme kolen so sine len slična problemija.

² E Evreenge kola so celo plo životo živingje ko Vavilon valjangja silno vera te šaj te mukhen o udobno životo so sine len hem te džan ki phuv kolake so poviše džene na džanle but. Kratko otkeda resle, soočingje pe ekonomska hem politička problemencar hem sine len protivibe. Adaleske nesavenge sine pharo o gradibe e hrameskoro te čhiven ko prvo than ko plo životo. Tari adaja pričina okolu 520 berš a.a.e., o Jehova bičhalgja duje prorokon e Ageje hem e Zaharija te pomožinen e narodoske te iranen pli revnost (Agej 1:1; Zah. 1:1). Sar so ka dikha akala prorokija uspejngje te ohrabrinen e narodo. Sepak, otprilika 50 berš pokasno e Evreenge so irangje pe ko Erusalim valjangja palem ohrabruvanje. Palo adava o Ezra, o vešto prepišuvači e zakoneskoro, alo taro Vavilon ko Erusalim te ohrabrinel e Devleskere narodo te čhiven o čačutno obožavibe ko prvo than ko pumaro životo (Ezra 7:1, 6).

3. Kola pučiba ka dikha ki akaja statija? (Izreki 22:19).

³ O proroštvija taro Agej hem o Zaharija pomožingje e Devleskere narodoske taro purano vreme ponadari da te ovel len doverba ko Jehova iako sine len protivibe. Ola šaj te pomožinen amenge da te ova uverime kaj o Jehova ka pomožinel amen bizi razlika save pharipa ka oven amen ko životo. (Čitin Izreki 22:19.) Džikote keraja lafi baši e Devleskiri poraka so dengja la preku o Agej hem o Zaharija hem džikote dikhaja e Ezraskoro primer, ka dobina odgovor ko akala pučiba: Sar vlijajngje upro Evreija adava so sine len različna pharipa? Soske valjani e Devleskiri volja te ovel amenge ko prvo than ko životo čak keda nakhaja taro phare vremija? Sar šaj te ovel amen pobari doverba ko Jehova keda isi amen pharipa?

SAR VLIJAJNGJE O PHARIPA UPRO EVREIJA

4-5. Soske šaj o Evreija našavgje pumari revnost palem te gradinen o hrami?

⁴ Keda o Evreija irangje pe ko Erusalim, adžikergja len but buti. Ola odma počmingje te gradinen e Jehovaskoro žrtveniko hem čhivgje e hrameskere temelija (Ezra 3:1-3, 10). Ama i revnost so sine len ko početok sigate nakhlja. Soske? Osven so valjangje te gradinen o hrami, ola valjangje te gradinen peske khera, te obrabotinen o nive hem te grižinen pe pumare familienge (Ezra 2:68, 70). Hem upro sa adava, sine len protivibe taro dušmanja kola so kergje plani te čhinavel pe e gradibaja e hrameskoro (Ezra 4:1-5).

⁵ Osven adava, akala Evreija soočingje pe ekonomska hem politička problemencar. Ko adava periodi lengiri phuv sine delo taro persisko carstvo. Otkeda ko 530 berš a.a.e., o persisko cari o Kir mulo, ko leskoro than ulo cari o Kambis kova so manglja te osvojnel o Egipet. Džikote džala sine ko Egipet, leskere vojnikija šaj nakhle tari izraelsko teritorija hem verojatno rodingje hajbaske, pijbaske hem than kote so nesavo vreme šaj sine te rakjaren, a adava kergja panda popharo te ovel e Izraelconge. Keda ko persisko carstvo počmingja te vladinel o Darij I, athe panda sine politička problemija hem o manuša ko nesave thana buninena pe sine protiv o vlastija. Sa akava sigurno kergja nesave Evreija te sekirinen pe bašo adava sar ka grižinen pe pumare familienge. Bašo sa akala pharipa nesave Evreija mislingje kaj panda nane vreme te gradinel pe e Jehovaskoro hrami (Agej 1:2).

6. Sprema Zaharija 4:6, 7, save javera pharipa sine e Evreen, hem ko so uveringja len o Zaharija?

⁶ Čitin Zaharija 4:6, 7. Osven o ekonomska hem o politička problemija, e Evreen sine len hem progonstvo. Ko 522 berš a.a.e., o dušmanja uspejngje te vlijajnen upri persisko vlast te zabraninel e Evreenge te gradinen e Jehovaskoro hrami. Ama, o Zaharija uveringja e Evreen kaj o Jehova ka koristinel pli mokjno sila te cidel sekoja prečka. Ko 520 berš a.a.e., o cari o Darij dozvolingja te prodolžinel pe te gradinel pe o hrami hem čak dengja len o potrebna sredstvija te šaj te gradinen. Ov isto agjaar zapovedingja e upravitelenge taro adava than te pomožinen len (Ezra 6:1, 6-10).

7. Sar o Jehova blagoslovingja e Evreen so irangje pe ko Erusalim kolenge so e Jehovaskiri volja sine najvažno?

⁷ Preku o Agej hem o Zaharija o Jehova vetingja ple narodoske kaj ka poddržinel len ako ko prvo than čhivena o gradibe e hrameskoro (Agej 1:8, 13, 14; Zah. 1:3, 16). Adaleske so sine ohrabrime taro prorokija, o Evreija počmingje palem te gradinen o hrami ko 520 berš a.a.e., hem bašo pohari taro pandž berš završingje e gradibaja. Adaleske so e Evreenge sine najvažno te keren e Devleskiri volja čak ko phare vremija, o Jehova pomožingja len hem ko materijalno hem ko duhovno pogled. A adava angja lenge bari radost džikote služinena sine e Jehovaske (Ezra 6:14-16, 22).

E DEVLESKIRI VOLJA NEKA OVEL TUKE KO PRVO THAN

8. Sar šaj o lafija taro Agej 2:4 te pomožinen amen te koncentririna amen te kera e Jehovaskiri volja? (Dikh hem i fusnota.)

⁸ Adaleske so i bari nevolja tani but paše, but tano važno te ova poslušna ki zapoved te dža te vakera o šukar haberi (Marko 13:10). Sepak šaj te ovel amenge pharo te čhiva i služba ko prvo than ako isi amen finansiska problemija, ili protivibe ki služba. Sar šaj e Jehovaskiri volja te ovel amenge najvažno ko životo? Adava so ka ova uverime kaj „o Jehova o zapovedniko e vojskengoro“b tano tari amari strana. Ov ka pomožinel amenge ako ponadari amenge važno te kera leskiri volja a na amari. Adaleske, nane sostar te dara. (Čitin Agej 2:4.)

9-10. Sar jekh bračno pari dikhlja kaj adava so vakergja o Isus ko Matej 6:33 tano čače?

⁹ Te dikha o primer jekhe bračno pareskoro so vikinena pe Oleg hem Irinac kola so služinena sar pionerija. Otkeda preselingje pe ko javer than te pomožinen ko jekh sobranie ola ačhile bizi buti adaleske so sine ekonomska problemija ki adaja phuv. Iako skoro jekh berš našti sine te arakhen buti kolate so šaj sine te ačhon, sepak ola celo vreme osetingje e Jehovaskiri poddrška hem ponekogaš dobinena sine pomoš taro phralja hem phenja. So pomožingja lenge te ikljoven ko krajo akale pharipaja? O Oleg kova so ko početok sine razočarimo vakerela: „Adava so siem sine zafatime ki služba pomožingja amenge te koncentririna amen ko adava soj najvažno ko amaro životo“. Džikote ponadari da rodena sine buti, ola sine zafatime e službaja.

¹⁰ Jekh dive keda irangje pe tari služba, jekh taro lengere komšie vakergja lenge kaj lengoro paše amal patujngja okolu 160 kilometre te šaj te anel lenge duj torbe hajbaja. O Oleg vakerela: „Adava dive panda jekh puti halilem kobor but o Jehova hem o phralja grižinena pe amenge. Uverime siem kaj o Jehova nikogaš na bistrela ple slugen bizi razlika kobor hem te ovel phari lengiri situacija“ (Mat. 6:33).

11. So šaj te očekujna ako ponadari da koncentririnaja amen te kera e Devleskiri volja?

¹¹ O Jehova mangela i najvažno buti te ovel amenge te kera učenikija soske agjaar spasinena pe životija. Sar so dikhlem ko eftato pasus, o Agej pottikningja e narodo palem te počminel e sveto službaja. O Jehova vetingja ple slugenge kaj ako palem počminena te gradinen, ov kaj ka del len plo blagoslov (Agej 2:18, 19). Amen da šaj te ova sigurna kaj o Jehova ka blagoslovinel amaro trudo ako ko prvo than čhivaja i zadača koja so ov dengja amen.

SAR ŠAJ TE BAJRARA AMARI DOVERBA KO JEHOVA

12. Soske e Ezraske hem e javere Evreenge valjangja silno vera?

¹² Ko 468 berš a.a.e., i dujto grupa Evreija iklile taro Vavilon te džan ko Erusalim a zaedno lencar sine hem o Ezra. E Ezraske hem okolenge so cidingje akava drumo, valjangja bari vera. Soske? Ola valjangje te nakhen taro opasna drumija hem ingarena sine pea but zlato hem srebro kova so dengja len o cari bašo hrami. Adaleske o čora šaj sine lokheste te napadinen len (Ezra 7:12-16; 8:31). Isto agjaar, sigate halile kaj ni ko Erusalim na sine bezbedno. Ki diz živinena sine but hari manuša, a o zidija hem o porte valjani sine te popravinen pe. So šaj te sikljova taro Ezra bašo adava sar te bajrara amari doverba ko Jehova?

13. Sar o Ezra bajrargja pli doverba ko Jehova? (Dikh hem i fusnota.)

¹³ O Ezra dikhlja sar o Jehova poddržinela ple narodo ko phare vremija. But berša angleder, ko 484 berš a.a.e., o Ezra verojatno živinela sine ko Vavilon keda o cari o Ahasver naredingja te mudaren sa e Evreen ko persisko carstvo (Est. 3:7, 13-15). Akava značinela kaj e Ezraskoro hem sa e Evreengoro životo sine ki opasnost! Keda šungje bašo akava, ola sine doborom sekirime so postingje hem rovgje hem sigurno molingje e Jehova te pomožinel lenge (Est. 4:3). Zamislin tuke sar o Ezra hem o Evreeja osetingje pe keda dikhle sar okola so mangle te mudaren len sine mudarde! (Est. 9:1, 2). Akala phare vremija verojatno spremingje e Ezra bašo idna ispitija hem najverojatno bajrargje leskiri doverba kaj o Jehova šaj te zaštitinel ple narodo.d

14. Koja pouka siklili jekh phen keda dikhlja sar o Jehova grižinela pe lake ko phare vremija?

¹⁴ Keda dikhaja sar o Jehova grižinela pe amenge ko phare vremija, adava bajrarela amari doverba ki leste. Te dikha o primer e Anastasijakoro koja so živinela ki Istočno Evropa. Oj mukhlja pli buti adaleske so lakere kolege kerena sine lake baro pritisok te mešinel pe ko jekh političko problemi. Oj vakerela: „Nikogaš na sium sine ki situacija te ovav bizo pare. Ama mukhljum akaja buti e Jehovaske ko vasta hem dikhljum sar ov ljubezno grižingja pe mange. Te ačhiljum nekogaš palem bizi buti, nane te darav. Ako mlo nebesno Dad grižinela pe mange avdive, ov ka grižinel pe mange tajsa da“.

15. So pomožingja e Ezraske ponadari da te bajrarel pli doverba ko Jehova? (Ezra 7:27, 28).

¹⁵ O Ezra dikhlja e Jehovaskoro vas ko plo životo. Adava so o Ezra razmislinela sine sar o Jehova grižingja pe leske angleder sigurno pomožingja le te bajrarel pli doverba ki leste. Adava šaj te primetina taro akala lafija: „O vas e Jehovaskoro mle Devleskoro, sine upri mande“. (Čitin Ezra 7:27, 28.) O Ezra koristingja slična lafija panda pandž puti ko biblisko lil kova so ov pišingja le (Ezra 7:6, 9; 8:18, 22, 31).

16. Ko kola situacie šaj te dikha kaj o Jehova čače pomožinela amen? (Dikh hem i slika.)

¹⁶ O Jehova šaj te pomožinel amen keda siem ki phari situacija. Na primer, daja prilika e Jehovaske te sikavel plo vas ko amaro životo keda valjani te puča ki buti bašo slobodna dive te šaj te dža ko kongres ili keda valjani te menina o rabotno vreme te šaj te dža ko sa amare sostanokija. Šaj o bukja ka ikljon but pošukar taro adava so očekujngjem. Tegani amari doverba ko Jehova ka ovel pobari.

17. Sar o Ezra sikavgja kaj tano ponizno ko phare vremija? (Dikh i slika tari naslovno strana.)

¹⁷ O Ezra ponizno rodingja pomoš taro Jehova. Sekogaš keda sine sekirimo baši nesavi odgovornost, o Ezra ponizno molinela pe sine e Jehovaske (Ezra 8:21-23; 9:3-5). Adava so sine le doverba ko Jehova pottikningja e javeren te poddržinen le hem te ovel len sar leskiri vera (Ezra 10:1-4). Keda sekirinaja amen bašo amare materijalna potrebe ili baši amare familijakiri bezbednost, mora te ovel amen doverba ko Jehova hem te roda lestar pomoš ki molitva.

18. So šaj te pomožinel amenge te ovel amen panda pobari doverba ko Jehova?

¹⁸ Ako ponizno rodaja pomoš taro Jehova hem prifatinaja i pomoš taro amare phralja hem phenja, tegani amari doverba ko Devel ka bajrol panda poviše. I Erika kola so isi la trin čhave, na našavgja pli doverba ko Jehova čak keda slučingje pe lake strašna bukja. Mulo lakoro bebe angleder te bijangjovel a bašo kratko vreme mulo hem lakoro rom. Keda setinela pe ko sa adava so slučingja pe lake, oj vakerela: „Našti te džane angleder sar o Jehova ka pomožinel tuke. I pomoš šaj te dobina la ko način so na očekujnaja. Dikhljum kaj o Jehova preku mle amalengere postapke hem lafija odgovoringja ko mle molitve. Ako vakerava lenge so slučinela pe mange ko životo tegani šaj polokheste te pomožinen man“.

NEKA OVEL TUT DOVERBA KO JEHOVA DŽI KO KRAJO

19-20. So sikljovaja taro Evreija so našti irangje pe ko Erusalim?

¹⁹ Šaj isto agjaar te sikljova jekh važno pouka taro Evreija da kola so na irangje pe ko Erusalim. Nesave šaj na irangje pe adaleske so sine phure, nasvale ili bašo lengere familijarna okolnostija. Sepak, ola spremno poddržingje okolen so irangje pe ko Erusalim agjaar so dengje len but bukja bašo hrami (Ezra 1:5, 6). Izgleda okolu 19 berš pokasno, otkeda irangja pe i prvo grupa ko Erusalim, okola so ačhile ko Vavilon ponadari da bičhalena sine prilogija ko Erusalim (Zah. 6:10).

²⁰ Čak ako našti keraja adava so mangaja ki služba bašo Jehova, šaj te ova sigurna kaj o Jehova dikhela adava so keraja taro vilo. Kotar džanaja adava? Ko e Zaharijaskoro vreme o Jehova vakergja ple prorokoske te kerel kruna taro zlato hem srebro kova so sine bičhaldo okolendar so ačhile ko Vavilon (Zah. 6:11). Akaja „skapoceno kruna“ valjangja te setinkerel len ko lengere darežliva prilogija (Zah. 6:14). Amen šaj te ova sigurna kaj o Jehova nikogaš na bistrela so trudinaja amen te služina leske celo vilea ko phare vremija (Evr. 6:10).

21. So ka pomožinel amenge te ovel amen doverba ko Jehova, bizi razlika so ka slučinel pe ki idnina?

²¹ Džangjola pe, ko akala posledna dive ponadari da ka ovel amen pharipa hem šaj čak o uslovija ka oven pološna ki idnina (2. Tim. 3:1, 13). Ama na valjani preterano te sekirina amen. Ma bistre adava so vakergja o Jehova ple narodoske ko e Agejeskoro vreme: „Me sium tumencar... Ma daran“ (Agej 2:4, 5). Amen da šaj te ova sigurna kaj o Jehova ka ovel amencar sa džikote daja amaro najšukar te kera leskiri volja. Ako primeninaja o pouke taro proroštvija so vakergje len o Agej hem o Zaharija hem taro primer e Ezraskoro, ka bajrara amari doverba ko Jehova, bizi razlika so adžikerela amen ki idnina.