Soj šukar a soj lošno: Pučibe so sarine pučaja amen

Ako mangea te dža negde kaj so nikogaš na sian sine angleder, so bi kerea?

1. 1. Ka dža ko drumo koleste so mislinea kaj valjani te džal pe.

2. 2. Ka dža palo javera mislindor kaj ola džanena o drumo.

3. 3. Ka ovel tut doverba ki nekaste ili ko nešto koleste so šaj te ove sigurno sar soj, GPS, mapa ili amal so džanela šukar o drumo.

Ako birinea i prvo ili i dujto opcija ka rese dži negde, ama šaj nane te rese athe kaj so mangljan te dža. Ama ako birinea i trito opcija šaj te ove sigurno kaj ka rese athe kaj so mangljan.

Amaro životo tano sar jekh patujbe kova so mislinaja kaj ka ingarel amen ki srekjno idnina. Dali ka resa dži athe ili na, but zavisinela taro adava kastar rodaja sovet keda valjani te ana nesavi odluka.

Poviše odluke so anaja len tane tikne, ama nesave tane but bare. Akala važna odluke sikavena so mislinaja kaj tano šukar hem lošno. Ola šaj te vlijajnen but vreme upri amende hem upro okola so mangaja len, bizi razlika dali ko šukar ili ko lošno način. Asavke odluke šaj te oven bašo bukja sar soj:

• Seks hem brako

• Česnost, buti hem pare

• Te bajrarel pe čhaven

• Ponašibe e javerencar

Sar šaj te ove sigurno kaj o odluke so ka ane len bašo akala bukja ka ingaren tut hem tle familija ki srekjno idnina?

Sekova jekh amendar valjani te pučel pe: So šaj te pomožinel mange te anav šukar odluke bašo adava soj šukar, a soj lošno?

Ko akava spisanie ka dikha soske šaj te ovel amen doverba ko adava so vakerela i Biblija kaj tano šukar hem lošno hem sar šaj te pomožinel tuke?