Prostinela o grevija so sine kerde angleder

Amare grevija šaj te oven prostime samo preku i otkupno žrtva e Isuseskiri koja so ov platingja la ple ratea (Ef. 1:7). Sepak, ki Biblija pišinela: „O Devel... sikavgja pli strplivost adalea so prostingja o grevija so sine kerde angleder“, so značinela kaj o Jehova prostingja o grevija panda angleder o Isus te del i otkupnina (Rim. 3:25). Sar šaj o Jehova te kerel adava, a ko isto vreme te ikerel pe ko ple sovršena merilija baši pravda?

Anglo e Jehovaskere jakhja, i otkupnina sar te phene sine više platimi ko momenti keda o Devel odlučingja te mukhel „potomstvo“ preku koleste ka spasinen pe okola so isi len vera ki leste (1. Moj. 3:15; 22:18). O Devel sine celosno uverimo kaj ko vreme so odredingja le bašo adava, leskoro edinstveno bijamo Čhavo spremno ka del plo životo sar otkupnina (Gal. 4:4; Evr. 10:7-10). Džikote sine ki phuv sar e Devleskoro pretstavniko, e Isuse sine le vlast te prostinel grevija panda angleder te del i otkupnina. Ov šaj sine te prostinel o grevija okolengere so sine len vera adaleske so džanlja kaj leskere žrtvaja ka oven učharde lengere grevija (Mat. 9:2-6).