Sar o sobranie džala palo e Jehovaskoro primer keda nekoj kerela pharo grevo

1. So mangela o Jehova sa e manušenge?

KEDA o Jehova kergja e manušen, dengja len slobodno volja. Sekova puti keda anaja odluke amen koristinaja akava poklon. I najvažno odluka so šaj nekoj te anel la tani te del lafi e Jehovaske kaj ka služinel leske celo životo hem te ovel delo tari leskiri familija. O Jehova mangela sekova jekh amendar te kerel adava. Soske? Adaleske so mangela e manušen hem mangela te oven srekjna. Ov mangela ola te oven lea amala hem te živinen zasekogaš (5. Moj. 30:19, 20; Gal. 6:7, 8).

2. Sar dikhela o Jehova nekaste so kergja grevo hem na kainela pe? (1. Jovaneskoro 2:1).

² Sepak, o Jehova nikas na čhivela silaja te služinel leske. Ov mukhela sekoj korkori te odlučinel so ka kerel. Ama so ako jekh krstimo hristijani phagela e Devleskoro zakoni adalea so kerela pharo grevo? Ako na kainela pe, ov mora te ovel cidimo taro sobranie (1. Kor. 5:13). Sepak, čak hem keda ka avel dži ko adava, o Jehova celo vilea nadinela pe kaj adava so grešingja ka iranel pe ki leste. Ustvari, adaja tani jekh važno pričina soske o Jehova dengja i otkupnina — te šaj te prostinel okolenge so kainena pe bašo pumare grevija. (Čitin 1. Jovaneskoro 2:1.) Amaro Devel kova soj pherdo mangipaja, ljubezno pottikninela okolen so grešingje te kainen pe (Zah. 1:3; Rim. 2:4; Jak. 4:8).

3. So ka dikha ki akaja statija?

³ O Jehova mangela te ovel amen sar leskoro stavi bašo grevo hem bašo okola so kerena pharo grevo. Ki akaja statija ka dikha sar šaj te kera adava. Džikote čitinea akaja statija, primetin 1) sar postapingja o sobranie ko Korint ko prvo veko keda jekh hristijani kergja pharo grevo, 2) save upatstvija dengja o Pavle keda adava manuš kaingja pe hem 3) so sikavela amenge akava biblisko izveštaj bašo Jehovaskoro stavi sprema o hristijanja so kerena pharo grevo.

SAR POSTAPINGJA O SOBRANIE KO KORINT KEDA JEKH MANUŠ KERGJA PHARO GREVO

4. So slučingja pe ko sobranie ko Korint taro prvo veko? (1. Korinkjanja 5:1, 2).

⁴ Čitin 1. Korinkjanja 5:1, 2. Keda sine ko plo trito misionersko patujbe, o Pavle šungja bašo nešto strašno so slučingja pe ko nevo sobranie ko Korint. Jekhe phrale taro adava sobranie sine le seksualna odnosija ple makjeaja. Adava sine strašno hem asavko nešto na slučingja pe ni maškar o manuša so na pendžarena e Devle. O sobranie na samo so mislinela sine kaj adava nane strašno, nego šaj hem dičinela pe sine adalea. Šaj nesave ko sobranie mislinena sine kaj agjaar tane milostiva sar o Jehova soj milostivo sprema o nesovršena manuša. Ama o Jehova na odobrinela keda nekoj taro leskoro narodo kerela grevo. Asavke drsko ponašibaja, akava manuš sigurno kaljargja o anav e sobranieskoro. Isto agjaar, šaj vlijajngja upro javera da hristijanja so družinena pe sine lea. Adaleske, save upatstvija dengja o Pavle e sobranieske?

5. Save upatstvija dengja o Pavle e sobranieske hem soske? (1. Korinkjanja 5:13; dikh hem i slika.)

⁵ Čitin 1. Korinkjanja 5:13. Vodimo tari e Devleskiri sila, o Pavle pišingja pismo koleste so dengja upatstvo kaj o grešniko so na kainela pe valjani te ovel cidimo taro sobranie. Sar valjani sine o verna hristijanja te ponašinen pe lea? O Pavle vakergja lenge te čhinaven te družinen pe akale manušea. Ov vakergja lenge čak ni te na han lea (1. Kor. 5:11). Ako haja nekasaja zaedno, lokhe šaj te počmina te nakhava poviše vreme lea. Sar ka koristinel sine e sobranieske ako čhinavela sine te družinel pe akale hristijanea? Agjaar o sobranie ka ovel sine zaštitimo taro lošno vlijanie (1. Kor. 5:5-7). Isto agjaar, adava so nane sine te družinen pe lea šaj sine te pomožinel leske te haljovel kaj kergja nešto but lošno anglo e Jehovaskere jakhja hem agjaar te počminel te ladžal hem te ovel pottiknimo te kainel pe.

6. Sar vlijajngja e Pavleskoro pismo upro sobranie hem upro okova so kergja o pharo grevo?

⁶ Otkeda bičhalgja o pismo e hristijanenge ko Korint, o Pavle počmingja te pučel pe sar ka reagirinen ola ko leskere lafija. Palo nesavo vreme, o Tit vakergja leske nešto so but radujnkergja le. O sobranie reagiringja pozitivno ko e Pavleskoro pismo (2. Kor. 7:6, 7). Adala hristijanja šungje leskere upatstvija. Osven adava, kratko otkeda dobingje o pismo taro Pavle, o manuš kova so kergja adava pharo grevo kaingja pe. Ov čhinavgja te postapinel pogrešno, meningja plo stavi hem počmingja te ikerel pe ko e Jehovaskere pravedna merilija (2. Kor. 7:8-11). So javer vakergja o Pavle e sobranieske te kerel?

SAR VALJANI SINE O SOBRANIE TE POSTAPINEL E MANUŠEA SO KAINGJA PE

7. Soske sine šukar adava so o manuš so kergja grevo sine cidimo taro sobranie? (2. Korinkjanja 2:5-8).

⁷ Čitin 2. Korinkjanja 2:5-8. O Pavle vakergja: „Poviše džene tumendar više ukoringje asavke manuše so grešingja, hem adava tano dovolno“. Javere lafencar, o ukor ispolningja pli cel. Koja cel? Te pomožinel leske te kainel pe (Evr. 12:11).

8. So javer vakergja o Pavle e sobranieske te kerel?

⁸ Adaleske, bašo phral so kergja grevo, o Pavle vakergja e sobranieske: „Spremno prostinen leske hem utešinen le... sikaven leske kaj mangena le“. Primetin kaj o Pavle manglja o sobranie te kerel nešto poviše nego samo te dozvolinel akale manušeske palem te ovel delo taro e Jehovaskoro narodo. O Pavle manglja ola te uverinen le ple lafencar, postapkencar hem ponašibaja kaj čače prostingje leske hem kaj mangena le. Agjaar jasno ka sikaven leske sine kaj radujnena pe so irangja pe ko sobranie.

9. Soske nesavenge šaj sine pharo te prostinen e phraleske kova so kaingja pe bašo plo grevo?

⁹ Ko početok, nesave taro sobranie šaj na radujngje pe keda šungje kaj o manuš kova so kaingja pe bašo plo grevo palem tano delo taro sobranie. Soske vakeraja akava? Ov ple postapkencar kergja šteta celo sobranieske, a šaj nesave dženenge angja ladž da. Nesave taro sobranie kola so dena sine pestar sa te ačhoven čista ko moralno pogled šaj mislinena sine kaj nane fer akava manuš te ovel spremno primimo ko sobranie. (Sporedin Luka 15:28-30.) Soske sepak sine važno o sobranie te sikavel kaj čače mangela ple phrale kova so irangja pe?

10-11. So šaj sine te slučinel pe ako o starešine na prostinena sine e manušeske so kaingja pe?

¹⁰ Zamislin tuke so šaj sine te slučinel pe ako o starešine na iranena sine ko sobranie e manuše kova so čače kaingja pe. Ili, ako otkeda irangja pe, o sobranie te na mangel sine te sikavel leske mangipe. Šaj sine te „peravel le i but bari žal“. Lokhe šaj sine te mislinel peske kaj nikogaš više našti palem te ovel delo taro sobranie. Ov šaj čak te čhinavel sine te trudinel pe te ovel palem paše e Devlea.

¹¹ Soj panda pološno, ako na prostinena sine e grešnikoske so kaingja pe, tegani e phralengoro hem e phenjengoro amalipe e Jehovaja ka ovel sine ki opasnost. Soske? Adaleske so agjaar na bi džana sine palo e Jehovaskoro primer, kova so prostinela okolenge so kainena pe bašo pumare grevija, nego bi džana sine palo e Satanaskoro primer, kova soj lošno hem nane milostivo. Ola ustvari ka oven sine alatke ko e Bengeskere vasta kola so ov šaj sine te koristinel len te šaj akava manuš te čhinavel te služinel e Jehovaske (2. Kor. 2:10, 11; Ef. 4:27).

12. Sar šaj sine o sobranie te džal palo e Jehovaskoro primer?

¹² Tegani sar šaj sine o sobranie ko Korint te džal palo primer e Jehovaskoro namesto e Satanaskoro? Agjaar so ka postapinel sine okolencar so kainena pe bašo pumare grevija isto sar so bi postapinela sine o Jehova. Primetin so pišingje bašo Jehova nesave pisatelija e Biblijakere. O cari o David pišingja: „Tu, Jehova, sian šukar hem spremno sian te prostine“ (Ps. 86:5). O Mihej pišingja: „Kova Devel tano sar tute, kova so prostinela o greške hem nakhela preku o grevo?“ (Mih. 7:18). A o Isaija vakergja: „O rumimo manuš neka mukhel plo drom hem o lošno manuš ple misle, neka iranel pe ko Jehova, kova so ka sikavel leske milost, ko amaro Devel, soske ov spremno ka prostinel leske!“ (Isa. 55:7).

13. Soske šaj sine o manuš palem te ovel iramo ko sobranie? (Dikh i ramka „Keda sine iramo o manuš taro Korint?“)

¹³ Te šaj te džan sine palo e Jehovaskoro primer, o hristijanja taro sobranie ko Korint valjani sine te sikaven akale manušeske kaj mangena le hem tane srekjna so irangja pe. Adalea so šungje o upatstvo e Pavleskoro hem prostingje leske, o hristijanja taro akava sobranie sikavgje kaj tane „poslušna ko sa“ (2. Kor. 2:9). Iako nakhle samo nekobor masekija otkeda sine cidimo taro sobranie, akale manušeske o ukor pomožingja te kainel pe. Adaleske, štom sine jasno kaj kaingja pe, na valjani sine više te adžikerel pe te šaj palem te ovel iramo ko sobranie.

TE SIKAVA PRAVDA HEM MILOST SAR O JEHOVA

14-15. So sikljovaja taro adava so slučingja pe ko sobranie ko Korint? (2. Petareskoro 3:9; dikh hem i slika.)

¹⁴ O izveštaj bašo adava sar postapingja o sobranie ko purano Korint ki akaja situacija, sine pišimo hem garavdo „te šaj amen te sikljova“ (Rim. 15:4). Taro akava izveštaj sikljovaja kaj o Jehova na dozvolinela nekoj so kerela pharo grevo te ačhovel ko sobranie. Nesave šaj mislinena kaj adaleske so o Jehova tano milostivo, ka dozvolinel nekoj so na kainela pe te ačhovel ko sobranie. Ama o Jehova na sikavela milost ko asavko način. O Jehova tano milostivo, ama nane popustlivo, a ni palem na peravela ple merilija (Juda 4). Ustvari, ako dozvolinela e grešnikonge so na kainena pe te ačhoven ko sobranie, o Jehova ni hari nane te ovel milostivo soske agjaar ka anel ki opasnost celo sobranie (Izr. 13:20; 1. Kor. 15:33).

¹⁵ Sepak, sikljovaja hem kaj o Jehova na mangela nikoj te ovel uništimo. Ov mangela, sekogaš keda adava šaj, te pomožinel e manušenge te spasinen pe. Ov sikavela milost okolenge so meningje plo način sar razmislinena hem postapinena hem kola so mangena palem te oven lea amala. (Ezek. 33:11; čitin 2. Petareskoro 3:9.) Adaleske, keda o manuš ko Korint kaingja pe hem čhinavgja te kerel adava soj pogrešno, o Jehova koristingja e Pavle te šaj te objasninel e sobranieske kaj valjani te ovel leske prostimo hem kaj valjani mangipaja palem te prifatinen le.

16. So osetinea bašo Jehova otkeda dikhlem so slučingja pe ko Korint?

¹⁶ Adava so dikhlem ko savo način o sobranie ko Korint postapingja ki akaja situacija, pomožinela amenge te dikha kaj o Jehova tano pherdo mangipaja hem pravedno (Ps. 33:5). Zarem akava na pottikninela tut panda poviše te faline amare Devle? Ustvari, sarine amen grešinaja — sekova jekh amendar — hem isi amen potreba taro adava ov te prostinel amenge. Sarinen amen isi amen pričina te ova blagodarna e Jehovaske baši otkupnina, koja soj temeli te šaj te oven prostime amare grevija. Kobor tano utešno adava so džanaja kaj o Jehova čače mangela ple slugen hem kaj mangela te oven srekjna zasekogaš!

17. Bašo so ka kera lafi ko sledna statie?

¹⁷ Ako nekoj avdive kerela pharo grevo, sar šaj o starešine taro sobranie te džan palo e Jehovaskoro primer hem mangipaja te pomožinen e manušeske te kainel pe? So valjani te kerel o sobranie keda o starešine ka odlučinen nekoj te ovel cidimo ili palem iramo ko sobranie? Bašo akala pučiba ka kera lafi ko sledna statie.